Փաստ ինֆո

ՀՀԿ փոխնախագահ Արմեն Աշոտյանի կալանավորման ժամկետը ևս երկու ամսով երկարացնելու միջնորդության քննությունը կրկին հետաձգվեց։ Խնդիրն այն է, որ միջնորդությանը քննիչի կողմից կցված տեսագրությունների 9 սկավառակներից Արմեն Աշոտյանը ՔԿՀ-ում կարողացել է ծանոթանալ միայն մի մասին։

Նշենք, որ Արմեն Աշոտյանի կալանավորման ժամկետը երկարացնելու միջնորդության քննությունն, ըստ էության, դեռևս չի իրականացվել։ Միջնորդության քննությունը նախատեսված էր օգոստոսի 12-ին, սակայն դատական նիստը հետաձգվել էր՝ պայմանավորված քննիչի կողմից ներկայացված 9 ձայնասկավառակով, որոնց ընդհանուր տևողությունը 23 ժամ է։ Նշված տեսագրություններին Արմեն Աշոտյանը, ինչպես պարզվեց, ՔԿՀ-ում ամբողջությամբ ծանոթանալու հնարավորություն չի ունեցել և այդ հանգամանքով պայմանավորված՝ այսօր ևս միջնորդության քննությունն ընդմիջվեց՝ մինչև ժամը 18.30-ը։

Փաստաբան Տիգրան Աթանեսյանը լրագրողների հետ զրույցում հայտնեց, որ ներկայացված տեսաձայնագրությունները հարցաքննությունների տեսագրություններ են, որտեղ նաև հրապարակվում են ներքին և արտաքին դիտումները։ ՔԿՀ պայմաններում ծանոթացած տեսագրություններում Աշոտյանը հայտնաբերել է լուրջ հակասություններ գրավորի և բանավորի միջև, հետևաբար, անհրաժեշտություն կար դրանք մինչև վերջ դիտելու։ Մասնավորապես, եղել են տվյալներ, որոնք հօգուտ Արմեն Աշոտյանի են, սակայն այդ տվյալները չեն արձանագրվել։ Փաստաբան Բենիկ Գալստյանն էլ արձանագրեց, որ ՔԿ-ն հետաքրքիր իրավական «մանյովրի» է դիմել, որը նախկինում, սովորաբար չի կիրառվել, այդ թվում՝ հնչեղ գործերով։ Մասնավորապես, փաստաբանը հիշեցրեց, որ Արմեն Աշոտյանի նկատմամբ ի սկզբանե որպես խափանման միջոց էր կիրառվել բացակայելու արգելքը, ապա ԱԱԾ-ի կողմից ներկայացվում է գաղտնի գործողություններ՝ ներքին, արտաքին դիտումներ և դրանք մեկնաբանվում է ՔԿ-ի կողմից միակողմանի։ Բենիկ Գալստյանն ընդգծում է, որ ներքին դիտման ձայնագրությունների մեջ որևէ ուղղակի կամ անուղղակի տվյալ չկա, որ Արմեն Աշոտյանն ինչ-որ մեկին ուղղություն է ցույց տվել։ Նրա խոսքով՝ այպես շարունակվելու դեպքում ինքը հրապարակելու է տվյալներն այնքան, որքանով հնարավոր է, ինչը, սակայն, հանցագործության մասին հաղորդում է դառնալու.«Ճանճից փիղ են սարքել»։

Հիշեցնենք, որ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո