Փաստ ինֆո

Մայիսի 3-ից հուլիսի 20-ը շարունակվող ստորագրահավաքի մասնակիցների թիվը հատել է կես միլոնի շեմը։ Հավաքվել է 536. 898 ստորագրություն։ Սա փոքրիկ թեստ էր, որով արձանագրեցինք, որ հայ ժողովուրդն ամենևին չի լիազորել Նիկոլ Փաշինյանին՝ Արցախը թողնել Ադրբեջանի կազմում։ Այս մասին հայտարարեց ՀՀ ԱԺ պատգամավոր Թագուհի Թովմասյանը՝ հրավիրված ասուլիսին։ Նա վստահություն հայտնեց, որ ստորագրահավաքը շարունակելու դեպքում միլիոնավոր ստորագրություններ կհավաքվեին։

«Համեմատության համար ասեմ, որ «ՔՊ» կուսակցությունը ԿԸՀ կայքում ունի 3000 համակիրներ, անդամներ։ Այսինքն, չի իարող 3000 համակիր ունեցող կուսակցությունը որոշել 3000 տարեկան ազգի և 13 մլն հայերի ճակատագիրը։ Նիկոլ Փաշինյանը չունի լեգիտիմություն՝ Արցախի հարցով, և չունի լեգիտիմություն՝ պաշտպանելու իր կողմից առաջ տարվող թեզերը»,- հայտարարեց պատգամավորը։
Արձագանքելով հարցին, թե արդյո՞ք իշխանությունները չեն կարող հայտարարել, որ իրենց ավելի քան 600.000 քաղաքացի է ընտրել՝ տալով լեգիտիմություն՝ Թովմասյանն ասաց, որ այդ 680.000 թիվը վաղուց պակասել է։

«Այս ստորագրությունները ես ուղարկելու եմ աշխարհում մարդու իրավունքների պաշտպանությամբ զբաղվող բոլոր կառույցներին, միջազգային բոլոր դերակատար կազմակերպություններին և երկրներին։ Խնդրելու եմ ուշադրություն դարձնել, որ մարդիկ փաստարկված ձևով պահանջում են, որ Արցախը ճանաչվի հայկական և չլինի Ադրբեջանի կազմում, և ՀՀ քաղաքացիները մերշում են Արցախի էթնիկ զտումը»,- ասաց նա՝ հավելելով, որ Փաշինյանի կողմից բանակցված որևէ փաստաթուղթ չի ունենալու լեգիտիմություն։

Թովմասյանի գնահատմամբ՝ նաև այս պրոցեսը «վիժեցնելու» համար է «ՔՊ»-ն որոշել դադարեցնել Մարդու իրավունքների պաշտպանության հանձնաժողովի նախագահի իր լիազորությունները։ Նա վստահություն հայտնեց, որ այդ հրահանգը Փաշինյանն ստացել է անձամբ Իլհամ Ալիևից։

Աղբյուր` Փաստինֆո