Փաստ ինֆո

Նիկոլ Փաշինյանը մշտապես թշնամաբար է տրամադրված եղել թե՛ Հայոց բանակի նկատմամբ, թե՛ անձամբ, Վազգեն Սարգսյանի։ Նիկոլ Փաշինյանը ոչ միայն իրավունք չունի Վազգեն Սարգսյանի մասին տեսակետ հայտնելու, այլ նաև, առհասարակ, նրա անունը տալու՝ ինքն ո՞ւր, Վազգեն Սարգսյանն ո՞ւր։ Հիշում եմ, մի անգամ, նա ինձ խնդրեց, որպեսզի իր թերթին հարցազրույց տամ, ես էլ տվեցի, որից հետո Վազգեն Սարգսյանն ինձանից բավական նեղացավ՝ ասելով. «Նիկոլն ո՞վ է, որ դու դրան հարցազրույց ես տալիս, չե՞ս տեսնում, թե նա ինչպես է տրամադրված բանակի նկատմամբ»։ Այդ տարիներին Երկրապահ Կամավորական միությունը նոր- նոր էր ստեղծվել։ Մենք միասին ենք նախաձեռնել այդ կառույցը՝ Վազգեն Սարգսյանը նախագահն էր, ես առաջին տեղակալը»,- «Փաստինֆո»-ի հետ զրույցում հիշում է քաղաքական գործիչ Ալբերտ Բազեյանը՝ հակադարձելով երեկ Երկրապահ կամավորական միության հոբելյանական տոնական միջոցառման առիթով վարչապետ աշխատող անձի ելույթի այն հատվածին, թե, իբր, Վազգեն Սարգսյանը բանակում չի ծառայել։

Ալբերտ Բազեյանի փոխանցմամբ՝ բանակը մշտապես լրագրող Փաշինյանի թիրախում էր, գրածներից էլ հազիվ, միայն 10 տոկոսն էր ճշմարտանման. «Հայրենասեր մարդը, եթե անգամ, բանակում թերություններ է նկատում, անում է այնպես, որ դրանք շտկվեն, ոչ թե հանրային քննարկման է դնում ու հրապարակային թեմա է դարձնում, այն էլ՝ 90 տոկոսով սուտ և հորինած տեղեկություններով, թեկուզ, միայն նրա համար, որ հանրային հրապարակումները միայն մենք՝ ներսի սպառողը չի կարդում, այլ նաև մեր թշնամին։ Չեմ կասկածում, որ Նիկոլ Փաշինյանի նշանակետը, հենց, դրսի ուժերին ծառայելն էր, նրանց ինչ – ինչ տեղեկություններ հասցնելը, որի համար էլ որպես հարթակ էին ծառայում իր ստեղծած թերթերը»,- ասում է Ալբերտ Բազեյանը։

Վազգեն Սարգսյանն Ազգային Հերոս է։ Վազգեն Սարգսյանն Արցախի առաջին պատերազմի խորհրդանիշն է։ Վազգեն Սարգսյանն իր զինվորներին անուններով էր ճանաչում։ Նա չափազանց հոգատար էր զոհված զինծառայողների ընտանիքների և հաշմանդամ դարձած ազատամարտիկների հանդեպ, ասում է Ալբերտ Բազեյանը և հավելում. «Հայկական բանակի ստեղծման ակունքներում, հենց, Վազգեն Սարգսյանն է կանգնած, և, եթե մենք ունեցել ենք հաղթական բանակ, ապա դրա համար պարտական ենք առաջին հերթին և հիմնական առումով, հենց, Վազգեն Սարգսյանին։ Ի՞նչ է նշանակում՝ Վազգեն Սարգսյանը բանակում չի ծառայել։ Եվ, երբ նայում ես, թե ո՞վ է այս բառերի հեղինակը՝ կապիտուլացիայի տակ ստորագրած և Հայոց բնակին ու Վազգեն Սարգսյանին թիրախավորած, բանակում, իսկապես, երբեք չծառայած Նիկոլ Փաշինյանը, ապա հասկանում ես, որ այս ամենը հերթական նվաստացման ակտն է՝ ինչպես բանակի, այնպես նաև՝ Վազգեն Սարգսյանի և նրա հիշատակի առաջ, թեև Նիկոլ Փաշինյանից այլ բան սպասելի էլ չէր», - ասում է Բազեյանը։

Անդրադառնալով երեկ Օպերայի և Բալետի Ազգային ակադեմիական թատրոնում Երկրապահ Կամավորական միությանը նվիրված տոնական մեծ միջոցառմանը և այնտեղ Սասուն Միքայելյանի ներկայության թեմային, Ալբերտ Բազեյանը նկատում է՝ եթե Սասուն Միքայելյանն ուրիշ ոչինչ արած չլիներ իրենց վարկաբեկելու համար, ապա միայն այն անընդունելի և դատապարտելի նախադասությունը, որով նա, խայտառակեց իր անունը, բավարար էր, որպեսզի նրան այլև ոչ ոք լուրջ չընդունի. «Ի՞նչ է նշանակում՝ ապրիլյան հեղափոխությունն ավելի կարևոր է, քան արցախյան գոյամարտը։ Սա խայտառակություն է։ Ես ձեզ վստահ ասում եմ՝ Երկրապահ Կամավորական միության շարքային անդամներն ազնիվ, կռվող և հայրանասեր տղաներ են, նրանք մեր զինակից ընկեներն են և բոլորովին կապ չունի, որ միության այսօրվա վերնախավն այս իշխանության հետ է։ Շուտով այդ տղերքի 80 -90 տոկոսին մենք Սասունի վերահսկողության տակից հանելու ենք։ Մենք ձևավորել ենք կամավոականների, աշխարհազորայինների և պահեստազորայինների միավորում, որտեղ մեզ անդամակցելու են նաև Երկրապահ կամավորական տղերքի ճնշող մեծամասնությունը։ Արդեն իսկ շատ շատերը զանգահարում են ինձ ու հարցնում՝ ե՞րբ կարող են միանալ մեր նախաձեռնությանը։ Դա կլինի առաջիկա համաժողովից հետո՝ ամենամոտ ապագայում։ Մենք մեր օրինակով համատեղելի քաղաքական ուժերին կառաջարկենք միանալ մեզ, ձևավորել մեկ միասնական համահայկական դաշինք, արժանապատիվ կերպով ոտքի հանելու համար մեր ժողովրդին և պարտադրելու այս իշխանությունների և անձամբ Նիկոլ Փաշինյանի հրաժարականը»,- ասում է Ալբերտ Բազեյանը։

Աղբյուր` Փաստինֆո