Փաստ ինֆո

Երեխային կտտանքների ենթարկած կինն արդեն մի քանի ամիս է, ինչ Երևանում է բնակվում, տեսանյութն էլ, որոշ տեղեկություններով, հենց Երևանում է նկարահանվել։ Այս մասին «Փաստինֆո»-ի հետ զրույցում ասաց Գավառի քաղաքապետի առաջին տեղակալ Գրիգոր Դաշտոյանը։

Հիշեցնենք, որ համացանցում տեսանյութ է տարածվել, համաձայն որի՝ կինը, որին երեխաները մայր են անվանում, նվաստացնում, մերկացնում, ֆիզիկական և հոգեկան տառապանք է պատճառում ավագ դստերը՝ ներգրավելով մյուս երեխաներին նույնպես։

Իրավապահներն արդեն ընթացք են տվել դեպքին։ ՆԳՆ ոստիկանությունից հայտնել են, որ կինը հայտնաբերվել է և գտնվում է ոստիկանությունում։ Պարզվել է, որ կինը՝ Աննա Արևշատյանը, և նրա ամուսինը՝ Թաթուլ Մադաթյանը, նախկինում դատապարտված եղել են, ընդ որում, ամուսինը կալանավորվել է երկու աղջիկ երեխաների նկատմամբ սեռական բռնության ենթարկելու համար։ Կինը՝ աշխատանքային թրաֆիքինգի ենթարկվելու սուտ մատնության համար։

Երեխային նվաստացրած մայրը ոստիկանությունում հայտնել է, որ նկարահանել է վճարի դիմաց, իսկ թե ով է պատվիրատուն՝ չի նշել՝ ասելով, թե չի ճանաչում։

Գավառի համայնքապետի առաջին տեղակալ Գրիգոր Դաշտոյանը «Փաստինֆո»-ի հետ զրույցում հայտնեց, որ ամուսինները Գավառում բնակվել են ընդամենը 2-3 տարի, կինը Շամշադինից է, ամուսինը՝ Իջևանից։

«Ամուսինը, արդեն տեղյակ եք, որ կալանավորված է։ Կինը երեխաների հետ տեղափոխվել են Երևան։ Մեր ունեցած տեղեկությամբ՝ տեսանյութն էլ նկարահանվել է Երևանում, փորձել ենք իրավապահ համակարգի միջոցով ճշտել, որովհետև իրենք

Գավառում հաշվառված չեն։ Երեխաները Գավառում ո՛չ նախադպրոցական հաստատություն, ո՛չ դպրոց են հաճախում»,- ասաց Դաշտոյանը՝ հավելելով, որ այլ մանրամասներ իրավապահ համակարգը կհայտնի։

Ըստ փոխհամայնքապետի՝ ընտանիքն աչքի չի ընկել, անգամ տեսանյութը դիտելիս չեն ճանաչել կնոջը, հետագայում են պարզել։

Հեղինակ՝ Իզաբել Սահակյան

Աղբյուր` Փաստինֆո