Փաստ ինֆո

Հադրութի Թաղասեռ գյուղից տեղահանված Անուշն ամուսնու ու վեց երեխաների հետ այժմ Ստեփանակերտում է ապրում։ Ադրբեջանական պաշարման հետևանքով Արցախում ստեղծված հումանիտար ճգնաժամն անտանելի պայմաններ է ստեղծել հատկապես նման բազմազավակ ընտանիքների համար։

«Վեց երեխա են, որոնք կարիք ունեն նորմալ սննդի, բայց քաղաքում բացի կարտոֆիլից ու  մեկ-մեկ հանդիպող լոլիկից, ուրիշ բան չկա։ Կաթնամթերքի, ձվի մասին վաղուց մոռացել ենք։ Ահագին ժամանակ է՝ մի հատ ձու չեմ գտնում թեկուզ 300 դրամով։ Չկա։ Առավոտյան գնացել էի, որ մի բանկա մածուն առնեմ։ Որ տեսա, թե ուր է հասնում հերթը, հետ եկա, անիմաստ էր գնալս։ Եթե ուզում ես մի բանկա մածուն առնել, պետք է առավոտյան 5-ին գնաս, հերթ կանգնես։ Մնացած ժամերին 150-200 հոգանոց հերթեր են լինում»,-«Փաստինֆո»-ին պատմում է բռնազավթված Թաղասերից տեղահանված, Ստեփանակերտում վերաբնակված Անուշ Անդլեյանը։

Անուշի խնդիրներն այսքանով չեն սահմանափակվում․ երեխաներից մեկն առողջական լուրջ խնդիր ունի․ բժիշկները քաղցկեղ են հայտնաբերել, իսկ բուժումները պարտադիր Երևանում պետք է արվեն։ Վերջին անագմ նոյեմբերին էին երեխային ստուգման բերել, հիմա նորից պետք է բերեն, բայց տարբերակ չկա։

«Ինչ ճանապարհը փակել են ադրբեջանցիները, չենք կարողանում գալ։ Կարմիր խաչով էլ միայն խնամակալը կարող է գալ։ Այդպես էլ հնարավոր չի, քանի որ հինգ երեխաներիս ոչ մեկի մոտ չեմ կարող թողնել․ ամուսինս աշխատում է, ուրիշի մոտ էլ այս իրավիճակում, եբ ուտելու ոչինչ չկա, հեշտ չի թողնելը»,-ասում է Անուշը։

Ամենադժվարը հիմա առողջական խնդիր ունեցող 9-ամյա երեխայի վիճակն է։ Մայրն ասում է՝ երեխան ամբողջ օրը լացում ու  կոնֆետ է ուզում։ Կալորիական ոչինչ չկա, որով հնարավոր է շեղել նրան։

«Այսօր առավոտյան գնացել, ամբողջ շուկան պտտվել եմ, մենակ լոլիկ եմ գտել, ուրիշ բան չկար։ Երեխաներն էլ ամբողջ օրը հերթերում են․ մեկը հարցի հերթում, մյուսը՝ բանկոմատի մոտ․․․ Չգիտես՝ ոնց անես, որ յոլա գնաս։ Սա էլ, իբր, կյանք է կոչվում․․,-ասում է տիկին Անուշն ու ավելացնում։- Մենք՝ մեծերս, դիմանում ենք, դիմանալու էլ ենք, բայց էս երեխեքը մեղք են, սովամահ են լինում։ Ոչ ձեթ կա, ոչ աղ , ոչ շաքարավազ․․ անյուղ, անալի կարտոֆիլ ուտելով ինչքա՞ն կարելի է ապրել։ Սրանից էն կողմ էլ չի լինի, ճանապարհը պետք է ինչ-որ մի ձևով բացվի, որ կարողանանք էստեղ ապրել»։

Աղբյուր` Փաստինֆո