Փաստ ինֆո

Քանի դեռ չենք կարողացել ապահովել ԼՂ-ի նկատմամբ իրագործվող բլոկադայի վերացումը, մենք չենք կարող որևէ բան համարել բավարար։ Լրագրողների հետ ճեպազրույցի ժամանակ այս մասին ասաց Սփյուռքի հարցերով հանձնակատար Զարեհ Սինանյանը՝ անդրադառնալով հարցին, թե արդյո՞ք ՀՀ իշխանությունների կողմից միջազգային կառույցներ հետ տարվող աշխատանքները բավարար են՝ Ադրբեջանի նկատմամբ ճնշումներ գործադրելու համար։

Լրագրողները հետարքրքվեցին նաև դաշնակցական գործիչներից մեկի մուտքը ՀՀ տարածք արգելելու փաստի մասին՝ արձանագրումով, որ նրանց մուտքն արգելվում է միայն Թուրքիա, հիմա նաեւ՝ Հայաստան։
«Գիտենք, դա հին պատմություն է։ Գիտենք, թե որտեղից է սկսվել։ Վարչապետի մեքենայի վրա ձու նետելու պատմությունը։ Հիմա ես կոնկրետ այս դեպքում չգիտեմ, թե ում մասին է խոսքը»,-ասաց Սինանյանը՝ անդրադառնալով լրագրողի մեկ այլ հարցին, թե արդյո՞ք ՀՀ իշխանությունները չպետք է մեծահոգի լինեն։

Սինանյանը պնդեց, թե ինքը մեր հայրենակցին երկրի տարածք մուտք գործել արգելելու գործընթացին չի մասնակցել։ Հնչեց հաջորդ հարցը՝ «Դուք ընդհանրապես ինչ-որ բանի մասնակցո՞ւմ եք, պարոն Սինանյան»։

Անդրադառնալով Բերձորի միջանցքը բացելու պահանջի մասով սփյուռքում բնակվող հայերի գործողություններին վերաբերող հարցին՝ Սինանյանն ասաց, որ այդ առումով, իրենք աշխատանք են տանում իրենց գործընկերների հետ՝ նաև միջազգային հանրության վրա ճնշում բանեցնելու ուղղությամբ։ Թե կոնկրետ ինչ աշխատանքի մասին է խոսքը՝ Սինանյանը չմանրամասնեց։

Աղբյուր` Փաստինֆո