Փաստ ինֆո

Հայկական լրահոսը գժանոց է հիշեցնում՝ մի կողմում՝ համակենտրոնացման ճամբարի վերածված, գերմարդկային ճիգերով դիմակայող Արցախն է՝ մեծ ու փոքրով, մյուս կողմում՝ կառավարության մակարդակով աբսուրդային լրատվությունը՝վարչապետի աթոռն զբաղեցնող անձի նոթատետրից՝ յայլաներից, սարվորների վրաններից իրականացրած անմիջական զրույցների համատեքստում։

Մի կողմում՝ «Արաբկիր» ԲԿ տեղափոխված մեկ տարեկան հրեշտականման փոքրիկն է՝ Մոնթեն, որ դժվարությամբ տևական ժամանակ անց ռուս խաղաղապահների ինքնաթիռով հունիսին էր Արցախից տեղափոխվել «Արաբկիր» ԲԿ և արդեն դուրս է գրվել վերակենդանացման բաժանմունքից, այնուհանդերձ, դեռ շարունակելով մնալ հիվանդանոցում, մյուս կողմում՝ ադեկվատությունը բացարձակ կորցրած ՀՀ կառավարությունն է՝ իր ամառային-արձակուրդային հովերով տարված նիստի մասնակիցներով, որոնք ուշի-ուշով լսում են յայլաներում՝ սարվորներին ՝ փաշինյանական անակնկալ հայտնությունների մասին պատմությունները։

Շրջափակման մեջ գտնվող Արցախին երկու տողով՝ հարևանցիորեն անդրադարձից հետո՝ առանց չնչին իսկ ապրումակցման, խաղաղ-իդիլլիկ ժամանակների ՀՀ կառավարությունը՝ ուժայիններով հանդերձ ամբողջովին խրվեց «հրատապ» վարչապետական հանձնարարականներն ընկալել-հասկանալու մեջ, ուր հույժ կարևորվել էր կառավարության նիստի մասնակից «ընտրյալների» անհատական և անակնկալ այցերը՝ յայլաներ, շինհրապարակներ, սարատեղեր ու վարատեղեր։

Նիստի մասնակիցները տեսնես հասկացա՞ն՝ ոչ միայն ՀՀ և միջպետական ճանապարհներին, մինչ յայլաներ հասնելն է ինտերնետ հասանելիությունն անչափ կարևոր, այլև՝ անասնագոմերում է այն ուղղակի անհրաժեշտություն։

Դուք էլ օրուելյան «Անասնաֆերմա»-ն հիշեցնող տեսարան պատկերացրեցիք, չէ՞․․․

Ա․Ե․

Աղբյուր` Փաստինֆո