Փաստ ինֆո

Հայաստանի սահմանապահ հերթական գյուղում բնակիչները կանգնած են ջրի խնդրի առջև։ Սեպտեմբերի 11-ին կլրանա մի տարին, ինչ գյուղում խմելու ջուր առհասարակ չկա։ «Փաստինֆո»-ի հետ զրույցում ասաց համայնքի ղեկավար Խաչատուր Բաղդասարյանը։

«Նախկինում, մեր խմելու ջուրը, որ գալիս էր, այսօր նրանց (ադրբեջանական կողմի – խմբ.) վերահսկողության տակ է, ու չեն թողնում, որ ջուրը հասնի մեզ։ Գետի ջրից, ժամանակավորապես տեխնիկական ջուր ենք բերել տները, իսկ աղբյուրի ջուր չունենք»,- պատմեց նա։

Բաղդասարյանն ասաց, որ խնդրի մասին բարձրաձայնել են, անգամ այդ խնդրի լուծման նախագիծ են ներկայացրել։ Ֆինանսավորում, սակայն, մինչև օրս չի իրականացվում՝ գյուղում ջրագծերի վերականգնման ուղղությամբ։

«Սահմանին ապրելն արդեն իսկ բարդ է։ Հիմա էլ էս խնդիրը։ Աղբյուրներից բաչոկներով ջուրը բերում ենք, տանը ճաշ եկելու համար։ Հագուստներն ու սպասքը լվանալու համար էլ այդ տեխնիկական ջուրն են օգտագործում, մինչև տեսնենք՝ խնդիրը երբ է լուծվելու»,- ասաց նա։

Գյուղում լուրջ միջադեպեր, այս ընթացքում, թեև չեն գրանցվել, սահմանին, սակայն, դիրքային կրակոցները շարունակվում են։ Այս պայմաններում անգամ, Ներքին Հանդի համայնքապետի խոսքով, գյուղացիներն իրենց ապրուստը վաստակում են սեփական քրտնաջան աշխատանքի արդյունքում։

«Մի ձևով ապրում են էլի։ Բա ի՞նչ անեն, իրենց հողը, տունը թողնեն գնա՞ն։ Ոչ մի տեղից ոչ մի միջոց չեն տալիս։ Մեկն աշխատում է, մյուսը՝ իր տնամերձով է ապրուստը վաստակում։ Ամեն մեկն իր ձևով շարունակում է ապրել ու պայքարել։ Բոլորն էլ խնդիրներ ունեն։ Այնպես չէ, որ շատ լավ են ապրում»,- ասաց նա։

Աղբյուր` Փաստինֆո