Փաստ ինֆո

Fly One Armenia ավիաընկերության համար վաղուց արդեն սովորական են դարձել չվերթների հետաձգումները։ «Փաստինֆո»-ն ուղեւորներից ահազանգ էր ստացել, որ Երևան- Լիոն չվերթի հետաձգման մասին, իսկ պատճառները ոչ ոք հարկ չէր համարել ուղեւորներին նորմալ ներկայացնել։

Չվերթը նախատեսված է եղել 12։50-ին եւ օդանավակայան ժամանած ուղեւորները տեղեկացել են, որ այն չի կայանալու, ավիաընկերությունից թռիչքի հետաձգման մասին իրենց որևէ տեղեկություն չեն հայտնել։

Պատճառները պարզելու համար «Փաստինֆո»-ն կապվեց ավիաընկերության տնօրենների խորհրդի նախագահ Արամ Անանյանի հետ։ Մեր զրուցակցի խոսքով՝ թռիչքի հետաձգումը պայմանավորված է եղել չպլանավորված տեխնիկական ստուգմամբ։

«Նման բաներ ամառային թռիչքային շրջանում մշտապես կարող են տեղի ունենալ՝ բոլոր ավիաընկերությունների հետ։ Վերջին շրջանում, անգամ մեր օդանավակայանում, բազմաթիվ ավիաընկերությունների հետ կապված, նմանօրինակ խնդիրներ լինում են, որովհետև ամառային թռիչքային շրջանն ամենաակտիվ շրջաններից մեկն է։ Չվերթը տեղի կունենա որոշակի ուշացումով, ինչի համար հայցում եմ մեր ուղևորների ներողամտությունը»,- ասաց Անանյանը։ Ի պատասխան մեր հարցին՝ Անանյանը չմանրամասնեց, թե կոնկրետ ինչ անսպասելի խնդիր է առաջացել թռիչքից առաջ։ Հայտնեց, որ խնդիրն արդեն լուծված է։ Թռիչքը կիրականացվի նախատեսված ժամից 6 ժամ 35 րոպե ուշացումով՝ երեկոյան ժամը 19։25-ին։

Ավելի վաղ, սակայն, Fly One Armenia—տնօրենների խորհրդի նախագահը մեզ հետ զրույցում հավաստիացրել եր, որ ավիաընկերությունն արդեն վաղուց հաղթահարել է աշխատանքային գործունեության ընթացքում ունեցած որոշակի խափանումների փուլը՝ վստահեցնելով, որ նոր խափանումներ այլևս տեղի չեն ունենում եւ միայն կոնկրետ հետաձգման մասին հիշատակումից հետո, թերեւս, հիշեց, որ հետաձգումները չեն հաղթահարել եւ այսօր եւս ուղեւորներին տհաճ անակնկալ են մատուցել։

Հիշեցնենք, որ ավիաընկերության աշխատանքում տևական ժամանակ չկարգավորվող խափանումներն ուղևորների մոտ դժգոհության մեծ ալիք էին առաջացրել նաև մոտ 2 շաբաթ առաջ։ Պատճառն այն էր, որ մի քանի օր շարունակ, ավիաընկերության մի քանի չվերթներ հետաձգվել ու չեղյալ էին հայտարարվել։

Առաջացած խափանումները Fly One Armenia-ի տնօրինությունը պատճառաբանել էր տեխնիկական խնդիրների առկայությամբ։ Անանյանը «Փաստինֆո»-ի հետ զրույցում պարզաբանեց, որ այդ խափանումներն առաջացել էին այն բանից հետո, երբ հուլիսի 8-ին Քիշնև- Երևան թռիչքի ժամանակ օդանավի թևի ետնափեղկին թռչուն էր բախվել։

«Չեղարկումների այդ 1-2 դեպքից հետո, թռիչքային գրաֆիկում առաջացած որոշակի շեղումներն այս պահին շտկված են։ Օդանավը շարք է վերադարձվել։

Հիշեցնենք, որ թռչնի հետ կապված դեպքից հետո, այդ ընթացքում, հետաձգվել էին Ստամբուլ-Երևան, Լիոն-Երևան, Դյուսելդորֆ-Երևան, Միլան-Երևան չվերթները։ Ուղևորները հայտնում էին, որ այդ ժամանակ նույնպես, հետաձգումների մասին ավիաընկերությունից իրենց պատշաճ ձևով չին տեղեկացրել։

Ուղևորների մի մասը հայտարարում էր, որ չվերթների հետաձգման մասին իրենք տեղեկացել էն միայն օդանավակայան հասնելուց հետո։ Որոշ դեպքերում էլ ուղևորներին հաղորդվել էր չվերթի ավելի վաղ մեկնարկի մասին, սակայն, թռիչքն իրականացվել էր նշանակված ժամից մեկ ժամ ուշ։

Այս հետաձգումներով ու չեղարկումներով պայմանավորված մարդիկ զգալի նյութական կորուստներ են կրել, քանի որ շահերը նաեւ տրանզիտ ամրագրումներ են ունեցել։

Այդուհանդերձ, Անանյանը պնդում է, թե «Վստահ ենք, որ մեր ուղևորների ճնշող մեծամասնությունն ըմբռնումով է մոտեցել ստեղծված իրավիճակին։ Միևնույն ժամանակ, չենք ընդունում ստեղծված իրավիճակի որևէ շահարկում։ Միևնույն ժամանակ, բաց ենք փաստարկված ու օբյեկտիվ քննադատության ու քննարկման համար»։

Աղբյուր` Փաստինֆո