Փաստ ինֆո

Ես չեմ ցանկանում նման սցենար ընդհանրապես քննարկել, որովհետև իմ կարծիքն այն է, որ Լեռնային Ղարաբաղում պետք է ռազմական գործողություններ չսկսվեն: Այսօր տեղի ունեցած մամուլի ասուլիսում ասել է վարչապետ Նիկոլ Փաշինյանը՝ ի պատասխան լրագրողի այն հարցին, թե Լեռնային Ղարաբաղում ծավալուն ռազմական գործողություններ սկսվելու դեպքում ո՞րն է լինելու ՀՀ-ի գործողությունը, ռազմական միջամտություն կցուցաբերենք, թե կսահմանափակվենք դիվանագիտական աշխատանքով։ Ի լրումն՝ լրագրողը հիշեցրել էր Փաշինյանի հայտարարությունը, որ քանի դեռ խաղաղության պայմանագիր չկա, պատերազմի հավանականությունը շատ մեծ է:

«Իմ այսօրվա ասելիքի հիմնական ուղերձը դա էր: Դուք մեջբերում եք իմ ասածից, որ քանի դեռ խաղաղության պայմանագիր չկա, պատերազմի հավանակությունը շատ մեծ է... սա ֆիքսենք, և մյուս կողմից հարցը, որ կա շարժում, որ ՀՀ վարչապետին արգելենք խաղաղության պայմանագիր ստորագրի: Այս երկու հասկացությունների բալանսն էլ եմ ուզում, որ հասկանանք: Բայց ընդհանուր առմամբ, եղել են դեպքեր, չեմ ուզում շատ վատ օրինակներ բերել, հազար ներողություն ոչ մի կոնկրետ զուգահեռ ի նկատի չունենալով: Խորհրդային միությունն ու Գերմանիան միմյանց հետ խաղաղության պայմանագիր ստորագրեցին, հետո կարճ ժամանակ անց պատերազմ սկսվեց, և նման իրավիճակներ պատմության ընթացքում եղել են: Նաև սա է պատճառը, որ մենք ասում ենք, որ մենք չենք պատրաստվում ցանկացած փաստաթուղթ, որի վերևը գրված է խաղաղության պայմանագիր տակը ստորագրենք: Դա մեր ամենամեծ մտահոգությունն է, որ մենք ստորագրենք խաղաղության այնպիսի պայմանագիր, որը կապահովի խաղաղություն, կամ ապահովելու հնարավորինս մեծ շանսեր ունենա»,- ասել է Փաշինյանն ու նշել, որ հակառակ պարագայում վաղուց ստորագրել էր խաղաղության պայմանագիրը, առանց նրբությունների մեջ խորանալու, թե որքանով է ապահովվում խաղաղությունը:

Բացի այդ՝ Փաշինյանը նկատել է, որ կողմերից մեկն անընդհատ խոսում է ագրեսիվ տոնայնությամբ, ատելության քարոզ ա տանում, դա էլ խաղաղությանը նպաստող գործոն չէ, որովհետև այդ ատելության մթնոլորտում այդ խաղաղության պայմանագիրը կարող է չգործել:

«Իմ այսօրվա ասելիքի նրբությունը որն է, որ ոչ միայն սա ֆիքսենք, այլև փորձենք հասկանալ, թե ինչ կարող ենք անել այդ հարցերը լուծելու հաար: Ոչ թե առաջնորդվենք այն տրամաբանությամբ, որ մեկ է ոչինչ չի ստացվի, եկեք ոչ մի բան չանենք, այլ մաքսիմալը անենք և հավատանք, որ կարող ենք այդ արդյունքին հասնել, որ այդ աշխատանքն անիմաստ չլինի, և այսպես ասած, խորհրդավոր չլինի, դավադրական չլինի: Խաղաղության պայմանագրի բացակայությունը կրկնապատկում է պատերազմի հավանականությունը»,- ասել է Փաշինյանը:

Աղբյուր` Փաստինֆո