Փաստ ինֆո

Այո՛, սպառնալի իրավիճակի վերաբերյալ տեղյակ եմ եղել։ 44-օրյա պատերազմի հանգամանքներն ուսումնասիրող քննիչ հանձնաժողովի նիստին այս մասին հայտարարեց ՀՀ Պաշտպանության նախկին նախարար Դավիթ Տոնոյանը՝ անդրադառնալով Արցախյան երկրորդ պատերազմի վերաբերյալ հարցին։

«Իրավիճակը գնահատվել է սպառնալի, բայց ռազմական գործողությունների սկսման օրը որևիցե մեկին հայտնի չի եղել»,- մասնավորեցրեց Տոնոյանը։

Նրա խոսքով՝ ի պաշտոնե, իր լիազորությունների շրջանում ինքն իրականացրել է պաշտպանական քաղաքականությունը։
«Այդ քաղաքականության իրականացումը ձևակերպվում է մի քանի փաստաթղթերով։ այն փաստաթղթերը, որոնց վերաբերյալ ես հիմա կարող եմ խոսել՝ իմ պաշտոնավարման ընթացքում ՀՀ կառավարության երկու որոշումներն են՝ 2018 և 2019 թվականներին։ Ընդ որում, 2018 թվականի կառավարության որոշումը կարելի է կոալիցիոն կառավարության ծրագիր կոչել»,- ասաց նա։
2019 թվականին ընդունված փաստաթղթին Դավիթ Տոնոյանն անդրադարձավ ավելի հանգամանալից՝ հայտնելով, որ խոսքը նախապատրաստման վերաբերյալ է, և ունի ՊՆ-ին վերաբերող մաս։

«Առաջին իսկ կետով՝ «զսպման ուժերի և միջոցների զարգացում, զորքերի մարտական կարողությունների բարձրացում» խնդիրն էր դրված ՊՆ առջև։ Այն ներառում է՝ ավելացնել հրթիռային զորքերի և հրետանու կրակային և հարվածային հնարավորությունները, զինված ուժերը համալրել բազմագործառնական ավիացիոն համալիրներով, ա այն Սու-30-ների վերաբերյալ է, որոնց մասով անընդհատ ինչ-որ հարցեր են առաջանում, և ԱԹՍ-ներով։ Բարձրացնել օդային միջոցների պաշտպանվածության մակարդակը, և կատարելագործել վաղ հայտնաբերման համակարգը»,- ասաց նա։

Տոնոյանի խոսքով՝ իր զիազորությունների շրջանակում, ինքը գործունեություն է ծավալել նաև սպառազինության և ռազմական տեխնիկայի զարգացման ծրագրերի, ԶՈՒ զարգացման, մշակվող, վերամշակվող ու անընդհատ թարմացվող ՀՀ ԶՈւ կիրառման պլանի և դրանից բխող այլ փաստաթղթերի փաթեթների շրջանակում։

Աղբյուր` Փաստինֆո