Փաստ ինֆո

Հարավային Կովկասում Թուրքիայի ազդեցության գոտի ձևավորելու համար բավական ակտիվ պրոցեսներ են ընթանում, որի մեջ ներգրավված են նաև Հայաստանի Հանրապետության օրվա իշխանությունները։ «Փաստինֆո» լրատվականի հետ զրույցում ասում է ԲՀԿ քաղխորհրդի անդամ Արման Աբովյանը՝ ավելացնելով, որ իրենց որդեգրած քաղաքականությամբ իշխանություններն անում են հնարավոր ամեն ինչ, որպեսզի Թուրքիայի դիրքերն ամրապնդվեն Հարավային Կովկասում։

Հիշեցնենք՝ Հայաստանի պահանջով երեկ տեղի ունեցավ ՄԱԿ ԱԽ հրատապ նիստ՝ Ադրբեջանի կողմից Արցախի շրջափակման հարցով, որին մասնակցում էր նաեւ Թուրքիայի ներկայացուցիչը ու անգամ ելույթ ունեցավ։

Արման Աբովյանն ընդգծում է՝ Հարավային Կովկասում ստեղծված իրավիճակը շերտային ուսումնասիրություն է պահանջում.«Հարավային Կովկասում իր դիրքերը պետք է ամրապնդի հավաքական Արևմուտքը, որի ներկայացուցիչն ու հիմնական խաղացողն այստեղ հենց Թուրքիան է։ Այո, պետք է հասկանալ, որ ստեղծված իրավիճակում իրանա – ռուսական հակազդեցության անհրաժեշտություն կա, ինչն, իհարկե, առկա է, սակայն այդ հակազդեցությունն արտահայտվում է ոչ թե հայկական, այլ, առաջին հերթին՝ աշխարհաքաղաքական շահերից բխելով։ Հետևաբար, եթե ՀՀ այս իշխանությունները որոշել են ներդաշնակվել թուրք – ադրբեջանկան տանդեմի հետ, ինչն, ըստ էության, ինքնասպանություն է ոչ միայն Հայաստանի ու Արցախի, այլ, առհասարակ, տարածաշրջանում հայկական էթնոսի համար, ապա ո՛չ ռուսը, ո՛չ իրանցին, ո՛չ էլ չինացին մեզ չեն խանգարի, որ «Ապագա կա՛» գոռալով, ուրախ – զվարթ գնանք դեպի թուրքական կախաղան և պարանն, ինքներս մեր ձեռքով, գցենք մեր վզին»,- ասում է բանախոսը։

Վերադառնալով ՄԱԿ-ի Անվտանգության խորհրդի նիստից ունեցած սպասելիքների հարցին՝ Արման Աբովյանն ասում է՝ իսկապես չի հասկանում, թե մարդկանց սպասելիքներն այդ նիստից ինչո՞վ են պայմանավորված.«Այ ժողովուրդ ջան, նորից եմ կրկնում՝ ո՞վ է ընդունել Արցախը որպես Ադրբեջանի տարածքային ամբողջականության մաս՝ հայաստանյան օրվա իշխանությունները։ Ո՞վ է որոշել, որ ստորադասելով Հայաստանի Հանրապետությա ազգային և պետական շահը, կարելի է խաղաղություն ստանալ՝ կրկին սրանք։ Ո՞վ է խաղաղության պատրվակով, ըստ էության, հանձնում ՀՀ կենսական շահը՝ այս իշխանությունը։ Ո՞վ է թղթի շերեփը ձեռքին, ընկած այսպիսի կոշտ աշխարհաքաղաքական զարգացումների հորձանուտում ուժեղ պայքարողի իմիտացիա ստեղծում՝ կրկին ու կրկին սրանք։ Հիմա դուք ի՞նչ եք սպասում ՄԱԿ-ից կամ դրա Անվտանգության խորհրդի նիստից, որ նրանք Հռոմի պապից ավելի կաթոլիկ են գտնվելու և, ի հեճուկս ձեր ղեկավարների վարած քաղաքականության, մի կողմ դնելով իրենց դարդն ու ցավը, պայքարի են ելնելու իրենց համար այս պահին դաշնակից հանդիսացող Թուրքիայի և Ադրբեջանի դեմ՝ պաշտպանելու Արցախի և Հայաստանի շա՞հը…Ես, ուղղակի, չգիտեմ չեմ հասկանում, թե սրան ի՞նչ անուն կարելի է տալ…»,- տարակուսած ասում է ԲՀԿ քաղխորհրդի անդամը։

Ամփոփելով զրույցը՝ Արման Աբովյանն ասում է՝ հայաստանյան օրվա իշխանությունները զբաղված են մարդկանց հատվածային ուշադրությունը շեղելու հետևանքային գործընթացներից. «Ինչո՞ւ համար է սա արվում՝ որպեսզի գործընթացի բուն պատճառները լղոզվեն և չհիշվեն մարդկանց կողմից։ Այս իշխանությունն է զրոյացրել մեր մանևրի դաշտը՝ ընդունելով Արցախն Ադրբեջանի կազմում, իսկ գնալ – հասնել ՄԱԿ-ի Անվտանգության խորհրդի նիստին ու ֆիքսել, որ Արցախում մարդիկ սովամահ են լինում, սա, մեղմ ասած, կապիկություն է։ Ի՞նչ է՝ այնտեղ այդ մասին չգիտե՞ն…Այդ դեպքում ինչի՞ համար էր արտահերթ նիստը, եթե նրանք տեղյակ չեն Արցախում տեղի ունեցող զարգացումներից…Իսկ ինչո՞ւ այնտեղ հարցի լուծման վերաբերյալ որևէ տարբերակ կամ վերջնական փաստաթղթի պլան չներկայացվեց, որի արդյունքում՝ Ադրբեջանի դեմ, գոնե, սանկցիաներ կիրառելու հարց կբարձրանար։ Դուք հասկանում եք, որ այս ամենն, ընդամենը, գործ անելու իմիտացիա է, որ որդեգրել է այս իշխանությունը՝ թղթե շերեփը ձեռքին այս ու այն կողմ վազվզելով, որ երբ պատասխանատվության ժամը գա, ասեն՝ մենք ամեն ինչ արեցինք, բայց չստացվեց»,- ասում է Արման Աբովյանը։

Աղբյուր` Փաստինֆո