Փաստ ինֆո

ՀՀ պաշտպանության նախկին նախարար Դավիթ Տոնոյանն այսօր հայտարարել է, որ ինքը երբեք չի եղել քաղաքական թիմի անդամ՝ զբաղեցնելով պաշտպանության նախարարի պաշտոնը։

«Ցավոք, կամ ինչպես ասել էր վարչապետը՝ բարեբախտաբար, թե դժբախտաբար, առանց այլեւայլության, ես եղել եմ կառավարության անդամ ու չեմ զգացել, որ վարչապետը ինձ չի վստահում։ Բայց ես քաղաքական թիմի անդամ չեմ եղել եւ կուսակցական բնույթի որոշումների ձեւավորմանը չեմ մասնակցել ու չեմ կատարել։ Հիմա ձեր նախարարը քաղաքական թիմի անդամ է եւ ամբողջ ծավալով կարող եք հարցադրումները անել նրան որպես թիմի անդամի»,- ասել է Դ. Տոնոյանը՝ արձագանքելով քպական պատգամավոր Հայկ Սարգսյանի հարցադրմանը։

Նշենք, որ իշխող ուժի պատգամավորը Դավիթ Տոնոյանից ակնկալում էր գնահատական Նիկոլ Փաշինյանի գործունեությանը, նշելով, որ ինքը՝ Տոնոյանը, եւս եղել է իրենց քաղաքական թիմի կառավարության անդամ։ Միաժամանակ Հ. Սարգսյանը հետաքրքրվել էր, թե արդյոք եղել են հարցեր, որոնք բարձրացրել է ու լուծում չեն ստացել։

Դ. Տոնոյանը, հայտարարելով, որ ինքը քաղաքական թիմի անդամ չի եղել, միաժամանակ հրաժարվել է գնահատական տալ Փաշինյանի գործունեությանը։

«Ես եղել եմ իր ենթական եւ ես չէ, որ պետք է իր (ՀՀ վարչապետ Նիկոլ Փաշինյանի – խմբ) գործողություններին գնահատական տամ։ Դա կոռեկտ չեմ համարում»,- ասել է Տոնոյանը՝ միաժամանակ չհամաձայնելով այն ձեւակերպման հետ, թե ինչ ուզել են՝ տվել ենք։

Նշենք, որ այս արտահայտության հեղինակ Նիկոլ Փաշինյանն է, որը քննիչ հանձնաժողովում հայտարարել էր, թե զինված ուժերն ինչ իրենից ուզել է՝ տվել են։
Չեմ ընդունում այն մոտեցումը, որ ինչ ուզել են՝ տվել են։ Ես այդպես չէի ձեւակերպի»,- ասել է Տոնոյանը, սակայն ավելացրել, որ իր վարչապետի կողմից չի նկատել որեւէ խոչընդոտ՝ որպես պաշտպանության նախարար իր գործառույթների իրականացման ընթացքում։

«Բավարարվա՞ծ եք»,- ասել է Դավիթ Տոնոյանը՝ խոսքն ուղղելով քպական պատգամավորին։

Աղբյուր` Փաստինֆո