Փաստ ինֆո

ՀՀ գլխավոր դատախազ Աննա Վարդապետյանը վճռաբեկ բողոք է ներկայացրել՝ պահանջելով բեկանել Սյունիքի մարզի ընդհանուր իրավասության դատարանի դատավոր (լիազորությունները կասեցվելուց հետո օրենսդրական փոփոխություններով պայմանավորված՝ դատավորը ռեզերվում է) Բորիս Բախշիյանի արդարացման վճիռը։ Այս մասին «Փաստինֆո»-ն տեղեկանում է «Դատալեքս» դատական-տեղեկատվական համակարգից։

Ինչպես արդեն տեղեկացրել ենք՝ դատավոր Բորիս Բախշիյանի նկատմամբ հետապնդումները սկսվել են լեգենդար հրամանատար Աշոտ Մինասյանի նկատմամբ ընտրված խափանման միջոց կալանավորումը փոխելուց հետո, սակայն փաթեթավորվել է մեկ այլ քաղաքական հնչեղություն ունեցող գործով ամբաստանյալին կալանավորելու գործով։ Մասնավորապես, դատավորին մեղադրել էին Քաջարանի նախկին քաղաքահետ Մանվել Փարամազյանի դեմ ցուցմունք տված Նիկոլ Փաշինյանի աջակցին կալանավորելու համար, թեև ամբաստանյալն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Ընդ որում՝ դատախազությունը չէր բողոքարկել Փաշինյանի աջակից հանդիսացող ամբաստանյալին կալանավորելու լ որոշումը և առանց բողոքարկման՝ դատական ակտը կայացնելուց ամիսներ անց դատավորի նկատմամբ քրեական հետապնդում է նախաձեռնել։

Դատավորին ի սկզբանե մեղադրանք էր առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Վարույթն իրականացնող մարմինը որպես ծանր հետևանք էր դիտարկել այն, որ ամբաստանյալ Մկրտչյանի նկատմամբ, «Գորիս» ՔԿՀ-ում, իբրև ազդեցություն է գործադրվել՝ հարկադրելով փոխել ցուցմունքը, ինչն էլ հանգեցրել է նրան, որ Քաջարանի համայնքապետ Մանվել Փարամազյանի խափանման միջոց կալանավորումը փոխարինվի գրավով։ Դատավորն անգամ կալանավորվել էր, սակայն մեղադրանքն այնքան աբսուրդ էր, որ նախաքննական մարմինը հենց նախաքննության փուլում ստիպված եղավ հրաժարվել նախնական մեղադրանքից, այն վերաորակվեց և մեղադրանք առաջադրվեց ՀՀ ՔՕ 348-րդ հոդվածի 2-րդ մասով՝ ակնհայտ ապօրինի կալանավորելու հատկանիշներով։

Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, սեպտեմբերի 28-ին հրապարակել էր արդարացման դատական ակտը՝ ճանաչելով և հռչակելով Բախշիյանի անմեղությունը։ Դատավորն արդարացվել է հանցակազմի բացակայության հիմքով։

Առաջին ատյանի դատարանի դատական ակտի դեմ վերաքննիչ բողոք ներկայացրել էր ինչպես դատախազը, այնպես էլ՝ պաշտպանության կողմը։ Դատախազությունը, մասնավորապես, պահանջել էր մեղավոր ճանաչել Բախշիյանին՝ որպես պատիժ նշանակելով հանրային ծառայության պաշտոններ և հանրային պաշտոններ զբաղեցնելու իրավունքից զրկելը՝ 5 տարի ժամկետով, ՀՀ քրեական օրենսգրքի 79-րդ հոդվածի համաձայն մեղմացնել նշանակված պատիժը և վերջնական պատիժ սահմանել հանրային պաշտոն զբաղեցնելու իրավունքից զրկելը՝ 4 տարի ժամկետով, իսկ Բորիս Բախշիյանի պաշտպանները պահանջում էին արդարացնել Բախշիյանին նաև հանցագործության դեպքի բացակայության հիմքով, ինչպես նաև՝ անթույլատրելի ճանաչել փաստաբան Յուրա Ավայանի ցուցմունքները։

Վերաքննիչ քրեական դատարանն անփոփոխ էր թողել դատական ակտը՝ մերժելով բողոքները, ինչի դեմ վճռաբեկ բողոք է ներկայացվել նախ՝ գլխավոր դատախազի, ապա նաև պաշտպանի կողմից։ Զեկուցող դատավոր է Վճռաբեկ դատարանի դատավոր Սերժիկ Ավետիսյանը։

Հեղինակ՝ Իզաբել Սահակյան

Աղբյուր` Փաստինֆո