Փաստ ինֆո

Խաչատուր Քոքոբելյանի հորն իբրև առևանգելու և շորթմամբ առանձնապես խոշոր չափի գումար պահանջելու մեջ մեղադրվող ՀՅԴ ԳՄ անդամ, ԱԺ նախկին պատգամավոր Սուրեն Մանուկյանն արդեն մեկ տարի է, ինչ կալանքի տակ է։ Տավուշի մարզի ընդհանուր իրավասության դատարանը՝ դատավոր Նարեկ Բադալյանի նախագահությամբ, առաջիկայում կքննարկի Մանուկյանի խափանման միջոց կալանավորումն անփոփոխ թողնելու կամ անազատության հետ չկապված խափանման միջոցով փոխարինելու հարցը։

Ինչպես արդեն տեղեկացրել ենք՝ Մանուկյանի և մյուսների վերաբերյալ քրեական գործով նախաքննությունն ավարտվել է, գործն ուղարկվել Տավուշի մարզի ընդհանուր իրավասության դատարան՝ ըստ էության քննության։ Գործն ի սկզբանե մակագրվել էր դատավոր Սամվել Մարդանյանին, սակայն վերջինս հուլիսի 31-ի դատական նիստի ժամանակ որոշել է ինքնաբացարկ հայտնել և գործը վերամակագրվել է դատավոր Նարեկ Բադալյանին, որը, ի դեպ, դատավորի պաշտոնում նշանակվել է բոլորովին վերջերս՝ 2023թ. հունվար ամսին։

Փաստաբան Սերգեյ Ոսկանյանը «Փաստինֆո»-ի հետ զրույցում հայտնեց, որ դատավոր Մարդանյանն ինքնաբացարկ է հայտնել սեփական նախաձեռնությամբ, քանի որ մեղադրյալներից մեկի հոր հետ դեռևս 1990-ական թվականներից ընկերություն են անում, և, թեև դատավորը հայտարարել էր, որ պատրաստ է քննել գործը և հանդիսանալ օբյեկտիվ, անաչառ դատարան, սակայն կողմերն ընդունել են ինքնաբացարկը։ Գործն այժմ Նարեկ Բադալյանի վարույթում է, առաջիկայում քննարկման առարկա կդարձվի խափանման միջոցի հարցը, քանի որ Մանուկյանի կալանավորման ժամկետն ավարտվում է։ Ինչ վերաբերում է գործի հանգամանքներին, ապա Սուրեն Մանուկյանը մեղադրանքը չի ընդունում, պնդում է՝ որևէ առնչություն չունի դեպքին, պարզապես կան ինչ-որ համընկնումներ. իբրև թե տուժողին, ըստ գործի նյութերի, տարել են ինչ-որ ճանապարհով, տարել-պահել են և այդ հետագիծը, իբրև, համապատասխանում է Մանուկյանի շարժին։ Փաստաբանը պնդում է՝ որևէ հիմնավոր, ողջամիտ ապացույց առկա չէ։ Ոսկանյանը չի բացառում, որ առաջիկա նիստերի ընթացքում Մանուկյանի կողմից սենսացիոն հայտարարություններ կլինեն, սակայն փաստաբանն այս պահին զերծ մնաց փակագծեր բացելուց։

Հիշեցնենք, որ Սուրեն Մանուկյանը ձերբակալվել, ապա կալանավորվել է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով։ Ընդ որում, ինչպես հետագայում պարզվել է, Սուրեն Մանուկյանը ձերբակալման օրը հրավիրվել էր ՀՀ քննչական կոմիտե մեկ այլ գործով որպես տուժող քննչական գործողության մասնակցելու համար, սակայն ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ ձերբակալվել էր՝ անձի առևանգման կասկածանքով։ Սուրեն Մանուկյանին մեղադրանք է առաջադրվել՝ ՀՀ քրեական օրենսգրքի 191 հոդվածի 2-րդ մասի 5-րդ կետով՝ խմբի կազմում անձի առևանգման հատկանիշներով։ Նախաքննության ընթացքում Մանուկյանի մեղադրանքը լրացվել է, այժմ նրան մեղսագրվում է նաև առանձնապես խոշոր չափերի շորթումը: Քրեական գործով Սուրեն Մանուկյանից բացի մեղադրյալի կարգավիճակում է ևս երեք անձ։

Հեղինակ՝ Իզաբել Սահակյան

Աղբյուր` Փաստինֆո