Փաստ ինֆո

ԱՄՆ փոխնախագահի պաշտոնում աշխատելու տարիներին Ջո Բայդենի ընտանիքը միլիոնավոր դոլարների արտասահմանյան ֆինանսավորում է ստացել ՌԴ-ի, Ղազախստանի եւ Ուկրաինայի «օլիգարխներից», այդ թվում՝ ռուսաստանցի գործարար Ելենա Բատուրինայից: Այդ մասին ասված է բանկային փաստաթղթերի մասին հուշագրում, որը չորեքշաբթի հրապարակել է ԱՄՆ Ներկայացուցիչների պալատի վերահսկողության եւ հաշվետվողականության հանձնաժողովի նախագահ Ջեյմս Կոմերը:

«Հուշագիրը պատմում է այն մասին, թե ինչպես են Բայդենները և նրանց գործարար գործընկերները միլիոններ ստացել Ռուսաստանի, Ղազախստանի և Ուկրաինայի օլիգարխներից Ջո Բայդենի փոխնախագահության ժամանակ»,-հետևում է կոնգրեսականի կայքում հրապարակված փաստաթղթից: Դրանում նաև մեջբերվում է նախկին բիզնես գործընկեր Հանթեր Բայդենի և այժմ Կոնգրեսի իրազեկիչ Դևոն Արչերի վերջերս արած հայտարարությունը, որ նախկին փոխնախագահն օգտագործել է իր դիրքը որպես «ապրանքանիշ»՝ անհրաժեշտության դեպքում «ազդանշաններ» ուղղելով իր լիազորությունների և ազդեցության մասին՝ ի շահ ընտանիքի հարստացման:

«Ջո Բայդենի փոխնախագահության ժամանակաշրջանում Հանթեր Բայդենը նրան վաճառում էր որպես «բրենդ»՝ ՌԴ-ում, Ղազախստանում և Ուկրաինայում օլիգարխներից միլիոններ ստանալու համար․․․ Պարզ է, որ Ջո Բայդենը գիտեր իր որդու գործնական հարաբերությունների մասին և իրեն թույլ էր տալիս լինել «բրենդ», որն օգտագործվում էր Բայդենի ընտանիքը հարստացնելու համար, երբ նա ԱՄՆ փոխնախագահն էր»,-այս առիթով ասել է Քոմերը։

Փաստաթղթին կցվում է կարճ հատված, որտեղ նկարագրվում է ֆինանսավորումը, որը ենթադրաբար ստացվել է Բայդենների ընտանիքի կողմից արտասահմանյան աղբյուրներից: Ինչպես պնդում է Քոմերը, այսօրվա դրությամբ նրա գլխավորած կոմիտեն հայտնաբերել է Բայդենի ընտանիքի և նրանց բիզնես գործընկերների շահերից բխող ավելի քան 20 միլիոն դոլարի նման վճարումներ:

Ի թիվս այլ բաների, ցանկում հիշատակվում է այն մասին, թե ինչպես է ռուս գործարար Ելենա Բատուրինան իբր 3,5 միլիոն դոլար փոխանցել Բայդեն կրտսերի և Դևոն Արչերի հետ կապված կեղծ ընկերությանը։ «Ռուս միլիարդատեր Բատուրինան 3,5 միլիոն դոլար է փոխանցել Rosemount Seneca Thornton կեղծ ընկերությանը։ Մոտ 1 միլիոնը փոխանցվել է Դեվոն Արչերին, իսկ մնացած մասը փոխանցվել է Rosemont Seneca Bohai-ի նոր հաշվի սկզբնական ֆինանսավորման համար, որը Արչերը և Հանթեր Բայդենը օգտագործել են այլ արտասահմանյան փոխանցումներ ստանալու համար», - ասվում է փաստաթղթում:

Ներկայացուցիչների պալատի վերահսկիչ կոմիտեն ավելի վաղ հայտարարել էր, որ Հանթեր Բայդենը առնվազն մեկ տասնյակ անգամ հոր՝ ԱՄՆ ներկայիս նախագահ Ջո Բայդենի հեռախոսով կապ է հաստատել իր արտասահմանյան գործընկերների, այդ թվում՝ ուկրաինական Burisma էներգետիկ ընկերության թոփ-մենեջերների հետ: Սպիտակ տանն այս կապակցությամբ ցանկացած մեղադրանք հերքում են և մշտապես ընդգծում, որ Բայդեն ավագը երբեք կապ չի ունեցել իր որդու բիզնեսի հետ:

Աղբյուր` Փաստինֆո