Փաստ ինֆո

Երևի կյանքումս առաջին անգամ կասեմ, որ Նիկոլ Փաշինյանը ճիշտ բան է ասել՝ այո, Արևմուտքը խաբել է նրան, բայց Փաշինյանը պետք է այդ ճշմարտությունը մինչև վերջ բարձրաձայնի, իսկ ճշմարտությունն այն է, որ հենց ինքն ու իր խումբն են այս ամենի թիվ մեկ մեղավորը, որ հենց իրենք են սին հույսեր փայփայել փուչ Արևմուտքի հետ և մեզ հասցրել այս իրավիճակին։ Հետևաբար, Փաշինյանն իր այս խոստովանությունից հետո պարտավոր է ամբողջովին ընդունել իր մեղքը և պատրաստվել դրա համար պատասխանատվության ենթարկվելու,- «Փաստինֆո» լրատվականի հետ զրույցում ասել է Սթենֆորդի համալսարանի քաղաքագիտության դոտկոր Արթուր Խաչիկյանը, արձագանքելով ԵՄ միջնորդական առաքելության վերաբերյալ Փաշինյանի դժգոհություններին։

Հիշեցնենք՝ «Եվրոնյուզ» հեռուստաընկերությանը տված հարցազրույցում երեկ ՀՀ-ում վարչապետ աշխատող Փաշինյանը բողոքել էր, թե բանակցությունների սեղանի շուրջ ձեռք բերված պայմանավորվածությունները Ադրբեջանի կողմից չեն կատարվում ու դրան չեն հետեւում ԵՄ միջնորդական առաքելության կոնկրետ գնահատականները։

Արթուր Խաչիկյանը նկատում է՝ երբ անընդմեջ ու անդադար բղավում ու բացատրում էին, թե եվրոհեքիաթների ու չտեսների դատարկաբանություններով առաջնորդվելու հետևանքով, մենք հանգելու ենք ողբերգության, լսող չկար.«Այդ մարդը պետք է ընդունի, որ իր ղեկավարման 5 տարիները ողբերգություն էին Հայաստանի, Արցախի և այնտեղ ապրողների համար, որ իրենք տապալեցին ամեն ինչ՝ և՛ պատերազմը, և՛ կառավարման ողջ համակարգը, որ մենք մնացինք առանց բարեկամ և դաշնակից, որ ՌԴ-ից հրաժարվելով և վազելով ԵՄ-ի գիրկը, մենք ոչինչ չստացանք, բացի դավաճանությունից և խաբեությունից։ Այս մարդն էր չէ՞, որ ասում էր, թե Խաղաղության դարաշրջան է բացելու, որ թուրքերի հետ լեզու է գտնելու, որ ապագա կա…ահա, Արցախում մենք բոլորս, արդեն, տեսնում ենք նրա բացած Խաղաղության դարաշրջանը, թուրքերի հետ գտած լեզուն և ապագան, որ արդեն եկել է։ Ալիևը քայլ առ քայլ գնում է իր երազած ապագային ՝Արցախի իսպառ ոչնչացմանը, որին, անմիջապես, հետևելու է Հայաստանի Հանրապետության ոչնչացումը։ Ո՛չ Ալիևը, ո՛չ Էրդողանը չեն մոռացել ու չեն հրաժարվել Զանգեզուրի միջանցք ունենալու իրենց հեռահար պլաններից։ Արցախից հետո, հերթը Զանգեզուրինն է։ Թուրք – ադրբեջանական տանդեմը կանգ չի առնելու, իսկ մենք ոչխարի պես լուռ ու գլխիկոր հետևում ենք, թե ինչպես են մեզ հատիկ – հատիկ ոչնչացնում»,- ասում է քաղաքագետը։

Անդրադառնալով ԵՄ-ի ուղղությամբ Փաշինյանի հնչեցրած բողոքին և դրա հավանական արձագանքին, Արթուր Խաչիկյանը նկատում է՝ ԵՄ-ն, ինչպես միշտ, արհամարհելու է Փաշինյանին, ինչպես նաև այն գոյաբանական խնդիրները, որի առաջ այս պահին հայտնվել են Արցախում ապրող մեր 120.000 հայրենակիցները. «ԵՄ-ին անհրաժեշտ է նավթ և գազ։ ԵՄ-ն էներգետիկ լուրջ շահեր ունի Ադրբեջանում, հանուն որի մեզ վաճառեց մեր թշամուն՝ Արևմուտքը մետաղադրամի պես վաճառեց մեզ, իսկ Թավշյա այն կատակակերգությունները, որոնցով, իբր, այս իշխանութուններն ուզում էին աշխարհում ժողովրդավար ներկայանային, պարզվում է՝ ոչ մեկին հետաքրքիր չէ։ Պետք է ընդունել այն ցավալի իրողությունը, որ հանուն սեփական շահերի սպասարկման, բոլորը մոռացել են մեզ և առաջին հերթին մեզ մոռացել է, հենց, Արևմուտքը, որին այսքան թանկ գնով ծառայություններ մատուցեց Նիկոլ Փաշինյանն ու իր թիմը»,- ասում է Խաչիկյանը։

Հարցին՝ արդյո՞ք Փաշինյանը հասկացել է, որ Արևմուտքի հյուսած մեծ խաբեության զոհն է դարձել և կարո՞ղ է կամ պատրա՞ստ է նա արդյո՞ք քաղաքական կուրս փոխել՝ հրաժարվելով Արևմուտքից, գնալ դեպի ՌԴ, Արթուր Խաչիկյանը պատասխանում է՝ Փաշինյանի պարագայում, սա, գրեթե, անհնարին բան է.«Երբ Փաշինյանն Արևմտյան հարթակում՝ Բրյուսելում, ընդունում էր, որ Արցախն Ադրբեջանի տարածքային ամբողջականության մաս է, հավանաբար, նա դա անում էր, որովհետև իրեն այդ թևից խոստումներ էին տվել, որը, ինչպես արդեն ասվեց, չկատարվեց՝ Փաշինյանին խաբեցին։ Ինչ վերաբերում է քաղաքական կուրս փոխելուն և դեպի ՌԴ-ի կողմը գնալու քաղաքականությանը, ապա սա Փաշինյանի պարագայում անհնարին մի բան է լինելու՝ թե՛ նա, թե՛ իր թիմն ընդգծված հակառուսական կողմնորոշում և ծրագիր ունեն, և իրենց քաղաքական ողջ գործունեությունը սպառել են այդ գծին ծառայելու անշնորհակալ գործին ծառայելու համար, ինչի հետևանքն ու արդյունքն էլ, ինչպես ազգովի տեսնում ենք, Արցախում իրականացվող ցեղասպանությունն ու Հայաստանին սպասվող նոր և խայտառակ կապիտուլացիան է», - ամփոփելով զրույցն ասում է Սթենֆորդի համալսարանի քաղաքագիտության դոտկոր Արթուր Խաչիկյանը։

Աղբյուր` Փաստինֆո