Փաստ ինֆո

Երևանի ավագանու ընտրություններին ներկայացված 14 ուժերի մի զգալի հատվածն, իհարկե, ստատիստիկ մինիմումին հասնող ձայների քանակն, անգամ չեն ստանալու և պարզ է, որ նրանք անցողիկ շեմին անգամ մոտ չեն լինելու, հետևաբար, այս առումով, ես կարծում եմ, որ նրանք ձայներ փոշիացնելու համար են,-«Փաստինֆո» լրատվականի հետ զրույցում ասել է քաղտեխնոլոգ Վիգեն Հակոբյանը։

Հիշեցնենք՝ այսօր երեկոյան Երևանի ավագանու ընտրությունների առաջադրումն ավարտվեց։ Առաջադրվեցին 14 ուժ՝ 13 կուսակցություն և մեկ դաշինք։ Դրանք են՝
Հայաստանի Եվրոպական կուսակցություն, «Ժողովրդավարական համախմբում» կուսակցություն, «Քաղաքացիական պայմանագիր» կուսակցություն, «Հանուն սոցիալական արդարության» կուսակցություն, «Ուժը հայրենյաց» կուսակցություն, «Հանրային ձայն» կուսակցություն, «Ազգային առաջընթաց» կուսակցություն,

«Հաղթանակ» կուսակցություն, «Ապրելու երկիր» կուսակցություն, «Հանրապետություն» կուսակցություն, «Միացյալ Հայաստան» կուսակցություն, «Մայր Հայաստան» կուսակցությունների դաշինք, «Լուսավոր Հայաստան» կուսակցություն, «Արդար Հայաստան» կուսակցություն։

Քաղտեխնոլոգ Վիգեն Հակոբյանը նկատում է ՝ որևէ քաղաքական ուժ, որ հայտ է ներկայացնում մասնակցելու ցանկացած ընտրութուններին, իր սեփական խնդիր է լուծում. «Մեկն այսպես ազդարարում է իր մասին և քաղաքական գործունեություն սկսում, մեկն առաջադրվում է՝ որպես ֆոլեր կուսակցություն՝ մեկ այլ կուսակցության օգտին աշխատելու և մեկ ուրիշի ձայները փոշիացնելու նպատակով, ոմանց համար ընտրություններին մասնակցելը շատ կոնկրետ խնդիրներ լուծելու համար է, ինչպես օրինակ՝ ֆինանսական և այլն. «Հետևաբար, ակնհայտ է, որ ավագանու այս ընտրություններին հայտ ներկայացրած քաղաքական ուժերից ոչ բոլորն են մոտ լինելու անցողիկ շեմ համարվող 4 տոկոսին։ Կարծում եմ, ներկայացված 14 ուժերի մեջ կարող են լինել 3-4 կուսակցություն, որոնք շանս կունենան ավագանու այս ընտրություններում որոշակի գոհացուցիչ արդյունքներ ցույց տալ։ Նորից եմ կրկնում, սակայն, մեկի համար արդյունք ցույց տալը 4 տոկոսի շեմին հասնելն է, մյուսի համար՝ բացարձակ հաղթանակ ապահովելը»։

Ըստ նրա՝ մասնակիցներից նրանք, ովքեր, ուղղակիորեն, իշխանություն չեն, իրենց առջև խնդիր կդնեն՝ հավաքելու այնքան տոկոս ձայների քանակ, որպեսզի հետագայում դաշինք կազմելով, կարողանան իշխող՝ «Քաղաքացիական պայմանագիր» կուսակցությանը բորդյուրից այն կողմ թողնեն. «Օրինակ, «Մայր Հայաստան» դաշինքն, արդեն իսկ, ուղղակիորեն հայտարարել է, որ ընտրություններին մասնակցություն բերելու իր որոշումը պայմանավորված է ոչ թե հաղթանակով, այլ հիմնավորապես քաղաքական պրոցեսներ գեներացնելով և այլն»։

Խոսելով իշխանական «Քաղաքացիական պայմանագիր» կուսակցության մասին, քաղաքագետ Վիգեն Հակոբյանը նկատում է՝ գերխնդիրը, որ իշխանական ուժը փորձելու է լուծել այս ընտրություններին, այն է, որպեսզի դրան հնարավորինս քիչ մարդ մասնակցի. «Քիչ թվով քաղաքացիների մասնակցության պարագայում, գոհացուցիչ արդյունք ցույց տալու իշխանական ուժի շանսերն առավել հավանկան են դառնում, որովհետև, որպեսզի կարողանան վերարտադրվել, իշխանակական ուժին հարկավոր է ստանալ պարզ մեծամասնության ձայները։ Իսկ, եթե, նույնիսկ, չհաջողվի ստանալ պարզ մեծամասնության ձայները, ապա նրանք կփորձեն դաշինք կազմելու ճանապարհով իրենց վերարտադրումն ապահովել։ Հետևաբար, ուզում եմ շեշտել, որ ավագանու ընտրություններին չմասնակցելու քաղաքացիների որոշումն, այս իրավիճակում, աշխատելու է հենց իշխող «Քաղաքացիական պայմանագիր» կուսակցության օգտին»,- ամփոփելով զրույցն ասել է քաղտեխնոլոգը։

Աղբյուր` Փաստինֆո