Փաստ ինֆո

«Շոուն շատ ակնհայտ է։ Այստեղ խորը տրամաբանություն ունենալ պետք չէ, որպեսզի հասկանանք, որ ՀՀ իշխանությունները հերթական անգամ օգտագործեցին Արցախի իշխանություններին։ Չեմ էլ ուզում քննարկել Արցախի իշխանություններն այս անգամ գիտակցաբա՞ր, թե՞ անգիտակցաբար օգտագործվեցին, երբ ժողովուրդն այստեղ ծայրահեղ անթույլատրելի վիճակում է հայտնվել»,- «Փաստինֆո» լրատվականի հետ զրույցում ասում է Արցախի ԱԺ ընդդիմադիր «Արդարություն» խմբակցության պատգամավոր Մետաքսե Հակոբյանը ։

Հիշեցնենք՝ նախօրեիից Երևանից դեպի Արցախ մարդասիրական օգնություն տեղափոխող 19 բեռնատարները հասել են Կոռնիձորի սահմանային հատված և կայանել Հակարիի կամրջի հարևանությամբ։ Հումանիտար բեռն Արցախ մտցնելու համար հարկավոր է անցակետից համապատասխան համաձայնությունն ու թույլտվութուն, որն այս պահի դրությամբ, ԼՂՀ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանի փոխանցմամբ, չկա։

Բեռնատարների մեջ առաջին անհրաժեշտության ապրանքներ են` ալյուր, կաթի փոշի, մակարողնեղեն, առաջին անհրաժեշտության դեղորայք և մանկական սնունդ։

Պատգամավորը նկատում է՝ ստացվում է, որ 10 օր առաջ Արցախում մեկնարկած շարժումը, նույնպես, Նիկոլ Փաշինյանի սցենարով էր, որտեղ մութ կերպով օգտագործվեցին Արցախի իշխանություններն ու, հատկապես, ԱՀ նախագահը.«Ես վստահ եմ՝ Փաշինյանը մեկ նպատակ էր հետապնդում՝ հերթական անգամ հարվածելու Արցախի սուբյեկտայնությանը և դա նրան հաջողվեց։ Արցախի նախագահի երեկվա գրառումից պարզ դարձավ, որ նրան համոզել էին,որ բոլոր այն բեմադրված շոուները, որին ինքը մասնակցեց վերջին 10 օրում, տվել են իրենց արդյունքները և նա, արդեն, կարող է վերադառնալ իր աշխատասենյակ։ Արցախի իշխանությունները հերթական անգամ սխալվեցին, որովհետև, եթե ՀՀ վարչապետի լծակներով բազմիցս հայտարարվում է, թե Արցախն Ադրբեջան է և վերջ, որից հետո ԵՄ դիտորդների ներգրավմամբ, հումանիտար բեռների շոու է կազմակերպվում, սա այլ բան չէր կարող լինել, քան հերթական խաբեություն»։

Մետաքսե Հակոբյանը հավելում է՝ հայաստանյան իշխանությունները, վաղուց արդեն, տվել են իրենց համաձայնությունը՝ Հակարիի կամուրջը դիտարկել որպես հայ – ադրբեջանական սահման. «Եթե ուշադիր էիք, երեկ Հանրային հեռուստատեսության եթերում Սամվել Բաբայանը իր խոսքի ընթացքում, անդրադառնալով Հակարիի կամրջի թեմային, երկու անգամ կրկնեց սահման եզրույթը։ Նրանք ոչինչ երբեք պատահական չեն ասում։ Այսինքն, եթե դուք, փաստացի ընդունել եք, որ Հակարիի կամուրջը դա հայ – ադրբեջանական սահմանն է և առանց այդ պետության հետ համաձայնեցնելու, բեռներ եք ուզում անցկացնել, շատ լավ պետք է իմանաք, որ արդյունքը լինելու է այն, ինչ այս պահի դրությամբ կա»։

Ի՞նչ արեց Նիկոլ Փաշինյանն իր այս հումանիտար շոուի շրջանակներում, հարցադրում է կատարում պատգամավորն ու ինքն էլ պատասխանում՝ նա իջեցրեց Արցախի սուբյեկտայնությունը, մեկ անգամ ևս՝ ստորացրեց Արցախի նախագահին և իր ադրբեջանցի գործընկերոջ հետ ստեղծեց նախադրյալներ, ցույց տվեց, որ Արցախն, այլևս, չունի որևէ այլընտրանաք, քան Ակնայով Ադրբեջանից հումանիտար բեռների ներկրումը։

Մետաքսե Հակոբյանն ընդգծում է՝ հումանիտար բեռի ամեն գրամն, այսօր, շատ կարևոր է Արցախի համար, որովհետև հումանիտար ճգնաժամն այնտեղ վաղուց արդեն հատել է անգամ աղետի շեմը և, օրինակ, Արցախում կան ընտանիքներ, որտեղ տան հինգը անդամին մեկ օրվա կտրվածքով ընդամենը մեկ հաց է բաժին հասնում, ընդ որում, սնվելու ոչինչ, բացի ցամաք հացից, շատ ընտանիքներ ուղղակիորեն չունեն, այնուամենայնիվ որևէ արցախցի պատրաստ չէ, այսպես կոչված, հումանիտար օգնություն ստանալ Ակնայի (Աղդամի) ճանապարհով. «Արցախում միակ գործոնը մնացել է ժողովուրդը, որը թույլ չի տալիս հայ – ադրբեջանական իշխանություններին Ակնայով, այսպես կոչված, հումանիտար բեռներ ներկրել Արցախի տարածք։ Մնում է կոտրել միայն Արցախի ժողովրդին։ Իսկ ժողովրդի մոտ հենց այդ մտավախությունն է՝ ինչպես կանխել Ակնայով դեպի Արցախ ուղարկվելիք, այսպես կոչված, հումանիտար բեռը։ Իսկ եթե այսեղից կլսվեն ինչ – ինչ եզակի կոչեր, ինչ – ինչ մարդկանց կողմից, թե Արցախում մարդիկ պատրաստ են ընդունելու ադրբեջանկան հումանիտար օգնությունը, ապա դրանք կամ պատվեր են կատարում, կամ Արցախ ներմուծված նիկոլական ուժերի սպասարկողներն են»,- ասում է պատգամավորը։

Ամփոփելով զրույցը՝ Մետաքսե Հակոբյանն անդրադառնում է նաև Արցախում ծառայություն իրականացնող ռուս խաղաղապահ զորամամիավորման դերին.«Այսօր Կառավարության նիստում Նիկոլ Փաշինյանը նշեց, թե իրենք կապվել են ռուսական խաղաղապահ զորամիավորման ներկայացուցչի հետ, ովքեր պետք է դիմավորեն և Արցախ մտցնեն հումանիտար բեռը։ Սրանով հայաստանյան իշխանությունները՝ ի դեմս Փաշինյանի, կատարեցին նաև իրենց կարևոր գործառույթներից մեկը՝ մեկ անգամ ևս նսեմացրին Արցախում խաղաղապահ առաքելություն իրականացնող զորախմբին և նրանց դերակատարումը՝ նպաստելով նրանց Արցախից և տարածաշրջանից դուրս բերմանը։ Փաշինյանի նախաձեռնած հումանիտար օգնության այս ողջ խաղը երկու հիմնական նպատակ է հետապնդում՝ տանել Արցախին Ադրբեջանի հետ երկխոսության, որի արդյունքում պարարտ հող կնախապատրաստվի՝ այստեղից հեռացնել ռուս խաղաղապահ զորամիավորմանը, պատճառաբանելով, թե նրանք այստեղ այլևս անելիք չունեն»։

Աղբյուր` Փաստինֆո