Փաստ ինֆո

Մարդիկ Հայրենիքի համար իրենց կյանքն են տալիս, իսկ հիմա՝ ստեղծված իրավիճակում, հարկավոր է հարցադրումները ճիշտ կատարել՝ արդյո՞ք Նիկոլ Փաշինյանը ցանկանո՞ւմ է հանուն իր Հայրենիքի, հանուն իր երկրի ինչ – որ քայլ կատարել, էլ չեմ խոսում՝ կյանքը զոհաբերելու մասին։ Լավ, քանի անգամ կարելի է  2020 թ. նոյեմբերի  9-ից հետո` առ այսօր, ասել՝ անհրաժեշտ է, որպեսզի այդ մարդն ու իր թիմը գիտակցված կերպով և ինքնակամ հրաժարական ներկայացնեն ու հեռանան իշխանության ղեկից,- «Փաստինֆո» լրատվականի հետ զրույցում ասում է քաղաքագետ Թևան Պողոսյանն` անդրադառնալով Վարդան Օսկանյանի դիտարկմանը, որ մեզ մոտալուտ նոր պատերազմ է սպառնում։ 

Հիշեցնենք՝ այսօր ՀՀ նախկին արտաքին գործերի նախարար Վարդան Օսկանյանը հերթական ելույթն է ունեցել, որտեղ, վերլուծելով առկա իրավիճակը, նախազգուշացրել է նոր` հնարավոր պատերազմի մասին. «Պրահայի հայտարարությունը մեծ ավերներ է գործում։ Այսօր Լաչինի միջանցքի շրջափակումը, Արցախի մեր հայրենակիցների՝ սովամահության եզրին լինելու հանգամանքը շատ բանով պայմանավորված է հենց այդ հայտարարությամբ։ Փաշինյանին կոչ եմ անում հետ կանգնել այդ հայտարարությունից»,- իր խոսքում, մասնավորապես, նշել է նախկին արտգործնախարարը։

Թևան Պողոսյանը հարցադրում է կատարում՝ ինչո՞ւ Փաշինյանը որևէ քայլ չի ձեռնարկում սովամահության և ցեղասպանության մեջ հայտնված արցախցիների և Արցախի ճակատագիրը փոխելու համար և ինքն էլ պատասխանում՝ որովհետև նա այլ շահեր ունի. «Այդ շահն իշխանություն պահելն է, հայկական ազգային արժեքների պահպանությամբ բացարձակ չմտահոգվելը, ի վերջո, նա արտաքին այլ ուժերի  առաջ քաշած օրակարգի սպասարկուն է՝ կլինի դա Արևմուտք, թե՞ թուրք – ադրբեջանական տանդեմ, արդեն կարևոր էլ չէ։ Կարևորն, այլևս, այն է, որ Փաշինյանն անթաքույց և առանց որևէ կասկածների, բացարձակ մտադրություն չունի պահպանելու և առաջ տանելու հայկական շահը»,- ասում է քաղաքագետը։

Մինչդեռ, նույն Փաշինյանը  2021 թ. ժողովրդին խոստանում էր Հադրութի և Շուշիի դեօկուպացիա, Արցախի ճանաչում, ռազմագերիների վերադարձ և այլն, հիշեցնում է քաղաքագետն ու հավելում ՝ իսկ ի՞նչ է ասում Փաշինյանի սիրելի ժողովրդավարությունը՝ երբ ժողովրդին որևէ բան ես խոստանում, անհրաժեշտ է կատարել դրանք, այնինչ, Փաշինյանն իր իսկ կողմից շռայլած խոստումներն, անգամ,  չի կատարում, ուրեմն՝ ի՞նչ ենք մենք, այլևս, սպասում նրանից։

Փաշինյանը չի հեռանում, միտք էլ չունի հեռանալու, մնում է մի հարց՝ հայ ազգն ուզո՞ւմ է Հայրենիք ունենալ, թե՞ ոչ և խնդիրն  Արցախը չէ, այլ հենց Հայաստանը, ասում է քաղաքագետը. «Եթե այս ժողովուրդը ուզում է, գոնե, Հայաստան ունենալ, ապա պետք է հասկանա՝ եթե նա կորցնի Արցախը, ապա շրջելու է Հայոց պետականության վերջին էջը։ Սա է պետք հասկանալ, որ Հայաստանը պահելու համար, պետք է կարողանալ Արցախը պահել և վերջ։ Իսկ դրա համար անհրաժեշտ է, որպեսզի հայ ազգն արթնանա ու իր ձայնն ասի։ Այսօրվա դրությամբ, տարբեր գործընթացներ են տեղի ունենում՝ մարդիկ բողոքի ձայն են բարձրացնում, Հայաքվե է ընթանում, պարոն Վարդան  Օսկանյանն իր տեսլականն է հանրայնացնում, տարատեսակ այլ այլընտրանքներ են առաջարկվում։ Պետք է, որպեսզի մարդիկ, ի վերջո, արթնանա այս խորը թմբիրից, որի մեջ են հայտնվել, արդեն, մի քանի տարի և վճռական կերպով ասեն իրենց խոսքը»,- ամփոփելով զրույցն ասում է Թևան Պողոսյանը։

Աղբյուր` Փաստինֆո