Փաստ ինֆո

Ինքս լիարժեք տեղեկությունների չեմ տիրապետում, չեմ կարող ասել՝ հստակ պլանավորված որևէ հանդիպում կա՞, թե՞ ոչ, սակայն, մի քանի օր առաջ, Արցախում տեղեկություններ տարածվեցին, թե դիտարկվում է արցախյան և ադրբեջանկան ՀԿ-ների հանդիպում, որ անհասկանալի էր, նույնիսկ, թե այս առաջարկը ո՞ր կողմից է եղել՝ Արցախի՞, թե՞ Ադրբեջանի։ Սրա մասին տեղյակ չեն եղել ո՛չ արցախյան քաղաքական ուժերը, ո՛չ Արցախի Ազգային Ժողովը, ո՛չ հանրությունը,- «Փաստինֆո» լրատվականի հետ զրույցում, ասում է Արցախի Ազգային Ժողովի ընդդիմադիր «Արդարություն» խմբակցության պատգամավոր Մետաքսե Հակոբյանը։

Հիշեցնենք, որ, արդեն օրեր շարունակ, համառ լուրեր են պտտվում այն մասին, թե Արցախը ներկայացնող ուժերը պատրաստվում են հանդիպում - երկխոսություն ունենալ ադրբեջանկան ներկայացուցիչների հետ։ Հանդիպումը, ըստ տարածվող աղբյուրների, լինելու է առանց միջնորդների, այսինքն, առանց տեղում խաղաղապահ առաքելություն իրականացնող ռուսական զորամիավորման ներկայացուցիչների։

Պատգամավոր Մետաքսե Հակոբյանը նկատում է՝ Արցախի նախագահին կից հակաճգնաժամային խորհրդի նորանշանակ նախագահ Տիգրան Պետրոսյանն իր ֆեյսբուքյան էջով տեղեկացրել էր հավանական հանդիպման մասին, որն, իբր, ադրբեջանական կողմը մերժել էր. «Ստացվում է, որ Արցախի նախագահը և՛ քաղաքական ուժերի, և՛ Ազգային Ժողովի, և՛ ժողովրդի թիկունքից, հակասահմանադրական կերպով ստեղծված ինչ - որ մարմնի, ՀԿ-ի նախագահի միջոցով նույնքան անհասկանալի հանդիպման մասին լուրեր է դաշտ նետում։ Իր ստեղծման պահից, մենք բազմիցս բարձրաձայնել ենք, որ նախագահին կից ստեղծված հակաճգնաժամային խորհուրդ կոչվածը հակասահմանադրական կառույց է, որի գոյությունն անթույլատրելի է մի պարզ պատճառով՝ այն ուղիղ խփում է մեր պետական ինստիտուտներին և պետականությանը։ Ստացվում է, որ այս հակասահմանադրական կառույցի նախագահի պաշտոնում նշանակված անձի միջոցով, ահա, նմանօրինակ լուրեր են տարածվում, թե Արցախի և Ադրբեջանի ՀԿ-ների ներկայացուցիչների հանդիպում է նախատեսվում։ Նորից եմ կրկնում՝ այս ամենը տեղի է ունենում Արցախի քաղաքական ուժերի և հանրության մեջքի հետևում, իսկ Արցախում ապրող ժողովուրդն, ուղղակիորեն, դեմ է նման հանդիպումներին։ Մի ձեռքի մատները շատ կլինեն՝ հաշվելու համար Արցախում ապրող այն մարդկանց, ովքեր կողմ են, որպեսզի նմանօրինակ հանդիպում – երկխոսություններ տեղի ունենան, որովհետև բոլոր գիտակից մարդիկ հասկանում են, թե ինչի՞ համար են և ո՞ւր են իրականում տանում այսպիսի հանդիպումները՝ Ադրբեջանի հետ ուղիղ ինտեգրացիայի»,- ասում է պատգամավորը։

Մետաքսե Հակոբանը նկատում է՝ Արցախում վերջերս միտում է նկատվում՝ բացի խելամիտ քաղաքական ուժերից, ով ինչ սադրիչ, պառակտիչ և կասկածելի ծրագրեր ունի, ընդ որում՝ ներկայացված անհայտ ծագման ինչ - որ մարդկանց կողմից, Արայիկ Հարությունյանի մոտ ոչ միայն չեն անտեսվում, այլև խրախուսովում և տարատեսակ պաշտոնների նշանակվում. «Մնում է միայն մտածել, որ Արայիկ Հարությունյանը կամազուրկ մեկն է, որի անմիջական հովանավորչությամբ, ով ինչ ուզենա կանի, կամ սա հայաստանյան օրվա իշխանությունների կազմակերպած հերթական սադրանքն է Արցախում, որին Արայիկ Հարությունյանն, ինչպես միշտ, չի կարողանում կամ չի ցանկանում դիմադրել»։

Արցախի Ազգային Ժողովի պատգամավորը հարցադրում է կատարում՝ ինչպե՞ս հասկանալ, երբ արցախյան իշխանությունն, անգամ, քննության չի ենթարկում այն միջոցները, որոնք օրակարգ են ցանկանում մտցնել քաղաքական խելամիտ ուժերը՝ դուրս գալու համար ստեղծված ողբերգական իրավիճակից, սակայն, նույն այդ ուժերի և հանրության թիկունքում, հավանության է արժանացնում ինչ – որ ՀԿ-ների կողմից առաջ քաշված անհասկանալի հանդիպումների և երկխոսությունների ձևաչափը, որն, իրականում, այլ բան չէ, քան Ադրբեջանին ուղիղ ինտեգրման անհանդուրժելի և մերժելի քաղաքականությունը։

Աղբյուր` Փաստինֆո