Փաստ ինֆո

Ադրբեջանը հայտարարել է՝ բոլոր նրանք, ովքեր 1988 թ.-ից սկսած, նախ Խորհրդային, այնուհետև անկախ Ադրբեջանի տարածքում մասնակցել են ռազմական գործողությունների, բոլորը քրեական պատասխանատվության են ենթարկվելու։ Այս մասին Ադրբեջանն առաջին անգամ չէ, որ հայտարարում է և սա, կարելի է ասել, նորմալ գործընթաց է, որ հայկական կողմը պարտավոր էր ի նկատի ունենալ՝ հաշվի առնելով, թե ով է իր թշնամին և ինչ պլաններ նա ունի,- «Փաստինֆո» լրատվականի հետ զրույցում ասել է քաղտեխնոլոգ Արմեն Բադալյանը։

Հիշեցնենք՝ նախօրեին Կարմիր խաչի միջազգային կոմիտեի (ԿԽՄԿ) ուղեկցությամբ Արցախից Հայաստան բուժման նպատակով տեղափոխվող 68-ամյա Վագիֆ Խաչատուրյանն առևանգվել է Ադրբեջանի սահմանապահ ծառայության ներկայացուցիչների կողմից և ձերբակալվել շինծու մեղադրանքներով։

Արմեն Բադալյանն ընգդծում է՝ քանի որ Արցախի բնակչությունը չի դիմադրում սկսված գործընթացի դեմ, ապա, բնականաբար, բոլոր նրանք, ովքեր 1988 թ.-ից ի վեր, մասնակցել են Արցախի ազատագրմանն ու մարտական գործողութություններին, հայտնվելու են Ադրբեջանի բանտերում. «Եթե արցախցիները չեն ցանկանում առաջիկա ապագայում մասսայաբար հայտնվել Ադրբեջանի բանտերում, ապա, դա կանխելու համար, նրանք ունեն մի ճանապարհ՝ անհապաղ իշխանափոխություն իրականացնեն Արցախում, ընտրեն այն թեկնածուին, ով առավել վճռական է տրամադրված, ուժային կառույցներում փոփոխություններ կատարեն, ուժով բացեն Լաչինի միջանցքն ու վերցնեն այն իրենց վերահսկության տակ։ Քանի դեռ սա տեղի չի ունեցել, բոլոր նրանք, ովքեր մասնակցել են Ադրբեջանի տարածքում տեղի ունեցած ռազմական գործողություններին, որոնք հայկական կողմի համար համարվել են ազգային -ազատագրական, իսկ Ադրբեջանի համար՝ ռազմական հանցագործություն, այդ բոլոր մարդիկ առաջիկայում կդատվեն Ադրբեջանի քրեական օրենսդրությամբ նախատեսված հոդվածներով և կհայտնվեն այդ երկրի բերդերում»,- ասում է Արմեն Բադալյանը։

Հարցին՝ արդյո՞ք արցախյան ազատագրական պայքարին մասնակցած հայաստանաբնակ ազատամարտիկները, նույնպես, թիրախում չե՞ն, ադրբեջանական բերդերում հայտնվելու տխուր հեռանակարից, քաղաքագետը պատասխանում է՝ այս խնդիրը, հավասարապես, առնչվում է նաև այն մարդկանց, ովքեր պայքարել են Արցախի ազատագրման համար և հիմա ապրում են Հայաստանի Հանրապետությունում. «Ադրբեջանն արցախյան ազատամատին մասնակցած բոլորի անունները վաղուց փոխանցել է համապատասխան միջազգային կառույցներին, օրինակ՝ Ինտերպոլին՝որպես ռազմական հանցագործներ, անկախ նրանից, թե այդ մարդիկ որտեղ են հիմա ապրում՝ ՀՀ-ո՞ւմ, թե՞ Արցախում։ Չի բացառվում, որ, օրինակ, Հայաստանում ապրող որևէ ազատամարտիկ ցանկանա մուտք գործել, ասենք, Վրաստանի Հանրապետություն, անցակետում միանգամից ձերբակալվի և փոխանցվի ադրբեջանական կողմին՝ որպես միջազգային հետախուզվող։ Իհարկե, ես չէի ցանկանա մտածել, որ, օրինակ, Վրաստանը նման վարք կդրսևորի ՀՀ քաղաքացիների նկատմամբ, սակայն, դա կարող է տեղի ունենալ ցանկացած մի երկրում, որ մուտք կգործեն թիրախում հայտնված այդ մարդիկ։ Փաստացի, Արցախում ապրող բոլոր այն քաղաքացիները, ովքեր մասնակցել են ռազմական գործողութուններին, իսկ նրանք կազմում են Արցախի բնակչության ճնշող մեծամասնությունը, ռեալ վտանգի տակ են և ցանկացած պահին՝ ցանկացած վայրից կարող են առեւանգվել և հայտնվել Բաքվում։ Սա, ցավոք, արդեն, իրողություն է և Վագիֆ Խաչատրյանը դրա առաջին օրինակն էր»,- ասում է քաղտեխնոլոգը։

Ամփոփելով զրույցը՝ Արմեն Բադալյանը կոչ է անում դադարեցնել անլուրջ մոտեցումները՝ ցույցեր «Կարմիր խաչ»-ի կամ ՄԱԿ-ի գրասենյաի դիմաց, նստացույցեր եւ այլն, պետք է անհապաղ լրջագույն քայլեր ձեռնարկել ՝ խուսափելու համար հետագա մեծ աղետից, որ կարող է դրսևորվել՝ Արցախում մասսայական հետպնդումներով և ձերբակալություններով ադրբեջանկան իշխանութունների կողմից, հատկապես, եթե Ադրբեջանի նախագահի ագրեսիվ հռետորաբանությունն այլ բանի մասին չի խոսում, քան այն, ինչ արդեն իսկ մեկնարկել է։ Քաղտեխնոլոգը հավելում է՝ Ադրբեջանի համապատասխան կառույցներն ունեն ռազմական հետախուզություն և Դատախազություն, որ բավականին լավ է աշխատում և համապատասխան մարդկանց ցուցակները՝ սկսած Երկրապահ կամավորականներից մինչև ամենատարբեր անհատներ, նրանց ձեռքի տակ կան, հասանելի են։

Աղբյուր` Փաստինֆո