Փաստ ինֆո

ՍՈւ-30 կործանիչների ձեռքբերումը Զինված ուժերի մեդեռնիզացիայի համար ճիշտ քայլ է եղել։ 44-օրյա պատերազմի հանգամանքներն ուսումնասիրող քննիչ-հանձնաժողովի նիստում հայտարարել է ՀՀ պաշտպանության նախկին նախարար Դավիթ Տոնոյանը։
Ավելին, նա պնդել է, որ պատերազմի ժամանակ դրանք անցել են մարտական հերթապահություն։

«Աթե չի սխալվում, նոյեմբերի սկզբին ինձ զեկուցեցին, որ ՍՈւ–30-ներն անցել են մարտական հերթապահության, քանի որ որոշակի հրթիռների մատակարարում իրականացվել է»,- նշել է Տոնոյանն ու ավելացրել, որ գրոհային գործառույթների առումով, սպառազինվածության հետ կապված գոնե սկզբնական փուլի մեկ–երկու օրվա մարտական գործողությունների վարման առումով, հագեցվածություն ունեցել ենք։

«Այն հրթիռները, որոնք որ այսօր ժողովրդի մեջ կոչվում են անպիտան, ժանգոտած կամ չգիտեմ ինչ, օգտագործվել են նաև ՍՈւ-30–ների համար ուսումնական թռիչքների ժամանակ և խոցել են թիրախները»,– ասաց Տոնոյանը։
Նա հայտարարեց, որ այն, ինչ Ադրբեջանն այսօր անում է հիմա Թուրքիայի հետ` մոդեռնիզացնում է ՍՈւ 25–ները, 2020 թվականի օգոստոսի 24–ին իր տեղակալը Մոսկվայում ՍՈւ–երի արդիականացման պայմանագիր է կնքել ՌԴ–ի հետ, ինքն էլ անձամբ ներկա է եղել ստորագրմանը։

«Այդ մոդեռնիզացումը պետք է իրականացվեր 3 տարվա ընթացքում։ Ինձ շատ հետաքրքիր է` արդյոք գործընթացն ինչ փուլում է։ Մենք 3 տարվա ընթացքում պետք է ունենայինք որոշակի առաջխաղացում, հնարավոր է` ռազմական գործողությունները և նաև Ռուսաստանի կողմից վարվող հատուկ գործողությունը որոշակի խոչընդոտներ են առաջացրել»,–ասաց նա։

Աղբյուր` Փաստինֆո