Փաստ ինֆո

Այս օրերին Արցախում պայքարի իմիտացիա է փորձում ստեղծել իշխանությունը։ Քանի դեռ այս իրավիճակի առաջին մեղավորի անունն այստեղից չի հնչել, իրական պայքար Արցախի ինքնորոշման իրավունքի համար չկա ու չի կարող լինել, արդյունք՝ ևս։ «Փաստինֆո»-ի հետ զրույցում նման տեսակետ հնչեցրեց Արցախի ԱԺ «Արդարություն» խմբակցության ղեկավար Դավիթ Գալստյանը։

«44-օրյա պատերազմում պարտված իշխանությունն արդեն մի քանի լուրջ դիվանագիտական պարտություն էլ է բերել մեր գլխին, երբ տեղի տալով Ադրբեջանի պահանջներին՝ հանձնելով Բերձորը, Աղավնոն, փակելով Կաշենի հանքը, ազատելով Ռուբեն Վարդանյանին՝ փորձում էր համոզել, թե այլընտրանք չկար։ Հաշվի առնելով այդ փաստերը՝ շատ դժվար, գրեթե անհնար է լինելու նրանց հետ հստակ ու կայուն որոշումներ ընդունելն ու կյանքի կոչելը»,-նշեց Գալստյանը՝ հավելելով, որ Արցախում վիճակն օր օրի ավելի է սրվում և եթե Արայիկ Հարությունյանը շարունակի իր կեղծ պայքարը, ապա իրավիճակը վերահսկողությունից դուրս է գալու։

Անդրադառնալով հանուն Արցախի փրկության Հայաստանում ծավալված նախաձեռնություններին՝ Գալստյանը հայաստանաբնակ մեր հայրենակիցներին հորդորեց ակտիվորեն մասնակցել դրանց։ Շարժումն իրապես համաժողովրդականի վերածվելու կարևորագույն պայմաններից մեկը, նրա համոզմամբ, կազմակերպիչների՝ ազգային շահերով առաջնորդվելը կարող է դառնալ։

«Շատ կարևոր է, որ հրահանգավորված պայքար չլինի, այլ իսկական համաժողովրդական շարժում՝ հասցեական պահանջներով։ Բոլորս քաջ գիտենք, որ այս իրավիճակում հայտնվել ենք ՀՀ վարչապետ Նիկոլ Փաշինյանի սխալ քաղաքականության հետևանքով։ Առանց չափազանցության, մենք հիմա քաղում ենք Փաշինյանի սխալների դառը պտուղները։ Մինչև դա չընդունենք ու հասցեական պահանջ չներկայացնենք թիվ մեկ մեղավորին՝ պահանջելով Արցախի անունից բանակցել բացառապես ինքնորոշման սկզբունքի դիրքից, ոչինչ չի ստացվելու։ Ի՞նչ ենք ակնկալում միջազգային հանրությունից, եթե ՀՀ ղեկավարությունն Արցախի ինքնորոշման մասին չի էլ ուզում խոսել։ Միջազգային դերակատարները մեզնից ավելի շա՞տ պետք է շահագրգռված լինեն մեր ազգային շահն առաջ տանելու հարցում։ Ի վերջո, սթափվել է պետք, շատ ժամանակ ենք կորցրել, շատ։ Քանի դեռ չենք պահանջել ու հասել նրան, որ պաշտոնական Երևանը հայ ժողովրդի ազգային շահերով առաջնորդվի, միջազգային հանրությունից չենք ստանալու նաև հումանիտար աջակցություն»,-համոզմումք հայտնեց պատգամավորը։

Դավիթ Գալստյանն ավելի քան վստահ է՝ Արցախի ինքնորոշման իրավունքն առաջ տանել կստացվի թե՛ Հայաստանում, թե՛ Արցախում պարտված իշխանություններից ազատվելու, բանակցային հմտություններ, բավարար գիտելիք ունեցող մարդկանց օգնությամբ։ Իսկ ժողովրդին հրամցվող հնարավոր «խաղաղության» մասին լոլոները, ըստ նրա, մոտ ապագայում լրիվ անիրատեսական են և դրանում բավարար է համոզվել՝ ուշադրություն դարձնելով Ադրբեջանի վերջին տարիների գործողություններին ու Ալիևի կողմից անդադար հնչող հայտարարություններին։

Աղբյուր` Փաստինֆո