Փաստ ինֆո

Արցախն ամենավատ դեպքում պետք է լինի անկախ, ամենալավ դեպքում՝ Հայաստանի մարզ։ Այն, ինչ 30 տարիների ընթացքում չի արվել, մենք պետք է հասնենք դրան։ «Փաստինֆո»-ի հետ զրույցում այս մասին ասաց «Ուժը հայրենյաց» կուսակցության նախագահ Տիգրան Արզաքանցյանը։

Ինչպես արդեն հայտնել ենք՝ 14 քաղաքական ուժ հայտ է ներկայացրել՝ մասնակցելու Երեւանի ավագանու ընտրություններին։ «Փաստինֆո»-ն շարք է սկսել՝ պարզելու, թե մայրաքաղաքի կառավարումն ստանձնելու հայտ ներկայացրած գործիչներն ինչ են մտածում ընդհանրապես Հայաստանի ապագայի համար կենսական նշանակություն ունեցող հարցերի շուրջ, այն է՝ Արցախը պատկերացնո՞ւմ են Ադրբեջանի կազմում, թե ոչ։ «Ուժը հայրենյաց» կուսակցության նախագահ Տիգրան Արզաքանցյանը վստահեցնում է, որ իր կարծիքով Արցախը որևէ դեպքում չի կարող լինել Ադրբեջանի տարածքային ամբողջականության մաս՝ անկախ ամեն ինչից։

«Արցախում այս պահին 120.000 մեր հայրենակիցներ ունենք շրջափակման մեջ։ Ես ավելի վաղ էլ եմ ասել, որ սկզբից մեր կառավարությունը պետք է զբաղվեր Արցախի այս խնդրով, հետո նոր անցում կատարեր քաղաքապետի ընտրություններին»,- ասաց նա։

Արզաքանցյանի խոսքով՝ այս դիրքորոշումը ոչ միայն իրենը, այլև իր ներկայացրած ուժի հավաքական տեսակետն է։ Նրա բնորոշմամբ՝ Արցախն Ադրբեջանի կազմում ճանաչելու ՀՀ իշխանությունների քայլը լավ չկշռադատված չէ՝ հաշվի առնելով նաև Ադրբեջանի կողմից Հայաստանի Հանրապետության տարածքային ամբողջականությունը ճանաչելու մասին Ալիևի կողմից որևէ հայտարարություն չհնչեցնելու փաստը։

«Ո՛չ դելիմիտացիա է եղել, ո՛չ դեմարկացիա է եղել։ Ոչ մի հանձնաժողով չի կազմել՝ սահմանների հատման համար։ Ո՞նց կարանք մենք միանգամից տենց վերցնենք...

Ադրբեջանը մինչև հիմա էլ հայտարարում է, թե Սևանն ու Երևանն Ադրբեջան է։ Դրանից հետո ո՞նց ենք մենք դրանց ճանաչում»,- ասաց Արզաքանցյանը։

Նա հավելեց, որ Փաշինյանն ամեն ինչ պետք է աներ՝ Ալիևի կողմից ՀՀ տարածքային ամբողջականությունը ճանաչելու մասին հայտարարությունը լսելու համար։

«Պռոստը մեր վարչապետը լավ չի ճանաչում Ադրբեջանի ղեկավարին։ Ինքը (նկատի ունի Ալիևին- խմբ.) պոտենցիալ ստախոս է։ Փաշինյանն ազնիվ ձևով հելել հայտարարել է, բայց դիմացինն (նկատի ունի Ալիևին- խմբ.) իրեն օգտագործում է։ Էսօր ինքն իրեն համարում է հաղթած երկիր, դրա համար ինքը ինչ ձև ուզում՝ պատասխանում է»,- ասաց նա։ Արզաքանցյսնի գնահատմամբ Ադրբեջանն իր գործողություններով խախտում է 2020 թվականի նոյեմբերի 9֊ին ստորագրված եռակողմ հայտարարության`իր իսկստորագրած կետերը։

«Փաստինֆո»-ն առաջիկայում կներկայացնի նաեւ մյուս 13 ուժերի տեսակետն՝ առանձին-առանձին, նշված հարցի վերաբերյալ։

Աղբյուր` Փաստինֆո