Փաստ ինֆո

Ես համարում եմ, որ քաղաքային ընտրություններում Արցախի հարցը շահագործողները սխալ գործով են զբաղված։ «Փաստինֆո»-ի հետ զրույցում այսպիսի հայտարարություն արեց «Լուսավոր Հայաստան» կուսակցության քաղաքապետի թեկնածու Դավիթ Խաժակյանը՝ անդրադառնալով հարցին, թե արդյո՞ք ինքը համաձայն է ՀՀ իշխանությունների տեսակետին, որ Արցախը կարող է համարվել Ադրբեջանի տարածքային ամբողջականության մաս։

Ինչպես արդեն հայտնել ենք՝ 14 քաղաքական ուժ հայտ է ներկայացրել՝ մասնակցելու Երեւանի ավագանու ընտրություններին։ «Փաստինֆո»-ն շարք է սկսել՝ պարզելու, թե մայրաքաղաքի կառավարումն ստանձնելու հայտ ներկայացրած գործիչներն ինչ են մտածում ընդհանրապես Հայաստանի ապագայի համար կենսական նշանակություն ունեցող հարցերի շուրջ, այն է՝ Արցախը պատկերացնո՞ւմ են Ադրբեջանի կազմում, թե ոչ։

Խաժակյանը ոչ միայն չպատասխանեց մեր հարցին, այլև ցեղասպանության ենթարկվող Արցախի խնդրի վերաբերյալ իրեն հարց ուղղող լրագրողներին մեղադրեց քաղաքական շահեր սպասարկելու մեջ։ Հատկանշական է, որ «Փաստինֆո»-ն Արցախի վերաբերյալ նույն հարցն ուղղել է նաև քաղաքապետի մի շարք այլ թեկնածուների, որոնք՝ ի տարբերություն Խաժակյանի, մեծ պատրաստակամությամբ հայտնել են իրենց տեսակետը՝ այդ կարևորագույն խնդրի վերաբերյալ։

«Նաև սխալ գործով են զբաղված այն լրագրողները, որոնք կփորձեն շահարկման թեմա դարձնել Արցախի հարցը՝ քաղաքային ընտրություններում։ Եվ դա, տվյալ պահին, ուղղված է հենց Ձեզ»,- ասաց նա՝ դիմելով «Փաստինֆո»-ի լրագրողին։

Մեր հարցադրմանը, թե արդյո՞ք որպես ՀՀ քաղաքացի և որպես ընդդիմադիր հանդես եկող ուժի ներկայացուցիչ, անհանգստություն ու տեսակետ չունի հարցի վերաբերյալ՝ Խաժակյանն ասաց, որ ինքն ավելի վաղ բազմաթիվ անգամներ, հրապարակային ձևով հայտնել է իր տեսակետն այդ մասով։ Հարցին, թե ինչ տեսակետի մասին է խոսքը՝ չմանրամասնեց։

«Հիմա Դուք ինձ ստիպում եք, քաղաքային ընտրությունների շրջանակներում շահարկման թեմա դարձնել Արցախի հարցը, ինչով ցույց եք տալիս Ձեր վերաբերմունքը՝ այդ հարցի նկատմամբ, ցույց տալով, որ այդ հարցը ձեզ համար շահարկման նյութ է և ոչ թե մտահոգության առարկա։ Ես անձամբ Ձեզ կոչ եմ անում այդ հարցին վերաբերվել որպես մտահոգության առարկա և ոչ թե որպես շահարկման նյութ»,- ասաց նա։

Խաժակյանի այս հայտարարությունից հետո «Փաստինֆո»-ն նրանից հետաքրքրվեց, թե արդյո՞ք հարցի վերաբերյալ իր կողմից մեկնաբանության չտալը կարող է մեկնաբանվել որպես տվյալ հարցում ՀՀ իշխանությունների հետ համակարծիք լինելու նշան՝ Խաժակյանն շտապեց մեղադրանքներ հնչեցնել ու անհիմն մեր լրատվականն ասոցացնել «որոշ քաղաքական ուժեր»-ի հետ։ Մեր դիտարկմանը, որ այդպիսի արտահայություններից լավ կլինի զերծ մնալ՝ Խաժակյան պատասխանեց, որ չի հաստատում, պարզապես տեսակետ է հայտնում՝ ելնելով հարցադրումից։

«Երևան քաղաքն անցկացնում է ընտրություններ։ Եվ երևանցիներն իրավունք ունեն ընտրելու քաղաքապետի, ով պետք է զբաղվի քաղաքային խնդիրներով, և ո՛չ թե մարդու կամ մարդկանց խմբերի, որոնք Արցախի հարցը կդարձնեն շահարկման թեմա՝ դրա դրական և բացասական իմաստով»,- ասաց նա։

Նկատենք, որ որպես երեւանցի, որը վաղը մասնակցելու է Երեւանի ընտրություններին, կարեւորում ենք ոչ միայն աղբահանության հարցը, այլ թե քաղաքապետի հավակնորդը ինչ պատկերացումներ ունի ազգային արժեքների ու ընդհանրապես հայ ժողովրդի ապագայի վերաբերյալ. Պատրաստ է լինել քաղաքապետ՝ անկախ նրանից Հայաստանը կկորցնի իր անկախությունը ու կհայտնվի այլ երկրի տիրապետության տակ, թե իսկապես կարեւորում է հայերի մայրաքաղաքի պահպանումը, իսկ Արցախի ինքնորոշման ու գոյության խնդիրն այս հարցում ունի սկզբունքային նշանակություն։

Ի դեպ, նշենք,որ «Լուսավոր Հայաստան» կուսակցության նախագահը Էդմոն Մարուքյանն է, որը ՀՀ գործող իշխանությունների հատուկ հանձնարարություններով դեսպանն է, այսինքն՝ այս իշխանությունների արտաքին քաղաքականության իրականացնողը։

Ավագանու ընտրություններին մասնակցելու հայտ ներկայացրած երկու ուժ արդեն հայտենլ է իր դիրքորոշումը՝ Արցախի վերաբերյալ. «Ուժը հայրենյաց» կուսակցության նախագահ Տիգրան Արզաքանցյանը վստահեցրել է, որ իր կարծիքով Արցախը որևէ դեպքում չի կարող լինել Ադրբեջանի տարածքային ամբողջականության մաս՝ անկախ ամեն ինչից։

«Հայաստանի եվրոպական կուսակցության» քաղաքապետի թեկնածու Տիգրան Խզմալյանը ևս կտրուկ դեմ է նման դիրքորոշմանը։ Նա «Փաստինֆո»-ին հայտնեց, որ Արցախը չի լինելու ո՛չ Արրբեջանի և ո՛չ էլ Հայաստանի կազմում։

Աղբյուր` Փաստինֆո