Փաստ ինֆո

Մարտադաշտն ինքնակամ լքելու մեջ մեղադրվող հրամանատար Իշխան Վահանյանի գործով դատական նիստի ընթացքում իրավիճակը լարվեց՝ տուժողի հարցաքննության ժամանակ։ Պատերազմի ժամանակ գերության մեջ հայտնված զինծառայող Արայիկ Գալստյանին զոհված զինծառայողներից մեկի հայրը հարց ուղղեց՝ եթե այն ժամանակ իմանար, թե ում մեղքով է ինքը հայտնվելու գերության մեջ, արդյո՞ք չէր գնդակահարի Իշխան Վահանյանին։

Հարցին գերությունից վերադարձած զինծառայողը հստակ պատասխան չտվեց, սակայն զոհված զինծառայողի ծնողի հարցը դուր չեկավ ամբաստանյալին։ Ծնողը, դիմելով Վահանյանին, հորդորեց «թարս» չնայել։ Իրավիճակը հատկապես լարվեց մեկ այլ հարցադրումից։ Մասնավորապես, ծնողներից մեկը նշեց, որ իր որդին 11 օրվա ծառայող էր և նրան վրդովվեցրել է տուժողի այն դիտարկումը, որ ինքն ունակ եղել է կատարելու հրամանները, թեև  պատերազմի մեկնարկի ժամանակ երկու ամսվա ծառայող էր։ Տուժողի իրավահաջորդը նկատեց, որ զորքը մարտունակ չի ճանաչվել, քանի որ նորակոչիկներ են եղել, ոմանք նույնիսկ երդման արարողության չեն մասնակցել և սպայական կազմը տարել է նրանց պատերազմի։ Այդ ընթացքում իրավիճակը լարվեց, վիճաբանություն և քաշքշուկ եղավ։ Ծնողը, դիմելով Վահանյանին, ասաց. «Սատկի, դու պետք է իմ նման տանջվես», ինչին տեղից պատասխանեց մեղադրյալը։ Կարգադրիչները ծնողին հեռացրեցին նիստերի դահլիճից։

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։ Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս գործով անցնող միակ մեղադրյալը Իշխան Վահանյանն է։ Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո