Փաստ ինֆո

Ադրբեջանական «Baku.TV»-ի հեղինակած՝ «Հայաստանի հանքաարդյունաբերության աղետաբեր ազդեցության մասին պատմող ռեպորտաժը ու մի շարք այլ գործողություններ շատ նման են Լաչինը գրավելու, այսինքն, վերջնական փակելու դեպքին: «Փաստինֆո»-ի հետ զրույցում այսպիսի դիտարկում արեց բնապահպանական խնդիրներ լուսաբանող լրագրող Նարինե Կիրակոսյանը։

«Քանի որ օդանավակայանից սկսած մինչև Ներքին Հանդի ձախակողմյան և Գորիսից դեպի Կապան հատվածները թշնամու ձեռքին են, կարող են ամբողջովին կտրել Կապանը, Քաջարանն ու Մեղրին՝ մնացած Հայաստանից եւ իրենց վերահսկողության տակ վերցնեն», - ասել է լրագրողն` ավելացնելով, որ այն թելի նման ճանապարհ է, դա հենց այդ օդանավակայանի ճանապարհն է, եւ ուրիշ տեղից չեն կարող Հայաստան մուտք ու ելք անել։

Հիշեցնենք, որ ավելի վաղ ադրբեջանական «Baku.TV» հեռուստաընկերությունը ռեպորտաժ էր հրապարակել՝ վերնագրելով այն, թե «Հայաստանի հանքերը ոչնչացնում են տարածաշրջանը»: Թշնամական երկրի պատրաստած տեսանյութում ներկայացված էին հարցազրույցներ՝ Կապանի բնակիչների ու բնապահպանական ոլորտի փորձագետների հետ: Մեզ հետ զրույցում Նարինե Կիրակոսյանը պատմեց, որ զրույցները վարել է ազգությամբ ռուս ներկայացած ոմն Նատալյա Խոխլովան։

Ադրբեջանական գործակալն ավելի վաղ էլեկտրոնային փոստով կապվել էր նաև բնապահպան Ինգա Զարաֆյանի հետ, ներկայացել էր որպես «Բլոկնոտ» կայքի լրագրող ու Երևանում նկարահանմամբ հարցազրույց անցկացրել մասնագետի հետ։

«Ուղղակի շղթան էնպես է տանում, որ չեն խորացել, թե ով է, ինչ է։ Ռուս է ներկայացել, «Բլոկնոտ» ինչ-որ պարբերականից։ Ես հարցում եմ արել ու պարզել, որ այնտեղ նման թղթակից չկա։ Բլոկնոտն էլ Մոսկվայում չէ, այլ Ռոստովի փոքրիկ մի հատ ինչ-որ լրատվական է։ Այսինքն, չեն խորացել մյուս հարցերում, մտքներով էլ չի անցել, որ այդպիսի բան կարող է լինել»,- ասաց մեր զրուցակիցը։

Այս առումով, ըստ նրա, այսպիսի դեպքերը պատահական ու զուգադիպությամբ տեղի չեն ունենում։ Կիրակոսյանի համոզմամբ՝ այդ ամենն արվում է դիտավորությամբ ու հստակ օրերին ու ժամանակահատվածներում։

«Այդ նյութն իզուր չէր գնում օգոստոսի 16-ին, երբ ասում են, թե «ամբողջ Զանգեզուրի կոմբինատը ապականում է մթնոլորտը»։ Նույն քայլն արեցին այն ժամանակ, երբ փակեցին Լաչինի միջանցքը։ Դա առիթ է լինելու, կտեսնեք, բերելու են ու նույն սցենարով անեն ամեն ինչ։ սկզբից մտցնելու են կեղծ էկոլոգների, հետո իրականացնեն իրենց ցանկացածը։ Այնտեղ նույնիսկ սահման չկա։ Նույնիսկ խոչընդոտ չկա։ Մենք զորք չունենք իրենց դիմացը»,- ասաց նա։

Կիրակոսյանն այս համատեքստում բարձրացրեց Հայաստանի Հանրապետության համապատասխան անվտանգային համակարգի կողմից տարվող աշխատանքի թերությունների հարցը։

«Այս իշխանությունը խոսում է խաղաղության մասին։ Բնակիչն ասում է՝ ինձ զենք տվեք՝ պաշտպանվելու համար։ Մարդիկ իրենց իսկ տարածքում գերի են ընկնում, կամ սպանվում են։ Նույն Զանգեզուրի կոմբինատի պահակին չսպանեցի՞ն։ Դա այն հատվածն է, որտեղ զինվորը չի կարող պատահական հայտնվել ու հային գերի վերցնել։ Որովհետև իրենց զինվորներն արդեն այնտեղ են։ Ընդամենը մնում է ոտ- ոտ առաջ գան, այդ ճանապարհը փակեն ու վերջ»,- ասաց նա՝ հավելելով, որ այս ամբողջ ընթացքում, թշնամին շատ ակտիվ գրոհ է սկսել նաև սոցիալական ցանցերում։

Աղբյուր` Փաստինֆո