Փաստ ինֆո

Էս ամեն ինչին՝ մեզ միայն համե՞րգն էր պակասում։ Ժանտախտի պահին խրախճա՞նք եք կազմակերպում, հա՞…Արցախում մարդիկ սոված – ծարավ, չգիտեն՝ է՞լ ինչ անեն, սովից էրեխեք են մահանում ու ուշաթափվում, դուք էստեղ համե՞րգ եք կազմակերպում, հա՞…Ինչի՞ վրա եք ուրախանում, ի՞նչ առիթով եք համերգ տալիս։ Սա նույն է, որ գնաս գերեզմանատանը՝ համերգ կազմակերպես,- «Փաստինֆո» լրատվականի հետ զրույցում ասում է գրող, հրապարակախոս Լևոն Ջավախյանը՝ անդրադառնալով հայտնի ռեփ կատարող Սնուփ Դոգի՝ Երևանում կայանալիք համերգին։

Հիշեցնենք՝ Հայաստանի կառավարությունն ավելի քան 6 միլիոն դոլար է հատկացրել ռեփեր Սնուփ Դոգի (Snoop Dogg) համերգի կազմակերպման համար։ Ըստ որոշման հիմնավորման՝ նշյալ գումարը կուղղվի Սնուփ Դոգի հոնորարի վճարմանը, արտիստի թիմի տեխնիկական պահանջների, անվտանգության և ապահովագրական ծախսերի, բարձրակարգ տեխնիկական հագեցվածության ապահովմանը և գովազդային միջոցառումների իրականացմանը:

«Բա էդ համերգը տանեիք՝ Եռաբլուրում կազմակերպեիք, ինչի՞ էդպես չեք արել, ավելի լավ կլիներ, որովհետև մի մեծ Եռաբլուր էլ այսօր, արդեն, Հայաստանն է՝ կեսը մեռել են, էն մի կեսն էլ՝ պատրաստվում է մեռնելու։ Իսկ ավելի ճիշտ՝ դուք ձեր այդ համերգները տարեք ձեր ծնողների գերեզմանների վրա կազմակերպեք»,- նշում է Ջավախյանը։

Խոսելով մամուլում լայն շրջանառվող լուրերի մասին՝ թե հայտնի ռեփերի համերգի համար հատկացված գումարների մի զգալի մասը կամ կառավարական մասշտաաբով կատարվող փողերի լվացում է կամ ինչ - որ մեկի ատկատը, Լևոն Ջավախյանը բավականին հետաքրքիր դիտարկում է կատարում.«Ընկերներիցս մեկը երեկ Ստաս Նամինի հետ է խոսել։ Նամինն, իմանալով այստեղ կազմակերպվող այդ համերգի մասին, որին այս իշխանությունները պատրաստվում են 6 մլն. դոլար հատկացրել, ասել է՝ այսպիսի համերգի համար, ընդամենը, 1 մլն. դոլարը լիուլի պետք է բավարար լիներ։ Դե պատկերացրեք, թե ի՜նչ գումարների յուրացման մասին է խոսքը, իսկ թե ի՞նչ նպատակների համար է ծախսվելու յուրացված գումարը կամ թե ո՞ւմ գրպանն է գնալու, հայտնի չէ, էն էլ մեր այս սև սրտի՞ն…Գետինը մտնեք ու դուրս չգաք հա՜…»,- ասում է Լևոն Ջավախյանը և հավելում՝ եթե օրվա այս իշխանությունների կողմից այդքան թմբկահարած նախկինները տոպրակներով էին թալանում, ապա սրանց արած թալանը ջվալներով էլ չի հաշվվի։

Օրվա իշխանություններն, ըստ հրապարակախոսի, նմանօրինակ միջոցառումներ նախաձեռնելով, այլ խնդիրներ ևս լուծելու նպատակ են հետապնդում. «Սրանք, իբր, ուզում եմ մարդկանց ու աշխարհին ցույց տան, թե այստեղ ամեն ինչ լավ է, ոչ մի խնդիր չկա, որ, ի շնորհիվ Նիկոլի, բոլորն այստեղ անհոգ ու երջանիկ ապրում են և միայն համերգներ գնալու մասին են մտածում։ Էլ չխոսեմ այն մասին, որ այսպիսի արարքներով ազգի մեջ ընկած պառակտումն ավելի մեծ ճաքեր է տալիս, որովհետև շատ թեթևամիտ երիտասարդներ կան, ովքեր, միայն մարմնական վայելքներով են առաջնորդվում և, իսկապես, կգնան այդ համերգին ու դատարկ գլուխներն օրորելով, հորթի նման տռճիկ կտան, չմտածելով, որ իրենց Հայրենիքի մեկ այլ հատվածում, իրենց պես շատ երիտասարդներ սովամահության շեմին են հայտնվել։ Թքած ունեմ այն բոլոր երիտասարդների վրա, ովքեր կգնան ու կմասնակցեն այդ համերգին։ Սա՞ է արդյո՞ք մեր ազգային դեմքը…Սա, ուղղակի, անբարոյականություն է, ես այլ բառ չեմ գտնում, այս իշխանության արարքները մեկնաբանելու համար»,-զայրացած ասում է Լևոն Ջավախյանը։

Խնդիրը նույնիսկ այն չէ, որ հրավիրված երգիչը թմրամոլություն պրոպագանդող հայտնի մեկն է, ասում է Ջավախյանը և հավելում՝ դա նրա կյանքն է՝ ինչ ուզում է, անում է, ինչպես ուզում է՝ ապրում է, խնդիրն այն է, որ օրվա այս իշխանությունները թույլ չեն տալիս, որպեսզի մենք մեր կյանքով ապրենք.«Սրանց ձեռնտու է, որպեսզի ազգը մեծ քայլերով գնա դեպի դեգրադացիա, քայքայվի ու փտի ազգի սերուցքը՝ երիտասարդությունը։ Հենց դա է պատճառը, որ հրավիրում են, հենց, հայտնի թմրամոլ մեկին, որպեսզի օրինակ ծառայի՝ առանց այն էլ թմրամոլության ճիրաններում հայտնված անուղեղ երիտասարդների մի հատվածի համար։ Այս ամենն արվում է նրա համար, որ սրանք իրենց տերերի կողմից առաջ քաշած ազգակործան ծրագիրն ավելի հեշտությամբ իրականություն դարձնեն։ Եթե հին Հռոմում ասում էին՝ «Բաժանիր, որ տիրես», սրանց մոտ հայտնի խոսույթը մի քիչ փոխվել է՝ պետք է քանդել ու քայքայել, որպեսզի տիրեն, ինչն էլ անում են»,- ամփոփելով զրույցն ասում է գրող, հրապարակախոս Լևոն Ջավախյանը։

Աղբյուր` Փաստինֆո