Փաստ ինֆո

Անկախ բանակցությունների հարթակներից՝ բանակցողներն ու օրակարգը չեն փոխվում։ Բանակցողները մնում են ՀՀ-ն և Ադրբեջանը։ Լրագրողների հետ հանդիպմանն այսպիսի հայտարարություն արեց ՀՀ վարչապետ Նիկոլ Փաշինյանը՝ անդրադառնալով հարցին, թե արդյո՞ք մտավախություն չկա, որ Վաշինգտոն, Բրյուսել և ՌԴ բանակցային հարթակների փոփոխությամբ պայմանավորված, մի հարթակում ձեռք բերված պայմանավորվածություններն ու հնարավոր լուծումները կարող են փոշիանալ։
Ինչ վերաբերում է Մոսկվայում այսօր նախատեսված բանակցություններից ակնկալիքներին, ապա Փաշինյանը նշել է, որ ակնկալիք ունի նախեւառաջ մեզնից՝ ՀՀ ԱԳ նախարարից։

«Իհարկե մյուս գործընկերներից նույնպես, որ նրանք կկարողանան հնարավոր խաղաղության պայմանագրի ևս մի քանի հոդված համաձայնեցնել, կարողանան ինչ-որ լուծման հասնել Լաչինի միջանցքի բացման հարցում»,- ասաց նա։

Ինչ վերաբերում է ռուս- թուրքական հարաբերությունների լարման ֆոնին բանակցությունների գործընթացքում հնարավոր փոփոխությանը՝ Փաշինյանն ասաց, որ որևէ լարված հարաբերություն չի կարող դրական ազդեցություն ունենալ՝ հավելելով, որ չնայած այդ երկու երկրների միջև առկա որոշակի տարաձայնություններին՝ նրանք շատ ակտիվ գործակցում են։

«Բոլոր երկրների հարաբերություններում էլ կան հակասություններ։ Խնդիրն այն է, թե որքանով են այդ հակասությունները վերածվում կոնֆրոնտացիոն տրամաբանության։ Մեր պետության գոյության ողջ ընթացքում մենք գործել ենք կոնֆրոնտացիոն տրամաբանության մեջ, որը մեր մեծագույն պրոբլեմն է՝ բոլոր առումներով՝ և՛ անվտանգային, և՛ զարգացման, և՛ միջազգային ազդեցության առումով։ Այդ տրամաբանության մեջ, մենք, ըստ էության, չենք կարողացել ու չենք կարողանալու ապահովել մեր երկարատև զարգացումն ու անվտանգության ապահովումը»։

Աղբյուր` Փաստինֆո