Փաստ ինֆո

Անձամբ ես որևէ ակնկալիք չեմ ունեցել, որ Արայիկ Հարությունյանն իր հայտարարած «բացառիկ» հարցազրույցի ընթացքում որևէ արտառոց կամ սենսացիոն բան է ասելու, որի մասին մենք դեռևս չգիտենք կամ նոր պետք է իմանանք, որովհետև սա նրա առաջին հարցազրույցը կամ նմանօրինակ ուղերձը չէր, որով նա նախ՝ անոնսավորում, հետո հիասթափեցնում է ժողովրդին և շահագրգիռ քաղաքական ուժերին, որոնք նրանից որևէ բան են սպասում։ Հետևաբար, այդ հարցազրույցով Արցախում որևէ բեկում չմտավ, ստեղծված իրավիճակից դուրս գալու համար տակտիկական կամ ստրատեգիական քայլեր չնշվեցին։ Այ, եթե նա երեկ տված իր այդ զրույցի ընթացքում հայտարարեր, որ, այո, ինքը 2018-ին աջակցել է Թավշա հեղափոխության իրականացմանը և դրանից հետո, նույնպես, համագործակցել է հայաստանյան իշխանությունների հետ, սակայն այսօր ափսոսում է իր կատարած այդ քայլերի համար, ապա այդ ժամանակ, միգուցե, այդ զրույցն ինձ համար ինչ – որ առումով հիշարժան դառնար,- «Փաստինֆո» -ի հետ զրույցում, ասում է Արցախի ընդդիմադիր «Արդարություն» կուսակցության համահիմնադիր Հակոբ Հակոբյանը` անդրադառնալով ԱՀ նախագահի երեկվա հարցազրույցին։

Բանախոսը նկատում է՝ բնական է, որ երկրի նախագահը որևէ սենսացիոն լուր չպետք է հայտնի, որովհետև իշխանությունները երկիրը սենսացիաներով չէ, որ պետք է ղեկավարեն, սակայն, երեկ մեկ անգամ ևս ընդգծվեց, որ Արցախի իշխանություններն ի զորու չեն երկիրը ռազմավարական ուղով տանելու և տարբեր իրավիճակներից դուրս հանելու համար։ Արդյունքում, ունենք այն, ինչ ունենք, որից այլևս պետք չէ զարմանալ, նշում է պարոն Հակոբյանը։

Հարցին՝ ինչո՞վ է պայմանավորված Արայիկ Հարությունյանի դրսևորած այսօրինակ անպատասխանատու և հեղհեղուկ վարքն,այն պարագայում, երբ Արցախում իրավիճակը, մեղմ ասած, հուսադրող չէ, Հակոբ Հակոբյանը պատասխանում է՝ Արցախի իշխանությոնները սպառել են իրենց. «Թե ի՞նչ հանգամաներում կամ ինչպե՞ս է դա տեղի ունեցել, սա զրույցի այլ թեմա է, սակայն, փաստացի, նրանք հայտնվել են մի իրավիճակում, որտեղ չգիտեն՝ ի՞նչն, ինչպե՞ս և ե՞րբ պետք է անել։ Արայիկ Հարությունյանի պահվածքը նման է դասը չսովորած աշակերտի վարքագծի, որից ածանցվում են մնացյալ բոլոր խնդիրներն, ասում է բանախոսը։

Լրագրողի ճշտող հարցին՝ Արցախի իշխանությունները չգիտե՞ն, թե՞, այնուամենայնիվ, չեն ցանկանում գործուն քայլեր ձեռնարկեն՝ երկիրը ստեղծված իրավիճակից փրկելու և պետականությունը չկորցնելու համար, Հակոբ Հակոբյանը պատասխանում է՝ կուզենար հնարավորություն ունենար ավելի լավը մտածելու արցախյան օրվա իշխանությունների մասին, սակայն, փաստ է, որ օրվա իշխանություններն ի զորու չեն կառավարել երկիրը, այն էլ՝ նման ծանր իրավիճակներում. «Պարտադիր չէ, որ երկիրը հայտնվի շրջափակման մեջ, որպեսզի իշխանությունները կարողանան ճիշտ ելքեր գտնեն։ Շատ երկրներում ճգնաժամը վրա է հասնում բնական աղետների համաճարակների կամ այլ չնախատեսված հանգամանքներում։ Ինչ խնդրի առաջ էլ, որ հայտնվեն երկիրը գործող իշխանությունները, նրանք պետք է կարողանան իրենց մտածված և ռազմավարական ճիշտ նախատեսված քայլերով դուրս բերեն երկիրը ստեղծված իրավիճակից։ Այն, ինչ այսօր կատարվում է Արցախում այս իշխանությանը դրել է անելանելի մի իրավիճակում, երբ նրանք չգիտեն, չեն կողմնորոշվում կամ չեն ցանկանում արդյունավետ լուծման ճանապարհներ գտնեն։ Սա է իրողությունը»,- ասում է բանախոսը։

Հարցին՝ ինչպե՞ս է պատահում, որ Արցախի Հանրապետության նախագահ Արայիկ Հարությունյանի ստորագրած հրամանագրով Արցախի նախագահին կից Հակաճգնաժամային խորհրդի նախագահ նշանակված Տիգրան Պետրոսյանը էլեկտրոնային հարթակներում երկխոսությունների մեջ է մտնում Ադրբեջանի ներկայացուցիչների հետ և նրանց հետ քննարկում ինտեգրման հնարավոր տարբերակներ և ուղիներ, Հակոբ Հակոբյանը պատասխանում է՝ մեկ անգամ չէ, որ ահազանգել են՝ այդ և նմանօրինակ հանձանաժողովների և խորհուրդների ստեղծումն, անմիջականորեն, նպաստում է պետության կազմաքանդմանը և, որ դրանք պետք է ոչ միայն լուծարել, այլ նաև երբեք չանդրադառնալ կառավարման նման մոդելի.«Երկրները քանդվում են նման հանձնաժողովների ստեղծմամբ, այլ ոչ նրա համար, որ, ասենք, ընդդիմությունը պահանջում է երկրի ղեկավարի հրաժարականը։ Շատ տարօրինակ է, որ այս իշխանությունները չեն պատկերացնում՝ ստեղծելով նմանօրինակ տարատեսակ և կասկածելի կառույցներ, իրենց թվում է, թե պատասխանատվության բեռն իրենց ուսերից գցում են, սակայն, իրականում, նորից եմ կրկնում, սա ուղիղ ճանապարհ է պետությունը քանդելու, ինչին էլ մենք, ահա, ականատես ենք լինում վերոհիշյալ երկխոսություններին մասնակցող մարդկանց և նրանց դրսևորած վարքագծի արդյունքում»։

Ամփոփելով զրույցը Հակոբ Հակոբյանը նկատում է՝ Արցախում ստեղծվել է այնպիսի անելանելի մի իրավիճակ, որի պարագայում ամենատրամաբանական ելքը պետք է լիներ երկրի ղեկավարի հրաժարականն ու հեռացումը պաշտոնից։ Արցախի հանրապետության պետականության պահպանման միակ գրավականը ուժեղ իշխանություն ունենալն է։ Ակնհայտ է, սակայն, որ Արայիկ Հարությունյանը չի համապատասխանում այդ տեսլականին։ Հետևաբար, եթե իշխանությունը տեսնում է, որ ինքը չի կարողանում հաղթահարել իրեն նետված մարտահրավերները, ապա, ըստ բանախոսի հավաստման, նա պետք է հեռանա։

Մտածո՞ւմ է արդյո՞ք Արայիկ Հարությունյանը հեռանալու մասին, թե՞ ոչ՝ Հակոբ Հակոբյանը չգիտի, չի կարող ասել, փաստ է սակայն, որ նա դեռևս շարունակում է ղեկավարել, իսկ երկիրը գտնվում է այնպիսի իրավիճակում, որն, այլևս որևէ բանական մեկնաբանություններով նկարագրելն, ուղղակի, անհնարին է դառնում։

Աղբյուր` Փաստինֆո