Փաստ ինֆո

Վերջերս Երևանում տեղի է ունեցել արցախյան պատերազմից տուժած երեխաների մասին պատմող «ԱՍՔ ԿԱՊՈՒՅՏ ԵՐԿՆՔԻ» (The Tales of The Blue Sky) վավերագրական ֆիլմի պրեմիերան։ Այս մասին տեղեկացնում է «Թաթոյան» հիմնադրամի պաշտոնական էջը։ Ֆիլմում Վրույր Թադևոսյանը ներկայացնում է արցախյան 44-օրյա պատերազմին ականատես երեխաների ապրումները, պատերազմի ու խաղաղության մասին նրանց պատկերացումները, գյուղական կենցաղն ու առօրյան։

Ցուցադրությանը հրավիրված է եղել նաև Արման Թաթոյանը, որը ներկաներին հղել է իր խոսքը.«Ֆիլմը մեզ տեղափոխում է դեպի 44-օրյա պատերազմի սարսափելի օրեր, հիշողություններ: Ցավոք, պետք է փաստեմ, որ պատերազմն ավարտված չէ, այն դեռ շարունակվում է, պարզապես բնույթն է փոխվել. թշնամու կողմից այն իրականացվում է այլ քայլերով:

Արցախում այս պահին պայքար է հանուն ինքնության եւ խաղաղության: 30 000 երեխա շուրջ 8 ամիս պայքարում է իր խաղաղ և անհոգ մանկության համար՝ չունենալով անգամ տարրական միջոցներ՝ իրենց մանկությունը վայելելու համար: Ցանկացած երեխա պետք է ունենա անհոգ մանկություն, որից, ցավոք, այս պահին զրկված են Արցախի երխաները:

Մի բան հստակ է, գիտակցել, որ պատերազմն ավարտված չէ, պետք է չհանձնվել և պայքարել հանուն խաղաղության, հանուն արժանապատիվ եւ անվտանգ ապրելու համար»,- ասվում է «Թաթոյան» հիմնադրամի տարածած հաղորդագրության մեջ։

Աղբյուր` Փաստինֆո