Փաստ ինֆո

Վերջին տարիներին Հայաստանից հանգստի մեկնող մեր հայրենակիցնյերի ամենանախընտրելի ուղղությունները Կիպրոսը, Եգիպտոսն ու ԱՄԷ-ն են, իսկ Թուրքիայի հանդեպ հետաքրքրություն այլեւս չկա: Այս մասին «Փաստինֆո»-ին հայտնեցին Հայաստանի տուրիստական ընկերությունների ներկայացուցիչները։

«Եթե համեմատություն տանենք այս և նախորդ տարվա ուղղությունների նախընտրությունների միջև, ապա շատ մեծ փոփոխություններ չեն եղել։ Պատկերավոր ասած՝ Հայաստանից հանգստի մեկնող մեզ դիմած քաղաքացիների մոտ 60 տոկոսը մեկնում է հենց Կիպրոս»,- ասաց արտագնա տուրիզմով զբաղվող Sunny Tour ընկերության աշխատակիցը՝ հայտնելով, որ ուղղության նախընտրությունը պայմանավորված է առաջարկվող ծառայությունների ֆոնին գնային սանդղակի մատչելիությամբ։

Նրա խոսքով, օրինակ, դեպի Կիպրոս մեկշաբաթյա փաթեթները, մեկ անձի համար սկսում են միջինում 700 եվրոյից՝ կախված մատուցվող ծառայություններից։

Տուրիստական մեկ այլ ընկերության ներկայացուցիչը նույնպես «Փաստինֆո»-ին հայտնեց մեր հայրենակիցների կողմից նախընտրելի նույն ուղղությունները։

Նրա խոսքով՝ այս ֆոնին, ամառային այս տարվա սեզոնին, առանձնահատուկ աճ է գրանցվել հատկապես Եգիպտոսի պահանջարկը։
Այս համատեքստում, հատկանշական է, որ տուրիստական երկու ընկերություններն էլ ծառայություններ չեն իրականացնում դեպի Թուրքիա։
«Սա տուրիստական ընկերությունների միասնական որոշում չէ, պարզապես յուրաքանչյուր ընկերություն ինքը որոշում է իր մոտեցումը։

Մենք երբևէ չենք ունեցել այդ երկրի ուղղությունը։ Միևնույն ժամանակ մեզ դիմող քաղաքացիները նույնպես հիմնականում չեն հետաքրքրվում այդ երկրով»,- հայտնեց Great Tours տուրիստական ընկերության աշխատակիցը։

Ընկերությունից նաև հայտնեցին, որ վերջին 5 տարիներին Հայաստանից հանգստի մեկնողների թիվն աճել է մոտ 40 տոկոսով։ Նախընտրում են հիմնականում հարավային տաք երկրները։

Աղբյուր` Փաստինֆո