Փաստ ինֆո

ԱՄՆ նախագահ Ջո Բայդենի թիմը պետության ղեկավարի մասնակցությամբ մի շարք միջադեպերից հետո միջոցներ է մշակում, որպեսզի նա այլեւս չսայթաքի հանրային միջոցառումների ժամանակ, հայտնում է NBC News հեռուստաալիքը՝ վկայակոչելով իր աղբյուրներին:

«Ջո Բայդենի օգնականները հասկացել են, որ իրենք խնդիր են ունեցել անցյալ ամիս, երբ նախագահը Ռազմաօդային ակադեմիայի ավարտական արարողության ժամանակ սայթաքել է ավազի պարկին հարվածելով: Դրանից հետո նրանցից մի քանիսը հավաքվել են պարզելու, թե ինչը կարող էր սխալ լինել եւ ինչպես անել, որ նման ամոթալի եւ վտանգավոր միջադեպ «այլեւս երբեք չկրկնվի», - հաղորդում Է հեռուստաալիքը:

Հեռուստաալիքը նշում է, որ Հանրապետական կուսակցության ներկայացուցիչները Բայդենի տարիքը, որը նոյեմբերին կդառնա 81 տարեկան, դիտարկում են որպես նախագահի պաշտոնի համար նախընտրական արշավի ընթացքում պայքարի տարրերից մեկը: BBC Newsը հիշեցնում է, որ ԱՄՆ նախկին նախագահ Դոնալդ Թրամփը տեսանյութ է հրապարակել այն պահերի ընտրանիով, որոնցում Բայդենն ընկնում կամ սայթաքում է:

Նշվում է, որ նախագահ Բայդենի թիմը հետաքննություն է անցկացրել, թե ինչպես ապագայում «խուսափել նման միջադեպերից»:

«Բայդենի խորհրդականները քայլեր են ձեռնարկում աշխատանքի հետ կապված ֆիզիկական դժվարությունները նվազագույնի հասցնելու համար», - հայտնում է հեռուստաալիքը՝ վկայակոչելով իրավիճակին ծանոթ երկու աղբյուրների:

Բայդենի ֆիզիկական վիճակն անհանգստացնում է ոչ միայն երկրի ներսում նախագահի համախոհներին, այլև ԱՄՆ եվրոպական դաշնակիցների ներկայացուցիչներին: Արևմտյան երկրներից մեկի նախկին դիվանագետը, անանունության պայմանով, հեռուստաալիքին հայտնել է, որ մարդիկ «անհանգստանում են նախագահի ֆիզիկական թուլության համար», իսկ նախագահական երկրորդ ժամկետի ավարտին Բայդենն «իսկապես շատ ծեր կլինի»:

Աղբյուր` Փաստինֆո