Փաստ ինֆո

Հուլիսի 25-ին Մոսկվայում կայացած արտգործնախարարների հանդիպման ժամանակ ՀՀ ԱԳՆ Արարատ Միրզոյանը բարձրացրել է Լաչինի միջանցքի վերաբացման և շրջափակումը վերացնելու հարցը՝ նոյեմբերի 9-ի պարտավորության ներքո։ Լաչինի միջանցք կատարած այցի ընթացքում այս մասին հայտարարեց Հատուկ հանձնարարություններով ՀՀ դեսպան Էդմոն Մարուքյանը։ Ըստ նրա, այդպիսի պահանջ կա նաև ՄԱԿ-ի միջազգային դատարանի կողմից կայացված երկու որոշումներում։

Հիշեցնենք, որ հուլիսի 26-ին, առաջին անհրաժեշտության սննդամթերքով ու ապրանքներով 19 բեռնատար մեքենաներ Երեւանից ուղևորվել են Արցախ, սակայն մնացել են ԿոռնիձորումՀաղորդվել էր, որ բեռը տեղ հասցնելու համար կապ էր հաստատվել ՌԴ խաղաղապահ ուժերի հետ: Այդ նույն ժամանակ, ադրբեջանական կողմը հումանիտար օգնության տրամադրման գործողությունները «հերթական սադրիչ գործողություն» էր գնահատել։ Ավելի ուշ, տեղի ունեցածին արձագանքել էր նաև ԵՄ նախագահ Ժոզեֆ Բորելը՝ Ադրբեջանին կոչ անելով բացել Բերձորի միջանցքը՝ հավելելով, որ Ադրբեջանի կողմից առաջարկվող Ակնայի ճանապարհը չի կարող այլընտրանք լինել Բերձորի միջանցքին։

«Այսինքն, ոչ թե կոնկրետ 360- 400 տոննա բեռի հարցը պետք է բարձրացնի մեր նախարարը, այլ ընդհանրապես միջանցքը բացելու հարցը։ Այն, բնականաբար, բարձրացվել է, և այդ հարցը քննարկվել է հանդիպման ժամանակ»,- ասաց նա։
Դիտարկմանը, որ հումանիտար բեռների տեղափոխման փաստը տպավորություն էր ստեղծել, որ արդեն իսկ պայմանավորվածություն է ձեռք բերվել այդ մասին՝ Մարուքյանն ասաց, որ Բերձորի միջանցքի վերաբացման, շրջափակման վրացման պահանջն ավելի մեծ գործընթաց է, քան 400 տոննա հումանիտար բեռ անցկացնելու հարցը։

«Պետք չէ մասնավորեցնել։ Այսինքն, մեր մոտեցումն ու բարձրացրած հարցն ընդհանուր բնույթի է»,- ասաց նա։
Մարուքյանն անդրադարձավ նաև հարցին, թե պայմանավորվածություն չունենալու պարագայում ինչ նպատակ է ունեցել 19 բեռնատարներով շուրջ 400 տոննա հումանիտար բեռի տեղափոխումը Կոռնիձոր։ Ասաց, որ այդպիսի գործընթացներ իրականացվել են շրջափակման ամբողջ ընթացքում։ Կոչ արեց՝ հարցը չմասնավորեցնել։

«Այս առիթով, գուցե նաև միջազգային լուսաբանումն է ավելի շատ։ Որովհետև հումանիտար ճգնաժամն է ավելի շատ սրվել, քան նախկինում կար։ Սրանք հանգամանքներ են, որոնք մենք պետք է հաշվի առնենք»,- ասաց նա։

Աղբյուր` Փաստինֆո