Փաստ ինֆո

Արցախի կապն արտաքին աշխարհի հետ Ակնայով իրականացնելու առաջարկին Արցախի ո՛չ ժողովուրդը, ո՛չ էլ իշխանությունները չեն համաձայնվում ու չեն էլ համաձայնվելու։ Այդ կարմիր գիծը չեն հատում ու հաստատակամ են այդ առումով։ Այդ մասին «Փաստինֆո»-ի հետ զրույցում ասաց ռազմական փորձագետ Դավիթ Ջամալյանը։

«Ունեմ հստակ տեղեկություններ, որ Ացախի իշխանությունը սկզբունքորեն դեմ է այդ տարբերակին։ Հասկանալի է, որ ճնշում կա Երևանից․ ստիպում են, որ որ Արցախը դառնա Ադրբեջանի մաս, բայց Արցախի բնակչությունն էլ, իշխանություններն էլ գիտակցում են և ասել են, որ դա ճանապարհ չէ ու հետևաբար Ակնայով հաղորդակցությունը կազմակերպելն անթույլատրելի է»,-նշեց Ջամալյանը։

Շեշտելով, որ Արցախն այս աղետալի վիճակում հայտնվել է ՀՀ թրքահաճո իշխանությունների գործունեության հետևանքով և անմիջական մեղքով, փորձագետն ուշադրություն է հրավիրում Հակարիի կամրջի հատվածում Արցախի կյանքի ճանապարհը փակելու՝ Ադրբեջանի քայլին նախորդած զարգացումների վրա։

«Փաշինյանը շատ հանգիստ թշնամուն է հանձնել Գորիս-Կապան ճանապարհի 21 կմ հատվածը, առանց մի կրակոցի նույն թշնամին հաստատվել է Սև լճի մոտ ու հետագա ռազմագործողությունները ՀՀ դեմ սկսել այդտեղից։ Եվ սրան զուգահեռ՝ Փաշինյանը երեք տարի հասարակությանը վախեցնում էր պատերազմով։ Այս ամենի ֆոնին առնվազն կասկածելի չե՞ն Հակարիի կամրջի մոտ՝ ՀՀ սահմանին ադրբեջանական դրոշ տեղադրելու փորձին ուղղված գործողություները։ Միանշանակ, պետք է թույլ չտալ, որ ադրբեջանցիները հերթական անգամ ոտնձգություն անեին մեր տարածքի նկատմամբ, բայց ամբողջ հարցն այն է, որ թշնամու հետագա ոտնձգությունը ոչ թե կանխվել է՝ ինչպես որ պետք էր, այլ պարարտ հող է հանդիսացել, որ ամբողջությամբ փակվի Արցախի կյանքի ճանապարհը։ Եթե իրոք կար մտադրություն հակահարված տալու թշնամուն ու կանխելու հետագա ոտնձգությունները, ապա պետք էր մինչև վերջ գնալ՝ հաշվարկելով հնարավոր բոլոր գործողություններն ու քո քայլերը։ Այն, ինչ կատարվեց, նվեր էր Ալիևին, Արցախն աղետի մեջ գցեց ու ավելի մոտեցրեց պատերազմը։ Գրեթե համոզված եմ, որ ներքին թշնամու հետ կար պայմանավորվածությունը, և ճանապարհը փակվեց այդ ձևով»,-ասաց փորձագետը։

Դավիթ Ջամալյանի դիտարկմամբ՝ անհնար էր չկանխատեսել, որ Բերձորի միջանցքը նույն ճակատագրին է արժանանալու, իսկ Գորիս-Կապան ճանապարհը և հետևաբար Բերձորի հանձնումը մեծագույն հանցանքն էր, որ գործվել է։

«Աղետը սկսվեց Բերձորի հանձնումով, իսկ Հակարիի կամրջի մոտ տեղի ունեցած փոքր գործողությունը վերջին արարն էր։ Երեք տարի վախեցնես ժողովրդին պատերազմով, հետո իմիտացիա ստեղծես, թե թշնամու նախահարձակ քայլերին պատասխան ես տալիս, բայց սահմանափակվես ընդամենը նրա զինվորներին մի փոքր փախուստի մատնելով ու 120 հազար հայի գլխին բերես նման աղետ, դրանից հետո էլ հայտարարես, թե Արցախը ճանաչում ես Ադրբեջանի մաս․․․ Չարիքի բույնն այստեղ է՝ Երևանում»,-նկատեց Ջամալյանը և հավելեց՝ Ալիևն առաջ է տանում իր ծրագրերը՝ ներքին թշնամու հետ համաձայնեցրած։

Աղբյուր` Փաստինֆո