Փաստ ինֆո

Արցախի Խորհրդարանը միշտ էլ աշխատել է իր ձայնը լսելի դարձնել դրսում՝ միջազգային կառույցներին, դերակատարներին՝ անկախ նրանից, թե ով է եղել ԱԺ նախագահը։ Հիմա, հաշվի առնլեով Արցախում ստեղծված ծանր վիճակը, պետք է կրկնապատկենք, եռապակենք մեր ջանքերը։ Դավիթ Իշխանյանի առաջադրումն ու ընտրությունն ԱԺ նախագահի պաշտոնում լրացուցիչ ազդակ կլինի դրա համար։ Այդ մասին «Փաստինֆո»-ի հետ զրույցում ասաց Արցախի ԱԺ ՀՅԴ խմբակցության ղեկավար Արթուր Մոսիյանը։

«Արթուր Թովմասյանը հրաժարական էր տվել առողջական խնդիրների պատճառով, իսկ իշխող խմբակցությունն էլ, հաշվի առնելով ծանր վիճակը, որում այսօր գտնվում է Արցախը, առաջադրեց Դավիթ Իշխանյանի թեկնածությունը։ Իհարկե, ՀՅԴ-ն միշտ ու ամենուր առաջ է տարել Արցախի ու համահայկական շահերը ու այնպես չէ, թե Իշխանյանի՝ ԱԺ նախագահ նշանակվելուց հետո է անցնելու ակտիվ աշխատանքի։ Հիմա էլ Սփյուռքի տարբեր օջախներում նրանք աշխատում են, փորձում են Արցախին օգնել՝ ինչով կարող են։ Բայց, իհարկե, այս նշանակումը նաև լրացուցիչ աղդակ է հաղորդելու՝ Արցախի ձայնը միջազգային հարթակներում է՛լ ավելի լսելի դարձնելուն»,-շեշտեց Մոսիյանը։

Արցախի հանրապետության նախագահ Արայիկ Հարությունյանի երեկ՝ Արցախի հանրային հեռուստատեսությանը տված հարցազրույցից Մոսիյանն ակնկալում էր առնվազն լսել իրավիճակի հստակ գնահատականներ և ՀՀ իշխանություններին ուղղված կոնկրետ պահանջներ։

«Կարծում էի, որ նախագահն իրերն իրենց անուններով կկոչի և ՀՀ իշխանություներին կտրուկ պահանջ կներկայացնի, բայց, ցավոք, դարձյալ չհնչեց ոչ մի կտրուկ, հստակ խոսք՝ ուղղած այս ամենի պատճառը հանդիսացած ՀՀ ղեկավարին։ Ինչ-որ բան ասվեց, բայց դա քիչ էր։ Որպես երկրի ղեկավար՝ պետք է պահանջեր, որ առհասարակ ոչ մի քայլ չարվի՝ ի վնաս ու ի հակառակ Արցախի ինքնորոշման իրավունքի իրացման։ Ընդամենը կոչ արվեց զերծ մնալ նման հայտարարություններից՝ հաշվի չառնելով, որ հիմա նաև գործըթնացներ են գնում և Փաշինյանի հայտարարությունները գործընթացի մի մասն են կազմում»,-ընդգծեց Արցախի ԱԺ պատգամավոր Արթուր Մոսիյան և հավելեց՝ Արցախի ղեկավարը շատ ավելի համարձակ ու հեռատես պետք է գործի՝ հավի առնելով ստեղծված լրջագույն վիճակը։

Աղբյուր` Փաստինֆո