Փաստ ինֆո

Փաշինյանի ասուլիսի ընթացքում հնչեցված որոշ մտքերի մեկնաբանումը եթերային լեքսիկոնից դուրս՝ բավականին բարդ է լինելու, բայց, եթե քաղաքական և իրավական գնահատական տալու լինենք, ապա դրանք հանցավոր, ոչ լեգիտիմ և հակապետական հայտարարություններ պետք է որակել։ Որևէ մեկը Հայաստանում նման մանդատ չունի, որպեսզի հայտարարի, թե 29.800 քկմ տարածքով Հայաստանի Հանրապետությունը պահպանելու համար պետք է հանձնել Արցախը,- «Փաստինֆո» լրատվականի հետ զրույցում ասել է «Մայր Հայաստան» շարժման համակարգող Անդրանիկ Թևանյանը։

Հիշեցնենք՝ երեկ ՀՀ-ում վարչապետ աշխատող անձը մի քանի ժամ տևողությամբ հերթական մամուլի ասուլիսում անդրադարձել է մի շարք հարցերի, հատկապես խոր ատելության զգացումով արտահայտվել Արցախի և աևցախահայությանն առնչվող գոյաբանական խնդիրներին։

Անդրանիկ Թևանյանն ասում է՝ արդեն մեկ անգամ նշել է, սակայն ցանկանում է կրկնել.«Սա նման է նրան, որ գողերը մտնեն քո տուն և պատանդ վերցնեն ընտանիքի փոքրիկին, այնուհետև պահանջեն ամբողջ տունը՝ այլապես սպառնալով ուտել երեխային, չթաքցնելով, անգամ, որ հետո անցնելու են մյուսներին։ Հիմա Փաշինյանն ասում է, որ տունը և ընտանիքի մյուս անդամներին փրկելու համար պետք է տան փոքր երեխային հանձնել գողերին, թույլ տալ, որ ուտեն նրան, որովհետև այլ հնարավորություն չկա, իսկ փոքրին հանձնելուց հետո երաշխիք չկա, որ գողերը կհանգստանան ու ամբողջ տունը չեն վերցնի, տնեցիներին սրի չեն քաշի: Բայց ամեն դեպքում, նա պնդում է, որ պետք է տան փոքր երեխային հանձնենլ գողերին՝ «միջազգային մեխանիզմների ներքո»:

Բանախոսն ընդգծում է՝ այս ամենն, ուղղակիորեն, ողջամիտ կասկած է առաջացնում, որ Փաշինյանը ծրագրված աշխատանք է իրականացնում.«Իր պարագան և տեսակը հաշվի առնելով էլ, կարող եմ ասել, որ նա հիմա անձնական անվտանգային հարցերի և իշխանության ամեն գնով պահպանման հարցերի լուծմամբ է զբաղված։ Այս ողջ մեխանիզմն, իհարկե, իշխանափոխությունից հետո միայն ամբողջությամբ կբացահայտվի, սակայն այն, որ նա ծրագրավորված կերպով գնում է Արցախի և Հայաստանի կործանման ճանապարհով, սա ակնհայտ է»։

Ամեն ինչ պետք է անել և մենք ամեն ինչ անելու ենք, որպեսզի այս աղետալի վայրընթացը կասեցի և ես համոզված եմ, որ միասնական ջանքերով դա հնարավոր է, ասում է Անդրանիկ Թևանյանը և հավելում.«Ես ինքս իմ ունեցած բոլոր ջանքերը ներդնելու եմ այս գործի իրականացման համար։ Փաշինյանին պետք է վռնդել պետական ապարատից, դրանով իսկ, ապահովելով մեր անվտնագությունը, գոյությունն ու հետագա զարգացումը, որովհետև հապաղումն, այլևս, անդառնալի կարող է լինել Հայաստանի և Արցախի գոյության համար»։

Անդրադառնալով Հայատանում և Արցախում իրականացվող համաժամանակյա բողոքի ակցիաներին՝ Թեւանյանը նշել է. «Մենք, այլևս, պետք է մի կողմ դնենք հնարավոր բոլոր տեսակի տարաձայնություներն ու հակասությունները և մինասնական ջանքերով, օր առաջ, հասնենք սրանցից ազատագրմանը։ Ես հասկանում եմ, որ կան մարդիկ, ովքեր այս միջոցառումներին՝ հավաքների, ակցիաների ու ցույցերի ընթացքում հասցեական քննադատության չեն ենթարկում ՀՀ Կառավարությանը, Նիկոլ Փաշինյանին և իր վարած քաղաքականությանը, բայց մտածում եմ, որ սա ժամանակի խնդիր է։Անկախ ամեն ինչից, թե ով կբարձրացնի պայքարի դրոշակը, միևնույն է, այս պրոցեսը հնարավոր չի լինելու կասեցնել։ Ես ինքս իմ և մեր թիմի անունից հայտարարում եմ, որ անելու ենք ամեն ինչ, որպեսզի այս անգամ ցանկալի փոփոխություններն իրականություն դառնան»։

Աղբյուր` Փաստինֆո