Փաստ ինֆո

ՀՀ պաշտպանության նախկին նախարար Դավիթ Տոնոյանն առաջարկել խորհրդարանական ընդդիմությանը ներկայ գտնվել իր մասնակցությամբ՝ 44 -օրյա պատերազմի քննիչ-հանձնաժողովի նիստին։ «Պատրաստ եմ թույլատրելի թափանցիկության և դասակարգված տեղեկատվության տրամադրման առումով պատասխանել ձեր հարցադրումներին»,- հանձնաժողովի նիստին այս մասին հայտարարեց Դավիթ Տոնոյանը՝ հավելելով, որ ինքը երկար ժամանակաշրջան չի պատասխանել որևէ հարցի՝ բացառությամբ անկլավներին վերաբերող դրվագին։ Դրան, իր խոսքով, արձագանքել էր, քանի որ չի կարծել, որ այսպիսի ֆորմատով խոսելու հնարավորություն է ունենալու։ Իսկ 44-օրյա պատերազմի հանգամանքների մասով հրատապ հրապարակային հանդես գալու որոշում, իր խոսքով, կայացրել է՝ երկու հանգամանքով պայմանավորված.

«ՀՀ վարչապետի բաց ելույթը, որը նաև ինձ մոտ բավականին հարցերն առաջացրեց։ Կար նաև հրապրակային արձագանքը՝ ՀՀ ԳՇ պետի։ Բացի այդ, ըստ իմ հաշվարկների, ձեր հանձնաժողովի աշխատանքներն ավարտվում էին օգոստոսի 14-ին, քանի որ այդ օրը լրանում է ուղիղ 18 ամիս, որ ձեր հանձնաժողովի աշխատանքներն սկսվել են։ Ինձ համար կարևոր էր, որ մինչև օգոստոսի 14-ը լիներ արձագանքը, քանի որ ինձ համար հայտնի չէր՝ ես կալանքի տակ շարունակելու էի մնալ, թե ոչ՝ մինչև օգոստոսի 14-ը»,- ասաց նա։

Նշենք, որ ընդդիմությունն ընդհանրապես բոյկոտում է քննիչ հանձնաժողովի աշխատանքները, քանի որ այն մեծամասամբ ներկայացված է իշխանության ներկայացուցիչներով։   ՀՀ Պաշտպանության նախկին նախարարը կրկնեց իր հորդորը՝ փակ նիստին նրանց մասնակցության մասով։

«Շատ հարցեր, որոնք հրապարակային հնչեցվում են, որոնք ունեն չիմանալու բնույթ, կամ ո՛չ կոմպետենտության բնույթ, կամ քաղաքական ուղղորդված բնույթ, և դա վերաբերում է և՛ իշխանությանը, և՛ ընդդիմությանը։ Գտնում եմ, որ առնվազն երկու ուժի՝ ՀՅԴ-ն և ՀՀԿ-ն պետք է ներկա լինեն, քանի որ նրանք հայկական քաղաքական դաշտում երկար ժամանակ գործող կուսակցություններ են, ունեն ինստիտուցիոնալ հիշողություն ու կարծում եմ, որ շարունալելու են իրենց գործունեությունը՝ կարծում եմ, իմ կողմից տրամադրվող տեղեկությունն իրենց հետագա որոշումների համար կարևոր է։ Հակառակ դեպքում, եր կխնդրեի նույն կուսակցության ներկայացուցիչներին այլևս հրապարակային չարտահայտվել, առնվազն, իմ գործունեության հետ կապված հարցերում»,- հայտարարեց ՀՀ Պաշտպանության նախկին նախարարը։

Աղբյուր` Փաստինֆո