Փաստ ինֆո

Սահմանապահ Երասխ գյուղում արդեն 5 օր է, ինչ բնակիչները խմելու ջուր չունեն։ Այս մասին «Փաստինֆո»-ին ահազանգում են գյուղի բնակիչները՝ հավելելով, որ գյուղում ապրելու պայմաններն անցած օրերին անտանելի են դարձել։ Ստիպված են ծայրահեղ քայլերի դիմել՝ ջրի պակասը լրացնելու համար։

«Մենակ գյուղի կողքով փոքր, կեղտոտ մի հատ առու է հոսում։ Այդ առվի մեջ կոյուղու ջրեր են լկվում, գոմաղբի ջրեր են լցվում։ Մի խոսքով, մարդիկ ստիպված, երբեմն, գնում են, այդ ջրից բերում, քամում են, որ գոնե ափսե լվանան։ Հիմա չգիտենք՝ էրեխուն ո՛չ էն է լողացնես, ո՛չ էն է՝ չլողացնես։ Դուք պատկերացնո՞ւմ եք ինչ վիճակ է հիմա գյուղում։ Մի խոսքով, մի սարսափելի վիճակ»,- ասաց մեր զրուցակիցը։

«Փաստինֆո»-ի զրուցակցի խոսքով՝ ստեղծված իրավիճակն ավելի է բարդանում գյուղում եղանակային բարձր ջերմաստիճանի ֆոնին։ Սահմանապահ գյուղի բնակչի խոսքով՝ իրենք անցած մի քանի օրերին բազմիցս բարձրացրել են խնդիրը՝ կապվելով «Վեոլիա ջուր» ներկայացուցչի ընկերության հետ։ Ընկերության ներկայացուցիչն իրենց այդ ամբողջ ընթացքում ասել են, թե երեկոյան ժամը 16։00-ին ջուրը միացվելու է, սակայն, դա այդպես էլ տեղի չի ունեցել։ Որոշ դեպքերում էլ ընկերության ներկայացուցիչները բնակիչներին պարզապես ուղղորդել են գյուղապետարան։

«Հարցնում ենք՝ բա որ այսօր էլ լինի՝ ասում է. «Մենք ուրիշ բան չենք կարող ասել, այդքանը»։ Առանց քաշվելու ասում են՝ ինչ-որ տեղում նորոգում են կատարում,... ինչ-որ տեղում վթար է եղել... չգիտեմ... լրիվ սուտ պատրվակների շարան է։ Խնդրի լուծումն էդպես արդեն մի քանի օր ձգում են։ Խեղճ գյուղացին հացի փող վաստակի՞, գիշերը թուրքին դիմակայի՞, թե՞ հիմա էլ խմելու ջրի համար գլուխ կոտրի։ Էսօր էլի, բակում նստած էինք՝ նորից կրակեցին։ Մի կողմից էս անվտանգային վիճակը, մյուս կողմից էս անմարդկային պայմանները։ Դեռ որքա՞ն է էսպես շարունակվելու»,- ասաց բնակիչը։

Մեր զրուցակցի խոսքով՝ իրենք խնդիրը բարձրացրել են նաև գյուղապետարանում։ Նրանց ասել են, որ այսօր ևս կարող է ջրամատակարարումը չվերականգնվի։ Պատճառաբանել են, թե խողովակները խցանված են։ Իսկ գյուղում առկա ավազանը բացարձակապես ցամաքած է։

«Ի՞նչ անենք, մե՞նք էլ գնանք ՄԱԿ-ի գրասենյակի դիմաց ցույց անենք, ասենք Երասխում այս վիճակն է։ Ժողովուրդն այսօր ուզում է ակցիա անել, մայրուղին փակել։ Հիմա արդյո՞ք դա խղճին դեմ չի լինի, որ Սյունիք ու Արցախ գնացող ճանապարհը փակենք։ Արցախն ասում է՝ «Բացեք կյանքի ճանապարհը»։ Ջուրը կյանք է։ Բա որ կյանք է, սահմանապահ Երասխն էլ Երևանի դարպասներն են։ Ախր հենց այսպիսի բնակավայրերը պետք է ապահովել անհրաժեշտ պայմաններով, ոչ թե օրեր շարունակ խնդիր բարձրացնես՝ այդպես էլ լուծում չստանա։ Ինչո՞ւ լուծում չի տրվում խնդրին»,- ասաց նա։

Հավելենք, որ ջրի բացակայության պատճառով սահմանապահ գյուղի տարածքում գործող գինու գործարանը ևս դադարեցրել է աշխատանքը։

«Գործարանը սահմանի վրա է։ Աշխատողները գնացել են գործի՝ հետ են ուղարկել։ Պետք է շշերը լվանային, որ շշալցում իրականացնեին։ Ջուր չկա։ Լավ, բա հիմա մենք էս խնդրի լուծման համար ո՞ւմ դիմենք, ո՞ւմ ասենք...»,- վրդովված ասաց սահմանապահ գյուղի բնակիչը։
Հարցի վերաբերյալ «Փաստինֆո»-ն փորձել է մեկնաբանություն ստանալ «Վեոլիա ջուր» ընկերության լրատվության բաժնի պատասխանատուներից, սակայն հեռախոսազանգերը մնացին անպատասխան։

Աղբյուր` Փաստինֆո