Փաստ ինֆո

Արցախի խորհրդարանը ճիշտ է վարվել, որովհետև, իսկապես, այսպիսի պայմաններում նման կոչով հանդես գալը խիստ տրամաբանական է, սակայն, ցավոք, ռեալ պոլիտիկի դաշտում այդ կոչը որևէ արդյունք ունենալ չի կարող,- «Փաստինֆո» լրատվականի հետ զրույցում ասում է քաղաքագետ Սուրեն Սուրենյանցը ։

Հիշեցնենք՝ այսօր Արցախի Հանրապետության ԱԺ-ն դիմել է ՄԱԿ-ի անդամ պետություններին՝ Արցախի անկախությունը ճանաչելու ուղերձով՝ որպես վերահաս ողբերգությունը կանխելու միակ միջոց։

Սուրեն Սուրենյանցը նկատում է՝ոչ միայն ՄԱԿ-ի անդամ, այլ նաև աշխարհի ցանկացած երկիր չունի որևէ շահ, որով պայմանավորված և առաջնորդվելով կճանաչի Արցախի անկախությունը.«Միջազգային հարաբերությունների առաջին պլանում միշտ սեփական շահերն ու ուժերի փոխհարաբերություններն են։ Միջազգային իրավունքն ու մյուս բոլոր պլանները հարմարեցվում են սեփական շահերին։ Այլ հարց է, որ Արցախն այս քայլին գնացել է հարկադրված, որովհետև այլ տարբերակ չի մնացել։ Մի ողջ պետություն՝ իր 120.000 բնակիչներով, սովահարության շեմին է կանգնել։ Մարդիկ փրկվելու այլ տարբերակ, այս պահին, այլևս չեն տեսնում, քան կոչով դիմել միջազգային կառույցներին կամ ՄԱԿ-ին»։

Հարցին՝ հաշվի առնելով այն հանգամանքը, որ Արցախում, արդեն, երեք տարի շարունակ խաղաղապահ առաքելություն է իրականացնում Ռուսաստանի Դաշնության զորախումբը, հետևաբար ավելի սպասելի չէ՞ր լինի, եթե Արցախը նման կոչով դիմեր, հենց, ՌԴ-ին, Սուրեն Սուրենյանցը պատասխանում է՝ Արցախը դիմել է ՄԱԿ-ին, որովհետև հենց այդ կառույցի շրջանակներում է արդեն, տարիներ շարունակ, քննարկվում արցախյան հակամարտության կարգավորման հարցը.«Իսկ ի՞նչը կփոխվեր, եթե, ասենք, Արցախը նման կոչով դիմեր Ռուսաստանի Դաշնությանը…Կարծում եմ՝ ոչ մի։ Նորից կրկնեմ՝ այս պահին աշխարհում չկա և գոյություն չունի որևէ երկիր կամ պետություն, որ պատրաստ կլինի անգամ քննարկել Արցախի ճանաչման հարցը։ Ցավոք, հիմա աշխարհաքաղաքական այնպիս մի իրավիճակ է ստեղծվել, որտեղ Ադրբեջանը հայտնվել է խիստ բարենպաստ կարգավիճակում, հիանալի գիտակցելով, որ ցանկացած պարագայում ո՛չ ՌԴ-ից, ո՛չ հավաքական արևմուտքից դիմադրության չի հանդիպելու ու ագրեսիվ քաղաքականություն է բանեցնում։ Ինչ վերաբերում է ՌԴ-ին, ապա նրանք ունեն ստանձնած հստակ պարտավորություններ, թեև այո, իրենց ստանձնած այդ պարտավորությունները նրանք շատ վատ են իրականացնում, սակայն, ցավոք, այս պարագայում, մենք այլընտրանք չունենք»։

Թե ինչպե՞ս Արցախը կդիմադրի ստեղծված մարտահրավերներին, ըստ քաղաքագետ Սուրեն Սուրենյանցի, դա նոյեմբերի 9-ի ռեժիմի վերականգնում է.«Թե՛ պաշտոնական Երևանը, թե՛ Ստեփանակերտը պետք է փորձեն, ՌԴ-ի հետ աշխատելով, վերահաստատել նոյեմբերի 9-ի հայտարարությամբ հաստատված ռեժիմը, որովհետ սա միակ միջոցն ու երաշխիքն է, որով պայմանավորված Արցախում ապրող մեր հայրենակիցները կարող են մնալ և շարունակել ապրել իրենց հայրենի հողում, հակառակ պարագայում մենք պետք է խոսենք վատթարագույն սցենարների մասին, ինչպիսին օրինակ՝ էվակուացիա և այլն և այլն…»։

Աղբյուր` Փաստինֆո