Փաստ ինֆո

Նոր աշխարհակարգում չճանաչված պետություններն իրենց անկախությունը հաստատելու համար, նվազագույնը, քաղաքական հիմնական խաղացողի հենարան պետք է ունենան, իսկ ՀՀ իշխանությունները որոշում են ընդունել, ըստ էության, ոչնչացնելու Արցախը՝ հիմնավորելով՝ եթե Արցախը մատաղ չանեն, ապա մատաղ կլինի Հայաստանը։ Եվ որքան էլ իրենք փորձեն դա թաքցնեն կամ փաթեթավորեն գեղեցիկ խոսքերի մեջ, միևնույն է, դա աչք է ծակում։ Սա, իրականում, սարսափելի մանիպուլյացիա է, որովհետև, մատաղ անելով Արցախը, երաշխավորված ոչնչացնում ես Հայաստանը։ Հայաստանի վերջը, որպես էթնոքաղաքական միավոր՝ իր բոլոր ատրիբուտներով, կսկսվի հենց այն պահից, երբ Արցախը կանցնի Ադրբեջանի տիրապետության տակ,- «Փաստինֆո» լրատվականի հետ զրույցում ասում է ԲՀԿ քաղխորհրդի անդամ Արման Աբովյանը։

Հիշեցնենք՝ Արցախի Հանրապետության ԱԺ-ն երեկ դիմել է ՄԱԿ-ի անդամ պետություններին՝ Արցախի անկախությունը ճանաչելու ուղերձով՝ որպես վերահաս ողբերգությունը կանխելու միակ միջոց։

Արման Աբովյանը նկատում է՝ եթե դեռ մնացել են մարդիկ, ովքեր այս ամենը չեն հասկանում, կամ թուրք – ադրբեջանական տանդեմի օրակարգը սպասարկողներն են կամ նրանց մոտ բացակայում է աշխարհաքաղաքական զարգացումների վերաբերյալ տարրական գիտելիքները. «Ասել եմ և կրկնում եմ՝ եթե այս իշխանությունների՝ Արցախի վերաբերյալ օրակարգը կյանքի կոչվի, ապա նրանք հաջորդիվ, աչքները չռած, մեզ ասելու են՝ Երևանում խաղաղ ապրելու համար հիմա էլ պետք է հանձնենք Սյունիքը, հետո Վայոց Ձորը, Գեղարաքունիքը, Տավուշը և այդպես շարունակ։ Հետո մեզ համոզելու են, որ կուշտ փորով հաց ուտելն ու գազ և լույս ունենալն ավելի կարևոր է, քան երկիր ունենալը, չխոսենք այն մասին, որ, եթե դու երկիր չունեցար՝ ո՛չ հաց ես ունենալու, ո՛չ լույս, ո՛չ գազ»,- ասում է Աբովյանը։

Վերադառնալով Արցախի ԱԺ-ի կողմից ՄԱԿ-ի անդամ երկրներին հղված կոչին, Արման Աբովյանն այս քայլը համարում է գործընթացի տրամաբանական զարգացում. «Արցախում հասկացել են՝ Հայաստանի իշխանությունները ոչ միայն իրենց ձեռքներն է լվացել Արցախից, այլև հնարավոր և անհնար բոլոր միջոցներով նպաստում են Արցախի ոչնչացմանը։ Հետևաբար, ստեղծված իրավիճակում, այո, գոյություն ունի քաղաքական գործիքակազմ, որն Արցախը փորձում է օգտագործել»։

Հարցին՝ հաշվի առնելով այն հանգամանքը, որ Արցախում, արդեն, երեք տարի շարունակ խաղաղապահ առաքելություն է իրականացնում Ռուսաստանի Դաշնության զորախումբը, հետևաբար ավելի սպասելի չէ՞ր լինի, եթե Արցախը նման կոչով դիմեր, հենց, ՌԴ-ին, Արման Աբովյանը պատասխանում է՝ ՄԱԿ-ի անդամ երկրներին դիմելու կոչը քաղաքականապես լավ մտածված և գրագետ հաշվարկված քայլ է. «Դիմելով միայն Ռուսաստանի Դաշնությանը, Արցախն իր դեմ կուղղեր հակառուսական թևի՝ հավաքական Արևմուտքի դժգոհությունը։ Չմոռանանք, որ տարածաշրջանն այս պահին կոշտ առճակատման մեջ է հայտնվել արևմտյան և արևելյան ճակատների մեջ։ Եվ ահա, հենց ՄԱԿ-ի անդամ երկրներին վկայակոչելով, Արցախը հուսափել է իր դեմ հակառուսական ուժերի տրամադրումից՝ վեր դնելով իրեն Արևելք – Արևմուտք առճակատումից»։

Ամփոփելով զրույցը՝ Արման Աբովյանն ընդգծում է՝ Արցախն ունի բավականաչափ ներուժ՝ ստեղծված իրավիճակում գրագետ քաղաքականություն վարելու և հիմնական խաղացողների հետաքրքրություններն իր օգտին աշխատացնելու համար, պարզապես, ժամանակը, ցավոք, այլևս չի բավարարում.«Սա, իրականում, ունիկալ իրավիճակ է, որովհետև միջազգային հանրությունն իր հիմնական հետաքրքրություններն առաջ տանելով, հիմնակում հիմնվում է երեք խաղացողների վրա՝ Թուրքիայի, Ադրբեջանի և Հայաստանի։ Ցավոք, մենք տեսնում ենք, որ Հայաստանի օրվա իշխանությունների ցանկությունները համաընկնում են իր թշնամիների ցանկությունների հետ։ Թե՛ Արևմուտքը, թե՛ ՌԴ-ն, իրենց քաղաքականությունը կառուցում են՝ համաձայն այս երեք պետությունների առաջ քաշած տեսլականի։ Բայց, ահա, գալիս է նոր խաղացող, ի դեմս Արցախի, որն իր համառությամբ և տոկունությամբ խաղի նոր կանոներ է առաջ քաշում, որտեղ գրագետ և հաշվարկված քաղաքականություն վարելու պարագում, կարող է, նույնիսկ, այս մեծ խաղից շահած դուրս գալ, որովհետև, իրականում, ո՛չ Արևմուտքին, ո՛չ ՌԴ-ին պետք չէ այս տարածաշրջանում թուրքական ազդեցության մեծացումը, որ իրական սպառնալիք կարող է դառնալ ոչ միայն տարածաշրջանի, այլ նաև աշխարհաքաղաքական խոշոր խաղացողների համար»։

Աղբյուր` Փաստինֆո