Փաստ ինֆո

Նիկոլ Փախինյանի գործողություններից պետք չէ որևէ լուրջ ակնկալիք ունենալ, որովհետև նրա ծրագիրը մեր երկրի վերջնական ոչնչացման գործընթացն է։ Այստեղ պարզ երևում է, որ Նիկոլը շարունակում է իր քաղաքական գիծը, բերում է այն մարդկանց, որոնց միջոցով կիրականացնի իր նպատակները։ «Փաստինֆո»-ի հետի զրույցում ասաց ռազմական գործիչ Գևորգ Գևորգյանը՝ արձագանքելով Երեւանի նախկին քաղաքապետ Հրաչյա Սարգսյանին ՀՀ պաշտպանության նախարարի տեղակալ նշանակվելու որոշմանը։

Նրա արձանագրմամբ՝ երկրի պաշտպանությանը պետք է վերաբերվել ամենայն լրջությամբ, քանի որ այն մեր պետականության, լինելիության ու անվտանգության առաջին գրավականն է։

«Բանակն այս աստիճան բզկտել, քանդուքարափ անել, էս աստիճան ոչնչացնել, կադրային ջարդ իրականացնել, բոլոր իրական մասնագետներին պիտակավորել՝ կոռուպցիաներով, հանցագործություններով ու բերել նրանց, որոնց մեծ մասն անգամ բանակում ծառայած էլ չեն»,- ասաց նա՝ հավելելով, որ այդ նույն բանակն է եղել մեր հանրապետության հենասյունն ու կարևորագույն ձեռքերումը, որը 31 տարի առաջ ստեղծվել է մեծ ջանքերի ու զոհողությունների արդյունքում»։

Այս համատեքստում, ռազմական գործիչն անդրադարձավ ՀՀ ներկա իշխանությունների արած հայտարարություններին՝ պրոֆեսիոնալ բանակ ստեղծելու վերաբերյալ։ Հայտարարեց, որ դա չի արվում եղածը քանդելով։

«Մենք տեսնում ենք, որ այն դեպքում, երբ մեր հարևան ագրեսոր պետությունն անընդհատ հանդես է գալիս թշնամական ուղերձներով, հայ ժողովրդին ոչնչացնելու նպատակ հետապնդող քայլերով, 44-օրյա պատերազմով։ Այս պայմաններում էլ շարունակել կադրային այս քաղաքականությունը՝ բանակի հետ կապ չունեցող, ոչ գիտակ ու ոչ պրոֆեսիոնալ մարդկանց բերելը, նշանակում է որևէ բան չանել բանակի հզորացման ուղղությամբ։ Մեր թշնամիները նույնպես շատ լավ գիտեն այսօրվա իշխանության աթոռներին նստածների ու իշխանական ղեկը վերցրածների կենսագրությունը։ Երբ իրենք տեսնում են, որ այդ համակարգում իրենց համար վտանգ ներկայացնող մարդիկ չկան՝ ավելի ագրեսիվ են դառնում։ Այս հարցում Նիկոլն օգնում է նրանց»,- ասաց նա։

Ստեղծված իրավիճակում, ըստ Գևորգյանի, պետք է ստեղծել քաղաքական պատասխանատուների ու պայքարի միասնական լուռ հարթակ, որոնք պատասխանատվություն կվերցնեն երկրի պետականության, անվտանգության ու հայի լինելիության խնդրի լուծման հարցում։

«Վստահ եղեք, որ մենք մի քանի տարբեր ծրագրեր արդեն ունենք։ Պետք է մարդկանց համախմբել, հանել Հանրապետության հրապարակ՝ պայքարի և ո՛չ զբոսնելու։ Երբ այդ պատասխանատուները միասնական լինեն, վստահ եմ, որ համախմբվելով Հայ Առաքելական Սուրբ եկեղեցու շուրջ, կլինենք մի ամբողջականություն։ Այդ նույն եկեղեցու զանգերի ղողանջով, ինչպես Սարդարապատի ժամանակ էր, նորից մարդիկ ոտքի կկանգնեն, և կլինի մեկ պայքար և դա կլինի շուտով»,- վստահեցրեց ռազմական գործիչը։

Աղբյուր` Փաստինֆո