Փաստ ինֆո

Ես առանձնապես ասելիք չունեմ, որովհետև դատաքննության ողջ ընթացքը, իմ կարծիքով, ցույց տվեց, որ Սերգո Կարապետյանը ճիշտ որոշում է կայացրել։ Եթե նա այդպիսի որոշում չկայացներ, ապա պատասխանատվութուն կկրեր այն ժամանակ, ոչ թե՝ հիմա։ Այս մասին դատարանում ցուցմունք տալիս հայտարարեց ՀՀ երրորդ նախագահ Սերժ Սարգսյանը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, մեկնարկել է ՀՀ երրորդ նախագահ Սերժ Սարգսյանի, «Ֆլեշ» ՍՊԸ տնօրեն Բարսեղ Բեգլարյանի՝ «Ֆլեշի Բարսեղի». Գևորգ Հարությունյանի գործով դատական նիստը։

Նշենք, որ նախորդ նիստերի ընթացքում ցուցմունք են տվել Գևորգ Հարությունյանը և Բարսեղ Բեգլարյանը։ Այսօրվա նիստին ցուցմունք տվեց Սերժ Սարգսյանը։ Նրա դիտարկմամբ՝ դատաքննությունը ցույց տվեց, որ Սերգո Կարապետյանը ճիշտ որոշում է կայացրել։
«Շատ պարզ բան է տեղի ունեցել ։ Այդ ծրագիրը կարող էին իրականացնել երկու ընկերություններ և նա այդ ընկերություններից ընտրել է այն ընկերությանը, որն ավելի ցածր գին է առաջարկել։ Ես անկեղծ ասած ուրախ չեմ պաշտպանելու այն մարդուն, ով զրպարտել է ինձ, բայց իրականությւոնը դա էր։ Կարծում եմ՝ բոլորի համար պարզ է դարձել, թե ինչու Սերգո Կարապետյանը մի քանի հարցաքննություններից հետո որոշել է այդպիսի ցուցմունք տալ։ Այդքան բան»,- ցուցմունքում ասաց Սերժ Սարգսյանը։

Ինչ վերաբերում է իր և Բարսեղ Բեգլարյանի հարաբերությունների վերաբերյալ դատախազի հարցադրմանը, Սերժ Սարգսյանը նշեց, որ կարծում է՝ հարցը հռետորական է, քանի որ նախաքննության ընթացքում ինքը հայտնել էր, որ Բարսեղ Բեգլարյանին ճանաչում է 1971թ.-ից, այդ ժամանակվանից սկսած իրենք ընկերներ են։ Դատախազ Էդգար Արսեյանն էլ արձանագրեց՝ հարցը հռետորական չէր, նախաքննության ընթացքում ցուցմունքները որպես ապացույց դատական քննության ընթացքում չեն հետազոտվել, պարտավոր են պարզել այն հանգամանքները, որը մեղադրող կողմի կարծիքով կարևոր նշանակություն ունի։ Սերգո Կարապետյանի հետ Սերժ Սարգսյանն ունեցել է աշխատանքային հարաբերություններ, թշնամական կամ ոչ բարյացկամ հարաբերություններ էլ չեն ունեցել։
«Ես Սերգո Կարապետյանին շատ հստակ ասել եմ, որ ծրագրի իրականացումը պետք է լինի ժամանակին և որակով, ուրիշ որևէ ցուցում ես նրան չեմ տվել»,- ասաց Սերժ Սարգսյանը։ Հարցին՝ արդյո՞ք Սերգո Կարապետյանը հայտնել է, որ նաև «Ֆլեշ» ՍՊԸ-ն է ցանկություն հայտնել դիզվառելիքի տրամադրման ծրագրին մասնակցելու համար, Սարգսյանը նշեց՝ «Ոչ, նա ինձ ասել է հետևյալը՝ ում վստահել ծրագրի իրականացումը։ Նրան նույնն եմ ասել՝ ծրագիրը պետք է իրականացնի ժամանակին և որակով»
Ընկերությունների կողմից առաջարկվող գների հարցի շուրջ քննարկումներ չեն եղել։

«Դուք Ձեր խոսքում դիրքորոշումը հայտնեցիք Սերգո Կարապետյանի կողմից Ձեզ զրպարտելու վերաբերյալ, նշեցիք, որ բոլորին պարզ է։ Եթե հարկ համարեք, պարզաբանեք, թե ինչով է պայմանավորված «բոլորին է պարզ» արտահայտությունը՝ հաշվի առնելով, որ Սերգո Կարապետյանն իր ցուցմունքներով ասել է, որ երբ Ձեզ զեկուցել է, ասել եք՝ «տվեք, թող Բարսեղն անի»։ Խնդրում եմ պարզաբանեք՝ որևէ տեղեկություն ունեիք, թե դա Ձեր ենթադրությունն էր, կարծիքըչ»,- ասաց դատախազ Արսենյանը, ինչին արձագանքելով Սերժ Սարգսյանը նշեց, որ դա ենթադրություն չէ, դա դատական քննության ընթացքն է, որ այն ընկերությունները, որոնք մրցույթին մասնակցելու ցանկություն էին հայտնել, այս ամբիոնից հայտնում են, որ ի վիճակի չեն երկու ամսում 17.000 տոննա դիզվառելիք ներկրել ՀՀ ու վերաբաշխել ամբողջ ՀՀ-ով մեկ.«Որևէ մեկն այստեղ հարցաքննվածներից, չի ասել, որ ինքն ի վիճակի էր դա անելու»։
Ապցացույցների հետազոտման փուլն ավարտվեց։ Դատական նիստը հետաձգվեց՝ մինչև օգոստոսի 24-ը, ժամը՝ 14.00-ն։

Հիշեցնենք, որ քրեական գործով կա 3 մեղադրյալ։ Սերժ Սարգսյանից բացի մեղադրանքներ են առաջադրվել նաեւ փոխնախարար Սամվել Գալստյանին, գործարար Բարսեղ Բեգլարյանին։ Ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Հեղինակ՝ Իզաբել Սահակյան

Աղբյուր` Փաստինֆո