Փաստ ինֆո

Գրիգորի Խաչատուրովն այն եզակի զինվորականներից է, որը, վստահ եմ, դառնալու է հայ սպայի և գեներալի էտալոնային կերպար։ Նրա համեստ կերպարը դրսևորվել է և՛ իր ողջ ծառայության, և՛ 2020 թ. հուլիսյան մարտական գործողությունների ժամանակ, որն այս իշխանությունները պոպուլիստաբար օգտագործեցին, որպեսզի դրա ֆոնին, նաև իրենք հերոսանան, բայց Գրիգորի Խաչատուրովը համեստ է նաև հիմա, երբ ապօրինի կերպով գտնվում է անազատության մեջ, -այսօր Գրիգորի Խաչատուրովի պաշտպանական թիմի հրավիրած մամուլի ասուլիսի ժամանակ ասել է պաշտպանական թիմի անդամ, ԵՊՀ Արևելագիտության ֆակուլտետի դեկան, թուրքագետ Ռուբեն Մելքոնյանը։

Իրավական հարցերից զատ, Գրիգորի Խաչատուրովի խափանման միջոցն՝ ազատազրկումը դիտարկելիս, Ռուբեն Մելքոնյանը հարցադրում է կատարում՝ ո՞ւմ կամ ինչի՞ն նա կարող էր խանգարել՝ մնալով ազատության մեջ.«Եթե տրամաբանորեն նայենք, ապա քրեական գործին, Գրիգորի Խաչատուրովի ազատության մեջ մնալը, չէր կարող վնասել, որովհետև նա երբևէ և որևէ կերպ չի խոչընդոտել դատավարական գործընթացին։ Հետևաբար, մնում է միայն մեկ տրամաբանական եզրահանգում՝ այն, որ Գրիգորի Խաչատուրովի ազատության մեջ մնալը կարող էր և կարող է խոչընդոտել միայն և միայն թշնամուն՝ թուրք – ադրբեջանական տանդեմին»։

Թե ինչո՞ւ է այս եզրահանգումը հիմնավորված, բանախոսը պարզաբանում է՝ որովհետև մեր Հայրենիքի տարբեր հատվածներ այսօր, դեռևս, շարունակում են մնալ Ադրբեջանի օկուպացիոն ծրագրերի թիրախում և դրանց մեջ են նաև, այսպես կոչված, անկլավները, որոնք, իրականում, մեր Հայրենքի անբաժանելի մասն են, սակայն Ալիևի վերջին ելույթն, ըստ թուրքագետի, բացահայտ պահանջ էր այն մասին, որ Հայաստանը ճանաչելով Ադրբեջանի տարածքային ամբողջականությունը, պատրաստ պետք է լինի՝ վերադարձնելու այդ, այսպես կոչված, անկլավները. «Մեր Հայրենիքի այդ սրբազան հատվածները միլիմետր առ միլիմետր գիտի գեներալ Խաչատուրովը։ Դրանց ստրատեգիական և ռազմական նշանակության մասին նույնպես գեներալ Խաչատուրովը քաջատեղյակ է և այսօր, ստեղծված իրավիճակում, երբ միջազգային որևէ մեխանիզմ այլևս չի գործում, երբ, անգամ, Կարմի խաչի բուժառուին է ահաբեկչական Ադրբեջանը հենց մեքենայից օրը ցերելով առևանգում, առաջնային պլան են գալիս անհատները, ովքեր կարող են և ի վիճակի են բեկում մտցնել այս իրավիճակում։ Գրիգորի Խաչատուրովն այդ անհատներից է, ով կարող է դեմ կանգնել, այսպես կոչված, անկլավների, այսինքն՝ ՀՀ տարածքային ամբողջականության հանդեպ որևէ ոնձգության և, որպես գեներալ, և՛որպես քաղաքացի։ Հետևաբար, երբ այս գործի շրջանակներում տարբեր պատասխանատուներ նման որոշումներ են ընդունում, ինձ, ուղղակի, հետաքրքիր է՝ նրանք երբևէ մտածե՞լ են, որ այս ամենի արդյուքնում իրենք, նույնպես, հայտնվելու են ադրբեջանական թիրախում»,- ասել է ԵՊՀ Արևելագիտության ֆակուլտետի դեկան, թուրքագետ Ռուբեն Մելքոնյանը։

Մանրամասները՝ տեսանյութում

Աղբյուր` Փաստինֆո