Փաստ ինֆո

Այս իշխանությունները մեր թատրոնի հետ անելու են այն, ինչ սովոր են անել վերջին 5 տարում՝ ի վերջո, Սոս Ջանիբեկյանը նշանակվելու է,- «Փաստինֆո» լրատվականի հետ զրույցում ասում է «Մհեր Մկրտչյան» արտիսատական թատրոնի դերասան Լևս Դավթյանը՝ ավելացնելով. «Եթե անգամ այդ նշանակումն իրականություն դառնա, ապա դա կատարվելու է օրենքի կոպիտ խախտումով, որովհետև թատրոնը ղեկավարելու հայտ ներկայացրած թեկնածուն պետք է վերջին 4 տարվա ընթացքում թատերական գործունեություն ծավալած լինի։ Մենք չենք հիշում, որ Սոս Ջանիբեկյանը վերջին տարիներին, առհասարակ, թատերական գործունեություն ծավալած լինի, իսկ եթե այդպիսի բան եղել է, ապա թող նա մեզ հիշեցնի։

Հիշեցնենք՝ ըստ մամուլում շրջանառվող լուրերի՝ իշխանությունները մտադիր են դերասան Սոս Ջանիբեկյանին նշանակել Երևանի քաղաքապետարանի «Մհեր Մկրտչյան» արտիստական թատրոնի տնօրեն։ Թատրոնի դերասանական կազմը, սակայն, դեմ է արտահայտվել Ջանիբեկյանի նշանակմանը։ Ինքը՝ Ջանիբեկյանը չի հերքել նշանակման մասին լուրերը՝ հայտնելով միայն, թե հարցը դեռևս քննարկման իսկ գործընթացը՝ խիստ նախնական փուլում է։

Թատրոնի դերասան Լևս Դավթյանն ասում է՝ Սոս Ջանիբեկյանն այս պահին թատրոնում ժամանակավոր պաշտոնակատար է, իսկ ավելի ուշ մրցույթ պետք է հայտարարվի. «Այստեղ էլ անհասկանալի բաներ կան, որովհետև թատրոնն արդեն ուներ տնօրենի իժամանակավոր պաշտանակատարը, այդ գործառույթը կատարում էր թատրոնի փոխտնօրեն Մակիչ Մարգարյանը։ Բավական երկար ժամանակ թատերական շրջանակներից համապատասխան մարդիկ էին փնտրվում, որպեսզի նշանակեին այդ պաշտոնում, սակայն որևէ մեկն իրեն բարոյական իրավունք չէր վերապահում՝ հաստատելու իր թեկնածությունն այդ պաշտոնում, որովհետև բոլորի համար էլ պարզ էր՝ Մհեր Մկրտչյանին հեռացնելու էին թատրոնից՝ նրան ինչ – որ մեկով փոխարինելու համար։ Երևի մարդիկ իրենց մեջ արժանապատվություն էին գտնում՝ նման քայլի չգնալու համար»,-ասում է դերասանը։

Թատրոնի ժամանակավոր պաշտոնակատար նշանակվելուց հետո, ըստ գործող օրենքի համաձայն, թեկնածուն պարտավոր է համապատասխան որակավորման թեստ՝ քննություն անցնի, որպեսզի կարողանա զբաղեցնել թատրոնի տնօրենի պաշտոնը։ «Մհեր Մկրտչյան» արտիստական թատրոնում, սակայն, կասկածներ կան՝ կկարողանա՞ արդյոք Սոս Ջանիբեկյանը հաղթահարել մասնագիտական թեստի սահմանած չափորոշիչները. «Կուզենայի ներկա գտնվել ու լսել, թե ինչպե՞ս է այդ քննությանը մասնակցում Սոս Ջանիբեկյանը, ով հայտ է ներկայացրել թատրոն ղեկավարելու»,- ասում է դերասանը։

Թատրոնում աշխատող դերասանների և աշխատակազմի մեծամասնությունը դեմ է Սոս Ջանիբեկյանի նշանակմանն, ասում է Լևս Դավթյանն ու հավելում.«Օրինակ ես՝ չեմ պատրաստվում աշխատել այդ մարդու հետ։ Գիտեմ նաև, որ իմ պես մտածող շատ դերասաններ կան թատրոնում։ Թե ինչպես իրենք կազատվեն, օրինակ ինձանից, ես չգիտեմ՝ կհեռացնե՞ն ինձ, թե՞ մեկ այլ որոշում կընդունվի, ես չեմ կարող ասել, բայց այն, որ նման ղեկավարության հետ ես չեմ աշխատի, սա հաստատ է։ Ինձ այդ թատրոն բերել է Մհեր Մկրտչյանը, մեծ դերեր մեջ ես թրծվել ու կայացել եմ հենց իր կողմից ստացած վստահության շնորհիվ։ Այստեղ բարոյական, մարդակային հարցեր կան, հույս ունեմ՝ հասկանում եք…»,- ասում է դերասան Լևս Դավթյանը։

Հարցին՝ արդյո՞ք նախկին ղեկավար Մհեր Մկրտչյանի ունեցած քաղաքական դիրքորոշումն ու վերջինիսի կողմից կյանքի կոչված աղմկահարույց «Իշխանություն» և «Իշխանություն 2» ֆիլմերը կարո՞ղ էին պատճառ հանդիսանալ թատրոնից նրա հեռացման համար, Լևս Դավթյանը պատասխանում է՝ անկասկած և միանշանակ նրա հեռացումը թատրոնից քաղաքական ենթատեքս ունի և պատճառը վերոհիշյալ հանգամանքներով է պայմանավորված միայն.«Որովհետև այս իշխանությունները որևէ տարբերակ չգտան նրանից ազատվելու, որոշեցին, որ պետք է կրճատեն Մհեր Մկրտչյանի պաշտոնը՝ թատրոնի Գեղարվեստական ղեկավարի հաստիքը։ Բայց ամենածիծաղելին այն էր, որ կարճ ժամանակ անց, նրանք դրան շատ նման բայց մեկ ուրիշը հորինեցին՝ Գեղարվեսատական խորհրդատուի հաստիք, որտեղ նույնպես Մկրտչյանին չնշանակեցին։ Դրանից առաջ էլ, արդեն, ազատվել էին թատրոնի տնօրեն Էդգար Բադալյանից։ Մարդը մի օր եկավ թատրոն ու հայտարարեց, որ այլևս չի ցանկանում աշխատել իր հարազատ թատրոնում, որ ինքը հոգնել է… Իհարկե, այստեղ ամեն ինչ պարզ էր…»։

Ամփոփելով զրույցը՝ Լևս Դավթյանն ասում է՝ Մհեր Մկրտչյանի ունեցած քաղաքական դիրքորոշումն էր պատճառը՝ թատրոնի շուրջ ստեղծված այս աղջ զարգացումների համար, սակայն դրանք, անխուսափելիորեն, ազդելու են նաև բոլոր այն դերասանների մասնագիտական ճակատագրի վրա, ովքեր նկարահանվել և մասնակցել են «Իշխանություն» և «Իշխանույթուն 2» ֆիլմերում։ Լևս Դավթյանը, սակայն, հիշեցնում է. «Ոչ մի իշխանություն հավերժ չէ, մի օր մեր թատրոնը վերադառնալու է մեզ ու Մհերին»։

Աղբյուր` Փաստինֆո