Փաստ ինֆո

Միայն այսօր՝ հուլիսի 28-ին, ադրբեջանական ԶՈւ-երը երկու անգամ կրակ են բացել սահմանապահ Երասխ գյուղի տարածքում կառուցվող գործարանի ուղղությամբ։ «Փաստինֆո»-ին այս մասին հայտնեց գյուղի բնակիչներից մեկը։

«Ես գիշերվա դեպքի մասին չգիտեի։ Գործարանի տարածքում ապրող ու կրակոցները լսած գյուղացիներն էին խոսում։ Ասացին, որ մոտավորապես գիշերը ժամը 02։00-ին են սկսել կրակել։ Կես ժամից ավելի հնչել են կրակոցները։ Դե, երևի հնդիկներն ինչ-որ իրեր, ապրանքներ են տեղափոխելիս եղել։ Մի փոքր շարժ նկատում են ու միանգամից կրակը բացում են»,- ասաց նա։

Մեր զրուցակցի խոսքով՝ թշնամին այդքանով չի բավարարվել։ Կրակել է նաև այսօր՝ կեսօրին։ Մեր զրուցակցի խոսքով՝ հատկապես վերջին օրերին կրակոցները համեմատաբար ինտենսիվացել են։ Ասում է՝ «օրը մեջ առիթ են փնտրում կրակելու»։

«Մամայենքս այդ հատվածում են բնակվում։ Թուրքի դիրքն ուղիղ իրենց տան ուղղությամբ է։ Ես բանկում էի այդ ժամանակ, երեխաներիս էլ ասել էի, որ գնան տատիկի տուն։ Երեխաներս զանգեցին ու ասացին՝ «մամ, ուժեղ կրակում են, արագ վազել ու մտել ենք ծառերի տակ, որ մեզ չկպնի փամփուշտը»։ Ասել եմ՝ բալես, կուչկվեք, սպասեք, մինչև հանգստանա վիճակը»,- պատմեց մեր զրուցակիցը։

Այս պահին կրկին գործարանի աշխատանքը շարունակում է պարալիզացված մնալ։ «Փաստինֆո»-ն կապ հաստատեց ՏԿԵ նախարարության լրատվության բաժնի հետ՝ պարզելու համար, թե ինչ աշխատանք է տարվում ՀՀ տարածքում կառուցվող գործարանի վերագործարկման գործընթացը վերականգնելու ուղղությամբ։ Նախարարության ներկայացուցիչը մեզ հետ զրույցում հայտնեց, որ իրենք որևէ իրավասություն չունեն գործարանի խնդրով զբաղվելու եւ հորդորեց դիմել Շրջակա միջավայրի նախարարություն։ Հետագայում արդեն թե՛ Շրջակա միջավայրի, և թե՛ Էկոնոմիկայի նախարարությունների ներկայացուցիչների հետ կապվել այդպես էլ չհաջողվեց։

Աղբյուր` Փաստինֆո