Փաստ ինֆո

«Ազատություն Վագիֆ Խաչատրյանին» վանկարկումներով ՀՀ տարբեր բուհերում սովորող տասնյակ արցախցի ուսանողներ վաղ առավոտից փակել են ԿԽՄԿ հայաստանյան գրասենյակի մուտքը եւ պահանջում են հանդիպում կառույցի ղեկավարության հետ:

Ակցիայի մասնակիցները խնդրում ու պահանջում են, որ ԿԽՄԿ-ն, լիարժեք`առանց թերացման, կատարի իր պարտականությունները, անհապաղ գործադրի բոլոր ջանքերն ու վերադարձնի իրենց հոգածության ներքո Արցախից Հայաստան տեղափոխվող Արցախի 68-ամյա քաղաքացի Վագիֆ Խաչատրյանին, ում հուլիսի 29-ին ադրբեջանցիները Կարմիր Խաչի մեքենայից առեւանգել են։

«Կանխեք խեղաթյուրումը մարդկային կյանքերի», «կանգնեցրեք ադրբեջանական ահաբեկչությունը» պաստառներով երիտասարդները պահանջում են թույլ չտալ բոլոր սահմաններն անցած ագրեսոր Ադրբեջանին, որը  Արցախի Հանրապետության քաղաքացիների հումանիտար բոլոր իրավունքներն ամբողջ աշխարհի աչքի առաջ ոտնահարում է,   հեղինակազրկել նաեւ իրենց' Կարմիր Խաչի առաքելությունը։

«Հաշվի առնելով Արցախի՝ իր հայրենիքի ազատագրմանը մասնակցած Վագիֆ Խաչատրյան առևանգման փաստն ու դրան հետևած Ադրբեջանի ԱԳՆ-ի ակնհայտ ցինիկ հայտարարարությունը, որում ասվում է, որ շարունակելու են շինծու մեղադրանքներով ձերբակալել արցախյան ազատամարտի մասնակիցներին, առնվազն լուրջ հիմքեր է տալիս ենթադրելու, որ արցախյան բոլոր պատերազմներին՝ 1990-ականներին, քառօրյային, 44-օրյային մասնակցած մեր հայրերը, եղբայրները, ամուսինները՝ անկախ նրանից՝ Արցախում են, թե Հայաստանում, կարող են արժանանալ նույն ճակատագրին, ուստի ժամ առաջ պետք է կանխել հնարավոր նման զարգացումները»,-«Փաստինֆո»-ին ասում է ակցիայի մասնակից Ռոզա Խաչատրյանը, ում ամուսինը, ինչպես նևա բազմաթիվ հարազատներ ներկա պահին գտնվում են Արցախում՝ պաշարման մեջ։

Ռոզան նկատում է՝ Վագիֆ Խաչատրյանը Կարմիր Խաչին լիովին վստահելով է նստել այդ մեքենան, մինչդեռ նրա՝ միջազգային հումանիտար կառույցի հոգածության տակ գտնվելը ադրբեջանցիներին չի խանգարել նրանց իսկ աչքի առաջ առևանգել Արցախի խաղաղ բնակչին։

Թղ ոչ մեկի մտքով չանցնի, թե այս ամենն Արցախով ավարտվելու է։ Եթե Ադրբեջանի այս հանցավոր քայլերի դեմը չառնվի, ապա շատ շուտով նմանատիպ դեպքեր են արձանագրվելու ՀՀ տարբեր մասերում։Ներկա պահին հարվածը կրում է Արցախը, բայց այսպես շարունակվելու դեպքում, անկասկած, հերթը հասնելու է Սյունիքին, Գեղարքունիքին, Վայոց ձորին և այլն։ Ու այդ ժամանակ, ինչպես հիմա, ես կանգնելու են այնտեղ ու այն մադրկանց կողքին, որոնք ամենածանր վիճակում կգտնվեն, քանի որ հայաստանը՝ Արցախի հետ միասին, իմ հայրենիքն է ու ես ուզում եմ իմ երկրում ազատ ու անվտանգ ապրել, ցանկացած պահի գնալ հայրենիքիս այն մասը, որն ուզում եմ»,-ասում է Ռոզան ու ավելացնում՝ բոլորի մոտ կա մտավախություն, որ ադրբեջանական ծուղակում հաջորդ հայտնվողը կարող է լինել իրենցից ցանկացած մեկի հայրը, եղբայրը, ամուսինը․․․

Ակցիայի մասնակից Ամալյան էլ ավելացնում է՝ այստեղ սրտացավ մարդիկ են, ուղղակի մարդիկ, որոնց համար մեկ չէ, թե ինչ է կատարվում Արցախում՝ իրենց հայրենակիցների հետ։

Միջազգային կառույցին ներկայացվող առաջին պահանջը, բնականաբար, առևանգած 68-ամյա քաղաքացուն անվնաս իր հարազատների մոտ վերադարձնելն է։

Նշենք, որ արցախցի երիտասարդների նստացույցը ԿխՄԿ-ի մոտ մեկնարկել է շաբաթ օրը՝ հուլիսի 29-ին։ Արդեն երկրորդ գիշերն է, որ երիտասարդներն անցկացնում են ԿԽՄԿ-ի դիմաց։

Աղբյուր` Փաստինֆո