Փաստ ինֆո

Մոսկվայում արտգործնախարարների հանդիպման կազմակերպմամբ Ռուսաստանը փորձում է ամբողջապես իր դաշտ բերել Արցախի բանակցային գործընթացը՝ հաշվի առնելով նաև Փաշինյանի հայտարարությունը՝ Բրյուսելյան բանակցությունների ձախողման մասին։ «Փաստինֆո»-ի հետ զրույցում նման կարծիք հայտնեց քաղաքագետ Արթուր Ղազարյանը՝ հավելելով, վաղն արվելու է ամեն բան, որպեսզի ռուսական օրակարգից առաջիկայում շեղումներ չլինեն։ Այդուհանդերձ, քաղաքագետն արտգործնախարարների առաջիկա հանդիպումից մեծ սխասելիքներ չունի։

Ինչպես արդեն հայտնել ենք՝ ՌԴ ԱԳՆ-ն հայտարարել է Մոսկվայում վաղը նախատեսված Տայաստանի, Ռուսաստանի ու Ադրբեջանի արտգործնախարարների հանդիպման մասին։ «Երեք երկրների արտաքին գերատեսչությունների ղեկավարները կվերլուծեն Լեռնային Ղարաբաղի շուրջ ստեղծված վիճակի դէսկալացիայի ուղիները, 2020 թվականի նոյեմբերի 9-ի, 2021 թվականի հունվարի 11-ի, նոյեմբերի 26-ի եւ 2022 թվականի հոկտեմբերի 31-ի եռակողմ պայմանավորվածությունների իրականացումն ակտիվացմանը վերաբերող հարցերը։ Հատուկ ուշադրություն է դարձվելու Երեւանի եւ Բաքվի միջեւ խաղաղության պայմանագրի նախապատրաստմանը»,- հայտարարել է ՌԴ ԱԳՆ-ն։

Ինչ վերաբերում է «խաղաղության պայմանագրի» պատրաստման մասին հայտարարությանը՝ Ղազարյանն ասաց, որ այս պահին էլ դեռևս հայտնի չէ, թե այդ փաստաթղթում ինչ կետեր են ներառված։ Այս համատեքստում, նա քիչ հավանական համարեց մինչև տարեվերջ նմանատիպ որևէ փաստաթղթի ստորագրման տարբերակը։

«Հաշվի առնելով պայմանագրի հետ կապված քննարկումների անդադար շարունակականությունը՝ հասկանալի է, չէ՞, որ այնտեղ տեղ գտած անգամ մանրուք թվացող հարցը հույժ կարևորություն է ներկայացնում։ Անգամ փոքր հարցերը երկարատև քննարկման անհրաժեշտություն ունեն։ Պատահական չէ, որ այն արդեն երկար ժամանակ է, որ շրջանառվում էր, բայց այդպես էլ որևէ հանգուցալուծում չունեցավ։ Չմոռանանք, որ նմանատիպ իրադարձություն եղավ նաև անցած տարեվերջին, երբ կարծես թե մոտ էր այդ պայմանագրի ստորագրումը։ Այնուհետև խոսվում էր տարվա մայիսի մասին, հիմա էլ նորից հասավ տարեվերջ։ Չեմ կարծում, թե այդ պայմանագրին այնտեղ հստակեցում կտրվի և նախապատրաստական աշխատանքները վերջնական տեսքի կբերվեն»,- ասաց նա։

Այս ամենի ֆոնին, «Փաստինֆո»-ի զրուցակիցն աբսուրդ որակեց Ադրբեջանի կողմից Արցախում ստեղծված ճգնաժամային հարցը չլուծելու պարագայում խաղաղության վերաբերյալ հարցերի քննարկումները։ Նրա խոսքով՝ հայկական կողմի դիվանագիտական ամբողջ ռեսուրսը պետք է կենտրոնանա արցախահայության բնական՝ ապրելու իրավունքի ապահովման ուղղությամբ։

«Այս առումով, խնդիրը շատ լուրջ է, արցախահայության հարցը պարզապես օրհասական է։ Մեր դիվանագիտական օղակների գործը պետք է լիներ պարտադրել միայն հայտարարություններ անող ու գործնական որևէ քայլի չդիմող գերտերություններին ու միջազգային կազմակերպություններին՝ ճնշում գոչծադրել Ադրբեջանի վրա՝ միջանցքը բացելու համար»,- ասաց նա։

Քաղաքագետի գնահատմամբ՝ ադրբեջանական գործողությունների նկատմամբ միջազգային հարթակի անտարբերությունն առաջիկայում կարող է հանգեցնել թշնամական երկրի կողմից նոր պատերազմի հրահրման։

Աղբյուր` Փաստինֆո