Փաստ ինֆո

Արցախի խնդիրը ակնհայտ երկրորդվել է Երևանի քաղաքապետի նախընտրական հնարավոր քարոզարշավին, մյուս կողմից, իմ կարծիքով, սա կարող էր մասնակցող ուժերի համար առիթ հանդիսանար՝ խոսելու Արցախում տիրող իրավիճակի մասին։ Սա, պարզապես, Երևան քաղաքի ընտրություն դարձնել, հատկապես, գոյաբանական խնդիրներ ունեցող մեր երկրի համար, չափից դուրս է,- «Փաստինֆո» լրատվականի հետ զրույցում ասում է քաղաքագետ Արա Պողոսյանը` խոսելով Երևան քաղաքում սպասվող քաղաքապետի ընտրություններին ընդառաջ ընթացքող քարոզարշավի մասին։

Բանախոսը նկատում է՝ եթե կլինեն քաղաքական ուժեր, որոնք մասնակցելով քաղաքապետի ընտրություններին, այդ քարոզարշավն ավելի շատ կվերածեն քաղաքական ծրագրի, որն, օրինակ, լուծումներ կառաջարկի նաև Արցախի մասով, կամ, առնվազն, խնդիրներ կբարձրացնի, որոնք կապված են Արցախում ստեղծված ցեղասպանական իրավիճակի հետ, որոնց ուղերձները հասանելի կլինեն միջազգային խաղացողներին, ովքեր այս կամ այն կերպ որոշումներ կայացնող են դարձել, ապա, այս պարագայում, այդ քարոզարշավին քաղաքական ուժերի մասնակցությունը, գուցե, հնարավոր կլինի ռացիոնալ համարել։

«Իհարկե, ընտրողն իրավունք ունի և պետք է իմանա, թե ինչպիսին է լինելու իր քաղաքը, ինչպիսի՞ հեռանկար է սպասվում իրեն այդ քաղաքում առաջիկա տարիներին, սակայն, եթե, ստեղծված գոյաբանական խնդիրների ֆոնին, մենք քաղաքապետի ընտրությունների այս քարոզարշավը դարձնենք սովորական ընտրություններ, երբ մենք, ըստ էության, պատերազմական իրավիճակում ենք, կարելի է ասել, մենք բաց կթողնենք մեր հերթական հնարավորությունն՝ ինչ – որ բան շտկելու, ինչն, այլևս, չափազանց մեծ շռայլություն է լինելու մեզ համար։ Պատերազմական իրավիճակում գտնվող երկրի համար, կենսական նշանակության հարցերը չեն կարող երկրորդվել, պարզապես, ընտրությունների»,- ասում է Արա Պողոսյանը։

Կա խնդիր և այդ խնդիրն, առաջին հերթին, բխում է այն քաղաքական ուժերից, որոնք կամ կմտնեն Հայաստանի քաղաքական դաշտում ձևավորված կոնյուկտուրայի մեջ և այս ընտրություններն իրենց համար կդառնան, պարզապես, քաղաքային իշխանություն վերցնելու կամ ավագանու մաս դառնալու պրոցես, կամ այն կվերաձևակերպվի՝ որպես գլոբալ մարտահրավերներին դիմակայելու քաղաքականություն. «Այս երկու ֆունդամենտալ նշանակության հարցերն են, որոնք, կարծում եմ, առաջիկայում մենք կտեսնենք, բայց այս իրավիճակում՝ հենց հիմա, կենսական խնդիր է, որպեսզի մենք անընդհատ խոսենք և մեզ հասանելի բոլոր հարթակներն օգտագործենք՝ Արցախում Ադրբեջանի կողմից կազմակերպված ցեղասպանությունը կանխելու համար։ Եթե մենք սա չենք անում, ապա, ցավոք սրտի, ոչնչով չենք տարբերովում այն քաղաքական ուժից, որն, այսպես ասած, լվացել է իր ձեռքերն Արցախից»,- ասում է քաղաքագետը։

Ամփոփելով զրույցը` Արա Պողոսյանը հավելում է՝ երբ ռացիոնալ մտածողությունն իր տեղը զիջում է պոպուլիզմին, մնում է, ընդամենը, խոսել քաղաքական օրվա ձևավորված միջավայրի մասին, որի մասնիկ են նաև հենց այդ քաղաքական ուժերը. «Իմ խորին համոզմամբ, ճգնաժամի խորացման մեջ այդ քաղաքական ուժերն ու թեկանածուներն ուղիղ մասնակցություն և պատասխանատվություն ունեն, առաջին հերթին՝ հենց Արցախում տեղի ունեցող զարգացումների, հետո նաև՝ Հայաստանի վերաբերյալ։ Նորմալ քաղաքական համակարգ ունեցող երկրներում մայրաքաղաքի քաղաքապետի ընտրությունները սովորական ՏԻՄ ընտրություններ չեն, որովհետև քաղաքապետի ընտրության արդյունքը պլացդարմ է ապագա քաղաքական առաջնորդության հայտ ներկայացնելու համար։ Իսկ, եթե ստեղծված իրավիճակում, քաղաքապետի ընտրությունները մեզ համար զուտ տրանսպորտի խնդիր լուծելն է դառնում, ապա սա, որպես քաղաքական մտքի դեգրադացիա կարելի է որակել, որն ուղիղ արտացոլում ունի մեր օրվա իրողությունների և զարգացումների վրա»։

Աղբյուր` Փաստինֆո